இந்தியாவில் படிக்கவிடுங்க... உக்ரைனில் படிக்கும் இந்திய மாணவர்களுக்காக எழும் குரல்!!

உக்ரைன் மருத்துவ மாணவர்களை இந்தியக் கல்லூரிகளில் அனுமதிக்க வேண்டும் என்று மத்திய அரசுக்கு இந்திய மருத்துவ சங்கம் கோரிக்கை விடுத்துள்ளது.

உக்ரைன் மாணவர்கள்

உக்ரைன் மருத்துவ மாணவர்களை இந்தியக் கல்லூரிகளில் அனுமதிக்க வேண்டும் என்று மத்திய அரசுக்கு இந்திய மருத்துவ சங்கம் கோரிக்கை விடுத்துள்ளது.

உக்ரைன் நாட்டின் மீது ரஷ்யா பிப்ரவரி 24ஆம் தேதி போர் தொடுப்பதாக அந்நாட்டு அதிபர் விளாடிமிர் புதின் அறிவித்தார். தொடர்ந்து,உக்ரைன் மீது ரஷ்யா தாக்குதலைத் தொடங்கியது. ஐ.நா. மற்றும் உலக நாடுகளின் கோரிக்கையை புறந்தள்ளிய ரஷ்யா, கடந்த 10 நாட்களாக தாக்குதல் நடத்தி வந்தது. உக்ரைன் நாட்டின் விமானத்தளங்கள், வான்வெளி பாதுகாப்பு கட்டமைப்புகளை அழித்துவிட்டதாக ரஷ்யா தெரிவித்தது. பல்கலைக்கழகத்தின்மீது குண்டு வீசிய காட்சிகளும் வைரலாகின. 

உக்ரைனில் சிக்கியுள்ள இந்திய மாணவர்களை ஆபரேஷன் கங்கா என்ற பெயரின் கீழ் மத்திய அரசு மீட்டு வருகிறது. அங்கு சென்றிருந்த மாணவர்களில் 90% பேர் மருத்துவம் பயிலவே சென்றிருந்தனர். மத்திய அரசு வெளியிட்டுள்ள ஒரு புள்ளிவிவரத்தில் உக்ரைனில் உள்ள 18,095 இந்தியர்களில் 90% மாணவர்கள் மருத்துவம் பயிலச் சென்றவர்கள் என்று தெரிவிக்கப்பட்டது. 

டிசம்பர் 2021ல் மக்களவையில் மத்திய சுகாதார அமைச்சகம் பகிர்ந்த தகவலின்படி, இந்தியாவில் எம்பிபிஎஸ் கல்வி பயில 88,120 இடங்களும், பல் மருத்துவம் பயில 27,498 இடங்களுமே உள்ளன. ஆனால் மருத்துவக் கனவுடன் கடந்தாண்டு நீட், தேசிய அளவிலான மருத்துவ நுழைவுத் தேர்வு எழுத விண்ணப்பித்தவர்கள் 13 லட்சம் மாணவர்கள் ஆவர். 

இந்த சூழலில், கார்கீவ் நகரில் கர்நாடகாவைச் சேர்ந்த மருத்துவ மாணவர் நவீன் சேகரப்பா உயிரிழந்தார். அவர் உயிரிழந்ததற்கு நீட் தேர்வு தான் காரணம் என்று அம்மாநில முன்னாள் முதல்வரும் காங்கிரஸ் தலைவருமான சித்தராமையா கூறியுள்ளார். மாணவரின் தந்தை தனது மகன் 97% மதிப்பெண் பெற்றிருந்தும் சீட் கிடைக்காமல் உக்ரைன் சென்றார் என்று புலம்பியிருந்தார்.

இந்நிலையில் இந்திய மருத்துவ சங்கம் (IMA) இந்தியப் பிரதமர் மற்றும் மத்திய சுகாதாரத் துறை அமைச்சர் மன்சுக் மாண்டவியா ஆகியோருக்குக் கடிதம் எழுதியுள்ளது. 

அந்தக் கடிதத்தில், உக்ரைனில் ரஷ்யா ராணுவ நடவடிக்கை மேற்கொண்ட பிறகு, நிலை மிகவும் மோசமாக மாறியுள்ளது. இதனால் உக்ரைனில் உள்ள மருத்துவக் கல்லூரிகளில் படித்து வந்த மாணவர்களின் வாழ்க்கை கேள்விக்குறியாகி உள்ளது. அவர்கள் வெளிநாட்டு மருத்துவக் கல்லூரிகளில் படிக்க, இந்தியாவில் தகுதிச் சான்றிதழ் பெற வேண்டியது கட்டாயம். 

மருத்துவ மாணவர்களின் எதிர்காலத்தைக் கருத்தில்கொள்ள வேண்டும் ஒருமுறை மட்டும் சிறப்புத் தெரிவாக அனுமதி அளிக்க வேண்டும் என்று இந்திய மருத்துவ சங்கம் கோரிக்கை விடுத்துள்ளது.

இதே கோரிக்கையை சத்தீஸ்கர் சுகாதாரத் துறை அமைச்சர் டி.எஸ்.சிங் டியோ மத்திய அரசிடம் முன்வைத்துள்ளது குறிப்பிடத்தக்கது.