Manipur Crisis : இயல்பு நிலைக்கு திரும்புகிறதா மணிப்பூர்? அகற்றப்படும் பதுங்கு குழி..திறக்கப்படும் பள்ளிகள்

வன்முறை சம்பவங்களில் இருந்து தங்களை தற்காத்து கொள்ள மெய்தி மற்றும் குகி சமூக மக்கள் கட்டியெழுப்பிய பதுங்கு குழிகளை அகற்ற அரசு முடிவு செய்துள்ளது. 

மணிப்பூர்

சரியாக இரண்டு மாதங்களுக்கு முன்பு, மணிப்பூரில் இதே நாளில்தான் இனக்கலவரம் வெடித்தது. கடந்த 60 நாள்களாக நடந்து வரும் வன்முறை சம்பவங்கள் நாட்டையே உலுக்கி வருகிறது. இந்த நிலையில், மணிப்பூர் அரசு முக்கிய முடிவு ஒன்றை எடுத்துள்ளது. வன்முறை சம்பவங்களில் இருந்து தங்களை தற்காத்து கொள்ள மெய்தி மற்றும் குகி சமூக மக்கள் கட்டியெழுப்பிய பதுங்கு குழிகளை அகற்ற அரசு முடிவு செய்துள்ளது. 

முதலமைச்சர் தலைமையில் நடந்த கூட்டத்தில் முக்கிய முடிவு:

அதேபோல, 1 முதல் 8 வரையிலான வகுப்புகளுக்கு வரும் புதன்கிழமை முதல் பள்ளிகள் திறக்கப்படும் என அறிவிக்கப்பட்டுள்ளது. தொடர் துப்பாக்கிச்சூடுகள் நடந்து வரும் நிலையில், பள்ளிகள் திறக்கப்படும் என்ற அறிவிப்பை மாநில அரசு வெளியிட்டுள்ளது. மணிப்பூர் முதலமைச்சர் பைரன் சிங் தலைமையில் நடைபெற்ற கூட்டத்தில் இந்த முடிவு எடுக்கப்பட்டுள்ளது. 

ராணுவம், துணை ராணுவம், மாநில காவல்துறையை சேர்ந்த பிரதிநிதிகள் இந்த கூட்டத்தில் கலந்து கொண்டனர். விவசாய நடவடிக்கைகள் தடையின்றி தொடர விவசாயிகளுக்கு கூடுதல் பாதுகாப்பு வழங்குவது என்றும் முடிவு செய்யப்பட்டது. நிவாரணம் தொடர்பான தகவல்களை அறிந்து கொள்ளவும் புகார் தெரிவிக்கவும் எண் அறிவிக்கப்பட்டுள்ளது. 1800 309 0931 என்ற எண்ணை தொடர்பு கொண்டு புகார் அளிக்க அறிவுறுத்தப்பட்டுள்ளது.

கலவரத்திற்கு காரணமான ஒற்றுமை பேரணி:

மணிப்பூரில் நடந்த வன்முறையில் 120 பேர் உயிரிழந்துள்ளனர். 3,000க்கும் மேற்பட்டோர் காயமடைந்துள்ளனர். மாநிலத்தின் பழங்குடியினர் பட்டியலில் மெய்டீஸ் சமூகத்தினரை சேர்க்க வேண்டும் என்பது நீண்ட நாள் கோரிக்கையாக உள்ளது. கடந்த 2012ஆம் ஆண்டு முதல், மெய்டீஸ் சமூகத்தினர், இந்த கோரிக்கையை நிறைவேற்ற வேண்டும் என வலியுறுத்தி வருகின்றனர்.

மெய்டீஸ் சமூகத்தினருக்கு எஸ்டி அந்தஸ்து வேண்டும் என்ற கோரிக்கையை மாநிலத்தின் பழங்குடியினர் நீண்ட காலமாக எதிர்க்கின்றனர். மாநிலத்தின் 60 சட்டமன்றத் தொகுதிகளில் 40 தொகுதிகள் பள்ளத்தாக்கில் இருப்பதால், மக்கள்தொகை மற்றும் அரசியல் பிரதிநிதித்துவம் இரண்டிலும் மெய்டீஸ் ஆதிக்கமே இருப்பதாக பழங்குடியினர் குற்றம்சாட்டியுள்ளனர்.

இதற்கிடையே, மணிப்பூர் உயர் நீதிமன்றத்தில் மெய்டீஸ் பழங்குடி சங்கம் சார்பில் வழக்கு தொடரப்பட்டது. இந்திய அரசியலமைப்பில் உள்ள பழங்குடியினர் பட்டியலில் மெய்டீஸ் சமூகத்தை சேர்ப்பதற்கான பரிந்துரையை மத்திய பழங்குடியினர் விவகார அமைச்சகத்திடம் சமர்ப்பிக்க மணிப்பூர் அரசுக்கு உத்தரவிட வேண்டும் என மனுவில் குறிப்பிடப்பட்டது.

"மனுப்பூரில் உள்ள பழங்குடியினர் பட்டியலில் மெய்டீஸ் சமூகத்தை சேர்க்க மனுதாரர்கள் மற்றும் பிற சங்கங்கள் நீண்ட வருடங்களாக போராடி வருகின்றன" என்று கூறிய நீதிமன்றம், மனுதாரர்களின் வழக்கை பரிசீலித்து அதன் பரிந்துரையை சமர்ப்பிக்குமாறு அரசுக்கு உத்தரவிட்டது. இந்த விவகாரத்தில் நான்கு வார காலம், அவகாசம் வழங்கியது மணிப்பூர் உயர் நீதிமன்றம்.

உயர் நீதிமன்றத்தின் தீர்ப்புக்கு, பழங்குடியினர் பிரிவினர் கடும் எதிர்ப்பு தெரிவித்துள்ளனர். எஸ்டி அந்தஸ்து வழங்க வேண்டும் என்ற மெய்டீஸ் சமூகத்தினரின் நீண்ட நாள் கோரிக்கைக்கு எதிராக பழங்குடியினர் ஒற்றுமை பேரணி நடத்தப்பட்டது. இந்த பேரணியில் வன்முறை வெடிக்க மாநிலம் முழுவதும் பதற்றம் நிலவியது.