பதற்றத்தை ஏற்படுத்தும் அத்திக் அகமது கொலை..பாதுகாப்பு காரணங்களால் வேறு சிறைக்கு மாற்றப்பட்ட கொலையாளிகள்...என்னதான் நடக்கிறது..?

நைனி சிறையில் அடைக்கப்பட்டிருந்த சன்னி சிங், அருண் மௌரியா, லவ்லேஷ் தோவாரி ஆகியோர் பிரதாப்கர் சிறைக்கு மாற்றப்பட்டுள்ளனர்.

கொலையாளி

முன்னாள் நாடாளுமன்ற உறுப்பினரும், பிரபல ரவுடியுமான அத்திக் அகமது மற்றும் அவரது சகோதரர் அஷ்ரப்  கொல்லப்பட்ட சம்பவம் நாட்டில் பெரும் பரபரப்பை ஏற்படுத்தியுள்ளது. உத்தரப் பிரதேச மாநிலத்தை உலுக்கி வரும் இந்த சம்பவத்தின் கொலையாளிகள், பாதுகாப்பு காரணங்களால் வேறு சிறைக்கு மாற்றப்பட்டுள்ளனர்.

பாதுகாப்பு காரணங்களால் வேறு சிறைக்கு மாற்றப்பட்ட கொலையாளிகள்:

நைனி சிறையில் அடைக்கப்பட்டிருந்த சன்னி சிங், அருண் மௌரியா, லவ்லேஷ் தோவாரி ஆகியோர் பிரதாப்கர் சிறைக்கு மாற்றப்பட்டுள்ளனர். நைனி சிறையில் அடைக்கப்பட்டிருந்த இந்த மூவர் மீது தாக்குதல் நடத்தப்படலாம் என உளவுத்துறை எச்சரிக்கை விடுத்ததாகக் கூறப்படுகிறது.

மக்களிடையே பிரபலம் அடைவதற்காக இவர்கள் இந்த கொலை செய்ததாக காவல்துறை அதிகாரிகள் தகவல் தெரிவிக்கின்றனர். கடந்த வார இறுதியில், நீதிமன்றத்தில் ஆஜர்படுத்தப்பட்ட இவர்கள் 14 நாட்கள் நீதிமன்ற காவலில் அடைக்கப்பட்டனர்.

ஒரு புறம் பரபரப்பான இந்த கொலை சம்பவம் குறித்து விசாரிக்க இரண்டு சிறப்பு புலனாய்வு குழுக்களை (எஸ்ஐடி) மாநில காவல்துறை அமைத்துள்ளது. இதுகுறித்து விசாரிக்க விசாரணை ஆணையம் ஒன்றையும் உத்தரப் பிரதேச அரசு அமைத்தது.

ஓய்வு பெற்ற உயர் நீதிமன்ற நீதிபதி அரவிந்த் குமார் திரிபாதி தலைமையில் அமைக்கப்பட்ட விசாரணை ஆணையத்தில் ஓய்வு பெற்ற நீதிபதி பிரிஜேஷ் குமார் சோனி மற்றும் முன்னாள் டிஜிபி சுபேஷ் குமார் சிங் இடம்பெற்றுள்ளனர். இந்த ஆணையம் இரண்டு மாதங்களுக்குள் தனது அறிக்கையை அரசிடம் சமர்ப்பிக்க வேண்டும்.

கொலைக்கான பின்னணி:

கடந்த 2005 ஆம் ஆண்டு உத்தரப்பிரதேசத்தில் பகுஜன் சமாஜ் கட்சி எம்.எல்.ஏ ராஜூ பால் கொலை செய்யப்பட்டார். இந்த வழக்கில் முக்கிய சாட்சியாக இருந்தவர் வழக்கறிஞர் உமேஷ் பால். இவரை  கடந்த 2007 ஆம் ஆண்டு கடத்தி கொலை செய்தனர். இதுதொடர்பான வழக்கில் சமாஜ்வாதி கட்சியின் முன்னாள் எம்.எல்.ஏ.வும், பிரபல ரவுடியுமான அத்திக் அகமது மற்றும் அவரது சகோதரர் அஷ்ரப் ஆகியோருக்கு கடந்த மார்ச் 28 ஆம் தேதி பிரயாக்ராஜ் நீதிமன்றம் ஆயுள் தண்டனை விதித்து உத்தரவிட்டது. 

இதனிடையே  சில நாட்கள் முன்பு உமேஷ் பால் கொலை வழக்கில் தேடப்பட்டு வந்த அத்திக் அகமதுவின் மகன்கள் ஆசாத் மற்றும்  குலாம் ஆகியோர் ஜான்சியில் பதுங்கி இருப்பதாக போலீசாருக்கு தகவல் கிடைத்தது. சம்பவ இடத்திற்கு குற்றவாளிகளை பிடிக்க சென்ற போலீசாருக்கும், எதிர் தரப்புக்கும் இடையே நடைபெற்ற துப்பாக்கிச் சூட்டில் ஆசாத் மற்றும் குலாம் என்கவுண்டரில் சுட்டுக் கொல்லப்பட்டனர். 

போலீசார் முன்பே சுட்டுக்கொலை:

இதனையடுத்து உமேஷ் பால் கொலை வழக்கில் தன்னையும் தனது குடும்பத்தினரையும் பொய்யாகச் சிக்க வைத்து, தாங்கள் உத்தரப்பிரதேச காவல்துறையால் போலி என்கவுன்டரில் கொல்லப்படலாம் என்று கூறி, பாதுகாப்பிற்காக உச்ச நீதிமன்றத்தில் அத்திக் அகமது வழக்குத் தொடர்ந்தார். ஆனால் இதனை விசாரிக்க நீதிபதிகள் மறுத்து விட்டனர். 

இப்படியான சூழலில் அத்திக் அகமது மற்றும் அவரது சகோதரர் அஷ்ரப் இருவரும் மருத்துவ பரிசோதனைக்காக பிரயாக்ராஜ் அழைத்து செல்லப்பட்டனர். பின்னர் இருவரும் செய்தியாளர்களுக்கு பேட்டிக் கொடுத்து கொண்டிருந்தனர். அப்போது அங்கு வந்த 3 மர்ம நபர்கள் திடீரென கைத்துப்பாக்கியை எடுத்து இருவரையும் சரமாரியாக சுட்டனர். இதில் அத்திக், அஷ்ரப் இருவரும் சம்பவ இடத்திலேயே உயிரிழந்தனர்.