Ambani Engagement: பிரம்மாண்டமாக நடைபெற்ற அம்பானி வீட்டு நிச்சயதார்த்தம்.. குவிந்த பாலிவுட் நட்சத்திரங்கள்!

இந்தியாவின் முன்னணி தொழிலதிபர் முகேஷ் அம்பானி - நீதா அம்பானி தம்பதியின் இளைய மகனான, ஆனந்த் அம்பானியின் திருமண நிச்சயதார்த்த விழா மும்பையில் கோலாகலமாக நடைபெற்றது.

ஆனந்த் அம்பானி - ராதிகா (courtesy:cnbctv18.com)

இந்தியாவின் முன்னணி தொழிலதிபர் முகேஷ் அம்பானி - நீதா அம்பானி தம்பதியின் இளைய மகனான,  ஆனந்த் அம்பானியின் திருமண நிச்சயதார்த்த விழா மும்பையில் கோலாகலமாக நடைபெற்றது.

அம்பானி வீட்டு திருமணம்:

இந்திய தொழில்துறையில் முன்னணியில் உள்ள அம்பானியின் இளைய மகனான, ஆனந்த் அம்பானி ரிலையன்ஸ் குழுமத்தின் ஆற்றல் சார்ந்த வணிகங்களை தலைமை தாங்கி நடத்தி வருகிறார். அவருக்கும், என்கோர் ஹெல்த்கேர் CEO விரேன் மெர்ச்சன்ட் மற்றும் ஷைலா மெர்ச்சன்ட் ஆகியோரின் மகளும், என்கோர் ஹெல்த் கேர் குழுமத்தின் இயக்குனருமான ராதிகா மெர்ச்சன்ட்டிற்கும் திருமணம் செய்ய, இரு குடும்பத்தாரும் முடிவு செய்துள்ளனர். இதையடுத்து, ஆனந்த் அம்பானி மற்றும் ராதிகா மெர்ச்சன்ட்டிற்குமான குடும்பத்தினர் மட்டும் பங்கேற்ற நிச்சயதார்த்தம், விரேன் குடும்ப வழக்கப்படி ராஜஸ்தானில் கோலாகலமாக நடைபெற்றது.

விழாக்கோலம் பூண்ட அண்டிலியா

அதைத் தொடர்ந்து, மும்பையில் முகேஷ் அம்பானியின் அண்டிலியா வீட்டில், அவரது குடும்ப வழக்கப்படி அதிகாரப்பூர்வ நிச்சயதார்த்த விழா பிரம்மாண்டமாக நேற்று மாலை நடந்தது. இதற்காக இந்தியாவின் மிகவும் விலை உயர்ந்த வீடாக கருதப்படும் அம்பானியின் வீடு, மலர்கள், வண்ண விளக்குகள் மற்றும் பலூன்களால் அலங்கரிக்கப்பட்டு விழாக்கோலம் பூண்டு இருந்தது.

நடனமாடி மகிழ்ந்த அம்பானி குடும்பம்:

தொடர்ந்து,  கணபதி பூஜை செய்யப்பட்டு முகேஷ் அம்பானி குடும்பத்தின் பாரம்பரிய வழக்கத்தின்படி நிச்சயதார்த்த விழாவின் முக்கிய நிகழ்வான லகான் பத்ரிகா (திருமண நிச்சய பத்திரிக்கை) வாசிக்கப்பட்டது. பின்னர் பரிசுகளையும் இனிப்புகளையும் இரு குடும்பத்தினரும் மாற்றிக்கொண்டனர். பின்னர் நீதா அம்பானி தலைமையில் அம்பானி குடும்பத்தினர் நடனமாடி தங்களது மகிழ்ச்சியை வெளிப்படுத்தினர்.

#WATCH | Engagement of Anant Ambani and Radhika Merchant held at Mukesh Ambani's Mumbai residence 'Antilla' yesterday pic.twitter.com/igSZQ9fOT5

— ANI (@ANI) January 20, 2023

மோதிரம் மாற்றி நிச்சயதார்த்தம்:

பின்னர் ஆனந்த் அம்பானியின் சகோதரி இஷா நிச்சயதார்த்த நிகழ்வை அறிவித்தார். அப்போது, அம்பானி வீட்டின் வளர்ப்பு நாய், நிச்சயதார்த்த மோதிரங்களை கொண்டு வர, குடும்பத்தினர் மற்றும் நண்பர்கள் முன்னிலையில் ஆனந்த் அம்பானியும், ராதிகா மெர்ச்சன்ட்டும் மோதிரம் மாற்றிக்கொண்டனர்.

#WATCH | The Ambani family dances at the ring ceremony of Anant Ambani and Radhika Merchant

The engagement ceremony was held at Mukesh Ambani's Mumbai residence 'Antilla' yesterday pic.twitter.com/mmNsI9fzkc

— ANI (@ANI) January 20, 2023

விழாவில் பங்கேற்ற திரை நட்சத்திரங்கள்

இதைத் தொடர்ந்து நடைபெற்ற பார்ட்டியில், பாலிவுட்டை சேர்ந்த சல்மான் கான், ஷாருக்கானின் மனைவி கவுரி கான் மற்றும் அவரது மகன்,  ரன்வீர் சிங் - தீபிகா படுகோனே தம்பதி, ஐஸ்வர்யா ராய், கத்ரீனா கைஃப், சாரா அலி கான், ஜான்வி கபூர், அக்‌ஷய் குமார், ஜான் ஆபிரகாம், வருண் தவான் மற்றும் ஸ்ரேயா கோஷல் என பெரும் நட்சத்திர பட்டாளமே கலந்து கொண்டது.