Chennai Air Show: மூடப்படும் சென்னை விமான நிலையம்.. பின்னணியில் இப்படி ஒரு காரணமா ? முழு தகவல் ?
Chennai Air Show 2024: சென்னை மெரினா கடற்கரையில் விமானப்படை சாகச நிகழ்ச்சி நடைபெற உள்ள நிலையில், சென்னை விமான நிலையம் இன்று ஒன்றரை மணி நேரம் மூடப்படுகிறது.
சென்னை மெரினா கடற்கரையில், வருகின்ற 6 ஆம் தேதி ஞாயிற்றுக்கிழமை நடக்க இருக்கும் ஏர் ஷோ நிகழ்ச்சிக்காக, இந்திய விமானப்படை விமானங்களின் ஒத்திகை நிகழ்ச்சி, இன்று சென்னை மெரினா கடற்கரையில் நடக்க இருப்பதை ஒட்டி, சென்னை விமான நிலையம், இன்று பகல் 1.45 மணி முதல், மாலை 3.15 மணி வரை, ஒன்றரை மணி நேரம் மூடப்படுவதால், இந்த நேரத்தில் சென்னையில் இருந்து புறப்படும் 15 விமானங்கள், சென்னையில் வந்து தரை இறங்கும் 10 விமானங்கள், மொத்தம் 25 விமானங்களின் நேரங்கள் மாற்றியமைக்கப்பட்டுள்ளன.
சாகச நிகழ்ச்சிகள்
சென்னை மெரினா கடற்கரையில், இந்திய விமானப்படை தினத்தை ஒட்டி, அக்டோபர் 6 ஆம் தேதி, ஞாயிறு அன்று காலை 11 மணியிலிருந்து, பகல் ஒரு மணி வரையில், சென்னை மெரினா கடற்கரையில் இந்திய விமானப்படை விமானங்களின் வீர சாகச நிகழ்ச்சிகள் ,ஏர்ஷோ பொதுமக்களின் பார்வைக்காக நடத்தப்பட இருப்பதால், இன்று முதல் இந்த விமானப்படை வீர சாகச நிகழ்ச்சிகளுக்கான ஒத்திகைகள் வரும் அக்டோபர் 8 ஆம் தேதி வரை, சென்னை மெரினா கடற்கரை மற்றும் தாம்பரம் விமானப்படைத்தளம் ஆகிய இடங்களில் நடக்க இருக்கிறது.
தற்காலிகமாக மூடப்படும் சென்னை விமான நிலையம்
அந்த நேரத்தில் சென்னை விமான நிலையத்தில் இருந்து, விமானங்கள் புறப்படுவது, மற்றும் தரையிறங்குவது, விமானப்படை சாகசங்கள் செய்யும் விமானங்களுக்கு இடையூறாக இருக்கும் என்று கருதப்பட்டதால், சென்னை விமான நிலையத்தில் இன்று செவ்வாய்க்கிழமை முதல் வரும் 8 ஆம் தேதி, செவ்வாய்க்கிழமை வரையில், 15 நிமிடங்களில் இருந்து 2 மணி நேரம் வரையில், விமான சேவைகள் நிறுத்தப்பட்டு, சென்னை விமான நிலையமும் தற்காலிகமாக அந்த நேரங்களில் மூடப்படுகிறது.
விமானங்களில் நேரம் மாற்றி அமைப்பு
முதல் நாளான இன்று செவ்வாய்க்கிழமை பகல் 1.45 மணி முதல், மாலை 3.15 மணி வரையில், சென்னை விமான நிலையம் மூடப்பட்டு, விமான சேவைகளின் நேரங்கள் மாற்றி அமைக்கப்பட்டுள்ளன.
இந்த நிலையில் இன்று சென்னை விமான நிலையத்தில் இருந்து பகல் 1.45 மணியிலிருந்து மாலை 3.15 மணி வரையில்,15 விமானங்கள் புறப்படுகின்றன. அதில் சிங்கப்பூர், டாக்கா, யாழ்ப்பாணம் ஆகிய 3 சர்வதேச விமானங்களும், 12 உள்நாட்டு விமானங்களும் அடங்கும். அந்த விமானங்கள் அனைத்தும் இன்று மாலை 3.20 மணிக்கு மேல், புறப்பட்டுச் செல்லும் விதத்தில், நேரங்கள் மாற்றி அமைக்கப்பட்டுள்ளன.
மாற்றி அமைக்கப்பட்ட விமானங்களில் நேரம்
அதன்படி இன்று பகல் 1.55 மணிக்கு, சென்னையில் இருந்து கோவா புறப்பட்டு செல்லும் இண்டிகோ ஏர்லைன்ஸ் விமானம் மாலை 3.20 மணிக்கும், பகல் 2.15 மணிக்கு சென்னை டெல்லி இண்டிகோ ஏர்லைன்ஸ் விமானம் மாலை 3.35 மணிக்கும், சென்னை- சிங்கப்பூர் இண்டிகோ ஏர்லைன்ஸ் விமானம் பிற்பகல் 2.25 மணிக்கு பதிலாக மாலை 3.20 மணிக்கும், சென்னை- தூத்துக்குடி விமானம், பிற்பகல் 2.20 மணிக்கு பதிலாக, மாலை 3.30 மணிக்கும், சென்னை- கோவை விமானம் பிற்பகல் 2.25 மணிக்கு பதிலாக, மாலை 3.20 மணிக்கும், சென்னை- ராஜமுந்திரி விமானம் பிற்பகல் 2.25 மணிக்கு பதிலாக, மாலை 3.25 மணிக்கும், சென்னை- சீரடி பிற்பகல் 2.30 மணிக்கு பதிலாக, மாலை 3.30 மணிக்கும், சென்னை- கொல்கத்தா விமானம் மாலை 3 மணிக்கு பதிலாக, மாலை 3.35 மணிக்கும், சென்னை- மும்பை விமானம், மாலை 3 மணிக்கு பதிலாக மாலை 3.15 மணிக்கும், சென்னை புனே விமானம் மாலை 3 மணிக்கு பதிலாக, மாலை 4 மணிக்கும் மற்றும் யாழ்ப்பாணம், டாக்கா, மதுரை, ஹைதராபாத் உள்ளிட்ட விமானங்களின் புறப்பாடு நேரங்களும் மாலை 3.30 மணிக்கு மேல் புறப்படுவதுபோல் மாற்றப்படுகிறது.
பயணிகளுக்கு அறிவுரை
அதைப்போல் இன்று பகல் 1.45 மணியிலிருந்து,மாலை 3.15 மணி வரையில், சென்னைக்கு வந்து தரையிறங்கும் விமானங்களான யாழ்ப்பாணம், கொழும்பு, அபுதாபி, டாக்கா, சீரடி, மதுரை, டெல்லி உள்ளிட்ட 10 விமானங்கள், நேரங்கள், மாலை 3.15 மணிக்கு மேல், சென்னையில் வந்து தரை இறங்குவது போல் மாற்றி அமைக்கப்பட்டுள்ளன. இதனால் சென்னை விமான நிலையத்தில் இன்று பகல் 1.45 மணி முதல், மாலை 3.15 மணி வரையிலான, ஒன்றரை மணி நேரத்தில், புறப்பாடு விமானங்கள் 15, வருகை விமானங்கள் 10, மொத்தம் 25 விமானங்களின் நேரங்கள் மாற்றியமைக்கப்பட்டுள்ளன. பயணிகள் அந்தந்த விமான நிறுவனங்களுடன் தொடர்பு கொண்டு, நேரம் மாற்றம் குறித்து உறுதி செய்து கொண்டு, தங்கள் பயணத்தை மேற்கொள்ளும்படி, இந்திய விமான நிலைய ஆணையம் பயணிகளை அறிவுறுத்தி உள்ளது.
தலைப்பு செய்திகள்
ட்ரெண்டிங் செய்திகள்
