![ABP Premium](https://cdn.abplive.com/imagebank/Premium-ad-Icon.png)
Opposition Parties Meeting: இன்று பெங்களூருவில் நடைபெறும் எதிர்க்கட்சிகள் கூட்டம்.. முதலமைச்சர் மு.க.ஸ்டாலின் உள்பட 4 முதலமைச்சர்கள் பங்கேற்பு.. முழு விவரம்..
ஆளும் பாரதிய ஜனதா கட்சியை வரும் நாடாளுமன்ற தேர்தலில் தோற்கடிக்க வேண்டும் என்பதற்காக இன்று இரண்டாவது முறையாக பெங்களூருவில் எதிர் கட்சிகள் கூட்டம் நடைபெறுகிறது.
![Opposition Parties Meeting: இன்று பெங்களூருவில் நடைபெறும் எதிர்க்கட்சிகள் கூட்டம்.. முதலமைச்சர் மு.க.ஸ்டாலின் உள்பட 4 முதலமைச்சர்கள் பங்கேற்பு.. முழு விவரம்.. Opposition parties are meeting in Bengaluru for the second time today to defeat the ruling Bharatiya Janata Party in the upcoming parliamentary elections. Opposition Parties Meeting: இன்று பெங்களூருவில் நடைபெறும் எதிர்க்கட்சிகள் கூட்டம்.. முதலமைச்சர் மு.க.ஸ்டாலின் உள்பட 4 முதலமைச்சர்கள் பங்கேற்பு.. முழு விவரம்..](https://feeds.abplive.com/onecms/images/uploaded-images/2023/07/17/bea7a6ea3b8baa93af475859630daebb1689560916103589_original.jpg?impolicy=abp_cdn&imwidth=1200&height=675)
2014-ஆம் ஆண்டு, 2019-ஆம் ஆண்டு என நடைபெற்ற மக்களவை தேர்தலில் வெற்றி பெற்ற பாஜக 9 ஆண்டுகளாக ஆட்சி நடத்தி வருகிறது. பிரதமராக மோடி பதவியேற்றதில் இருந்து பல்வேறு மாநிலங்களில் ஆட்சியை கைப்பற்றி பா.ஜ.க. அசுர பலத்தில் உள்ளது. இச்சூழலில், இன்னும் 9 மாதங்களில் அடுத்த மக்களவை தேர்தல் நடைபெற உள்ளது. அடுத்த ஆண்டு நடைபெறும் தேர்தலில் பா.ஜ.க தனது வெற்றியை எப்படியாவது தக்க வைத்துக்கொள்ள வேண்டும் என்பதற்காக தீவிர முயற்சிகளில் இறங்கியுள்ளது. அதே சமயம் பாரதிய ஜனதா கட்சியை தோற்கடிக்க எதிர்கட்சிகள் ஒன்றாக இணைந்து களம் இறங்கியுள்ளனர்.
முதல் கூட்டம்:
முதல் முறையாக கடந்த மாதம் 23 ஆம் தேதி காங்கிரஸ், திரிணாமுல் காங்கிரஸ், திமுக உள்ளிட்ட எதிர்க்கட்சிகள் பாட்னாவில் ஆலோசனை கூட்டம் நடத்தினர். குறிப்பாக, காங்கிரஸ் கட்சி தலைவர் மல்லிகார்ஜூன கார்கே, ராகுல் காந்தி, தமிழ்நாடு முதலமைச்சர் மற்றும் திமுக தலைவர் மு.க.ஸ்டாலின், மேற்கு வங்க முதல்வர் மற்றும் திரிணாமுல் காங்கிரஸ் கட்சி தலைவர் மம்தா பானர்ஜி, சமாஜ்வாதி கட்சி தலைவர் அகிலேஷ் யாதவ், ஜார்க்கண்ட் முதல்வர் மற்றும் ஜேஎம்எம் கட்சியின் செயல் தலைவர் ஹேம்நாத் சோரன், உத்தவ் தாக்கரே, தேசியவாத காங்கிரஸ் தலைவர் சரத்பவார், இந்திய கம்யூனிஸ்ட் கட்சி பொதுச்செயலாளர் டி.ராஜா, மார்க்சிஸ்ட் கம்யூனிஸ்ட் கட்சி பொதுச்செயலாளர் சீத்தாராம் யெச்சூரி, ஆம் ஆத்மி கட்சி நாடாளுமன்ற உறுப்பினர் ராகவ் சந்தா, ஆம் ஆத்மி கட்சி தலைவர் அர்விந்த் கெஜிர்வால் உள்ளிட்டோர் கலந்துக்கொண்டனர்.
இரண்டாவது கூட்டம்:
இதனை தொடர்ந்து இரண்டாவது கூட்டம் சிம்லாவில் நடைபெறும் என அறிவிக்கப்பட்டது. ஆனால் குறிப்பிட்ட சில காரணங்களுக்காக அது பெங்களூருக்கு மாற்றப்பட்டது. பெங்களூருவில் 13 மற்றும் 14 ஆம் தேதி கூட்டம் நடைபெறும் என முதலில் அறிவிக்கவே மீண்டும் ஒத்திவைக்கப்பட்டது. ஜூலை 17 மற்றும் 18 ஆம் தேதி நடைபெறும் என தெரிவிக்கப்பட்டது. நாடே மிகுந்த எதிர்ப்பார்ப்புடன் இருக்கும் இந்த கூட்டத்தில் தமிழ்நாடு முதலமைச்சர் மு.க. ஸ்டாலின், விசிக தலைவர் திருமாவளவன், மதிமுக பொதுச் செயலாளர் வைகோ, பீகார் முதலமைச்சர் நிதிஷ்குமார், சமாஜ்வாதி கட்சி தலைவர் அகிலேஷ் யாதவ், ராஷ்டிரிய ஜனதா தளம் சார்பில் லாலு பிரசாத் யாதவ், உத்தவ் தாக்கரே, தேசியவாத காங்கிரஸ் சார்பில் சரத்பவார், ஜார்கண்ட் முதலமைச்சர் ஹேமந்த் சோரன், இந்திய கம்யூனிஸ்ட் கட்சி சார்பில் டி.ராஜா, மார்க்சிஸ்ட் கம்யூனிஸ்ட் கட்சியின் சீதாராம் யெச்சூரி, மக்கள் ஜனநாயக கட்சி சார்பில் மெகபூபா முக்தி உள்பட 24 கட்சிகளின் தலைவர்கள் கலந்து கொள்கின்றனர். இதற்காக தமிழ்நாடு முதலமைச்சர் மு.க ஸ்டாலின் பெங்களூருக்கு பயணம் மேற்கொள்கிறார்.
இன்று எதிர்கட்சிகளின் இரண்டாவது கூட்டம் நடைபெறும் நிலையில் இன்று மாலை 6 மணிக்கு காங்கிரஸ் கட்சியின் முன்னாள் தலைவர் சோனியா காந்தி தலைமையில் கூட்டம் கூடுகிறது. அவர்களுக்கு சோனியா காந்தி சார்பில் சிறப்பு விருந்து அளிக்கப்படுகிறது. நாளை காலை 11 மணிக்கு முக்கிய ஆலோசனை கூட்டம் நடைபெறுகிறது. இந்த கூட்டத்தில் நாடாளுமன்ற தேர்தலை எப்படி எதிர்கொள்வது, அடுத்த கூட்டம், வெற்றி பெற்றால் பிரதமராக யாரை தேர்வு செய்வது, இந்த கூட்டத்திற்கு என்ன பெயர் சூட்டுவது குறித்து விரிவாக ஆலோசிக்கப்படும் என எதிர்ப்பார்க்கப்படுகிறது.
ஆம் ஆத்மி பங்கேற்பு:
டெல்லியில் நடைபெறும் அரசுக்கு எதிராக மத்திய அரசு கொண்டு வந்த அவசர சட்ட விவகாரத்தில் காங்கிரஸ் ஆதரவு அளிக்காததால் இன்று நடைபெறும் கூட்டத்தில் பங்கேற்க மாட்டார்கள் என கூறப்பட்ட நிலையில், காங்கிரஸ் ஆம் அத்மிக்கு ஆதரவு அளித்துள்ளது. இதனால் இன்று நடைபெறும் கூட்டத்தில் ஆம் ஆத்மி கட்சியும் கலந்துக்கொள்கிறது என தெரிவிக்கப்பட்டுள்ளது.
தலைப்பு செய்திகள்
ட்ரெண்டிங் செய்திகள்
![ABP Premium](https://cdn.abplive.com/imagebank/metaverse-mid.png)
![வினய் லால்](https://cdn.abplive.com/imagebank/editor.png)