தமிழ்நாட்டுக்கு வயநாடு போன்ற ஆபத்தா.? – அமைச்சர் செங்கோட்டையன் கொடுத்த அதிரடி விளக்கம்....

வயநாடு போன்ற நிலச்சரிவு சம்பவங்கள் தமிழ்நாட்டில் ஏற்படாதவாறு, தீவிர முன்னெச்சரிக்கை நடவடிக்கைகள் எடுக்கப்பட்டு வருவதாக அமைச்சர் செங்கோட்டையன் தெரிவித்துள்ளார்.

கோவையில் அமைச்சர் செங்கோட்டையன் பேட்டி

Source : abp nadu

கேரள மாநிலம் வயநாட்டில் ஏற்பட்ட நிலச்சரிவு போன்ற சம்பவங்கள் தமிழ்நாட்டில் எங்கும் ஏற்படாத வகையில், தேவையான அனைத்து முன்னெச்சரிக்கை நடவடிக்கைகளும் தீவிரமாக எடுக்கப்பட்டு வருவதாக வருவாய் மற்றும் பேரிடர் மேலாண்மைத் துறை அமைச்சர் செங்கோட்டையன் தெரிவித்துள்ளார்.

கோவை விமான நிலையத்தில் செய்தியாளர்களைச் சந்தித்த அவர், பருவமழை முன்னெச்சரிக்கை நடவடிக்கைகள், சட்டம்-ஒழுங்கு நிலைமை மற்றும் அரசியல் விவகாரங்கள் குறித்துப் பேசினார்.

பருவமழை முன்னெச்சரிக்கை நடவடிக்கைகள்

அமைச்சர் செங்கோட்டையன் பேசுகையில், "தென்மேற்கு பருவமழையை முன்னிட்டு மாநிலம் முழுவதும் பல்வேறு முன்னெச்சரிக்கை நடவடிக்கைகள் மேற்கொள்ளப்பட்டுள்ளன. முதலமைச்சர் தலைமையில் ஆய்வுக் கூட்டங்கள் நடத்தப்பட்டு, பேரிடர் மேலாண்மை தொடர்பான பணிகள் தீவிரமாக கண்காணிக்கப்பட்டு வருகின்றன. இந்த பருவமழையால் தமிழ்நாட்டிற்கு பெரிய அளவிலான பாதிப்புகள் ஏற்படும் வாய்ப்பு இல்லை என்பதால் பொதுமக்கள் அச்சப்பட தேவையில்லை" என்றார். மேலும், அடுத்த ஐந்து ஆண்டுகளுக்கு சிறப்பான ஆட்சியை வழங்கும் நோக்கில், அமைச்சர்கள் கூட்டத்தில் துறைவாரியான பணிகள் ஆய்வு செய்யப்பட்டுள்ளதாகவும் குறிப்பிட்டார்.

சட்டம்-ஒழுங்கு மற்றும் போதைப்பொருள் கட்டுப்பாடு

மாநிலத்தின் சட்டம்-ஒழுங்கு குறித்து எழுப்பப்பட்ட கேள்விக்கு, "கடந்த 20 நாட்களில் என்ன சட்டம்-ஒழுங்கு பிரச்சினை ஏற்பட்டுள்ளது என்பதை கூறுங்கள், அதைப் பார்ப்போம்" என்று பதிலளித்த அவர், போதைப்பொருள் நடமாட்டத்தை முழுமையாகக் கட்டுப்படுத்த அரசு தொடர்ந்து கடுமையான நடவடிக்கைகளை எடுத்து வருவதாக உறுதி அளித்தார். மேகதாது அணைத் திட்டத்தைத் தடுக்க தேவையான அனைத்து சட்டப்பூர்வ நடவடிக்கைகளையும் முதலமைச்சர் மேற்கொண்டு வருவதாகவும் கூறினார்.

பாஜக முன்னாள் மாநிலத் தலைவர் அண்ணாமலை குறித்த கேள்விக்கு, "அண்ணாமலைக்கு என்ன வேதனை உள்ளது என்பது குறித்து நாம் பொறுத்திருந்து தான் பார்க்க வேண்டும்" என்றார். கூட்டணி அரசியல் குறித்துப் பேசுகையில், "கூட்டணி அமைச்சரவை அமைக்கப்பட்டுள்ளது. நாங்கள் திறந்த மனதுடன் இருக்கிறோம், ஆனால் கூட்டணிக்கு இன்னும் எந்தப் பெயரும் வைக்கப்படவில்லை" என்று விளக்கினார்.

அமைச்சர் செந்தில் பாலாஜி தொடர்பான கேள்விக்கு, "அவர் குறித்து நான் கருத்து சொல்ல முடியாது. அவர் ஏன் தொடர்ந்து அமைச்சரவையில் இருக்க முடியவில்லை என்பதற்கு அவரே பதில் சொல்ல வேண்டும்; திமுகவின் முடிவுகளுக்கு நான் பதில் அளிக்க முடியாது" என்று சுருக்கமாக முடித்துக் கொண்டார். இறுதியாக, பத்திரிகையாளர்களின் பாதுகாப்பை உறுதி செய்வது அரசின் கடமை என்றும், அதற்கான அனைத்து நடவடிக்கைகளும் தகுந்த முறையில் மேற்கொள்ளப்படும் என்றும் அமைச்சர் செங்கோட்டையன் தெரிவித்தார்.