சுகர் மட்டும் கண்ட்ரோலில் இருந்தால் போதுமா? நீரிழிவு பின்னால் ஒளிந்திருக்கும் அந்த "சைலண்ட்" ஆபத்து!

நீரிழிவு நோய்க்கும் மனநலப் பாதிப்புகளுக்கும் இடையே ஒரு நெருக்கமான தொடர்பு உள்ளது. குறிப்பாக, ஆண்களிடையே இந்த பிரச்சனை மிகவும் அமைதியாகவும், நீண்ட காலம் வெளியே தெரியாமலும் இருந்து, பின்னாளில் தீவிரமான விளைவுகளை ஏற்படுத்துகிறது.

உடல்நலம்

Source : Freepik

நீரிழிவு நோய் என்பது வெறும் உடல் ரீதியான குறைபாடு மட்டுமல்ல, இது ஒருவரின் மனநலத்திலும் பெரும் தாக்கத்தை ஏற்படுத்தக்கூடியது. மருத்துவ நிபுணர்களின் கருத்துப்படி, நீரிழிவு நோய்க்கும் மனநலப் பாதிப்புகளுக்கும் இடையே ஒரு நெருக்கமான தொடர்பு உள்ளது. குறிப்பாக, ஆண்களிடையே இந்த பிரச்சனை மிகவும் அமைதியாகவும், நீண்ட காலம் வெளியே தெரியாமலும் இருந்து, பின்னாளில் தீவிரமான விளைவுகளை ஏற்படுத்துகிறது.

நீரிழிவு நோயாளிகளுக்கு மன அழுத்தம் ஏன் ஏற்படுகிறது?

நீரிழிவு பாதிப்புள்ளவர்கள் ரத்த சர்க்கரை அளவை தினமும் கண்காணிப்பது, கட்டுப்படுத்தப்பட்ட உணவுகளை உட்கொள்வது மற்றும் தவறாமல் உடற்பயிற்சி செய்வது என ஒரு ஒழுக்கமான வாழ்க்கை முறையைப் பின்பற்ற வேண்டிய கட்டாயத்தில் உள்ளனர். இது உடல் ரீதியான சோர்வைத் தருவதோடு மட்டுமல்லாமல், பெரும் மன அழுத்தத்தையும் அளிக்கிறது. சர்வதேச ஆய்வுகளின்படி, நீரிழிவு பாதிப்புள்ளவர்களுக்கு மனச்சோர்வு (Depression) ஏற்படுவதற்கான வாய்ப்பு சாதாரணமானவர்களை விட இருமடங்காக உள்ளது. இந்தத் தொடர்ச்சியான மன அழுத்தம் உடலையும் மனதையும் ஒரே நேரத்தில் பாதித்து, நோயின் தீவிரத்தை அதிகரிக்கிறது.

ஆண்களின் மனநலப் போராட்டமும் சமூக அழுத்தமும்

ஆண்கள் மன ரீதியாகப் பாதிக்கப்பட்டாலும், அதை வெளியே சொல்வதற்குத் தயங்குகின்றனர். சமூகத்தில் தங்களை 'பலவீனமானவர்களாக' மற்றவர்கள் கருதிவிடுவார்களோ என்ற பயமும், உணர்ச்சிகளை வெளிப்படுத்தினால் தவறாகப் புரிந்துகொள்ளப்படுவோம் என்ற அச்சமும் அவர்களை மௌனமாக இருக்கச் செய்கிறது. இவ்வாறு மருத்துவ உதவி நாடுவதைத் தவிர்க்கும் பழக்கம், அவர்கள் சந்திக்கும் மனநலச் சிக்கல்களை மேலும் மோசமாக்குகிறது.

சர்க்கரை அளவும் மன அழுத்தமும்

மருத்துவர் பரிந்துரைத்த மருந்துகளைத் தவறாமல் எடுத்துக்கொள்ளாதது, முறையற்ற உணவு முறை மற்றும் உடற்பயிற்சி செய்யாதது போன்ற காரணங்களால் ரத்த சர்க்கரை அளவு கட்டுப்பாட்டில் இருப்பதில்லை. உடல் ரீதியான ஆரோக்கியம் சீர்குலைவது, தானாகவே மனச்சோர்வை அதிகப்படுத்தும் ஒரு சங்கிலித் தொடர் வினையாக மாறுகிறது. எனவே, நீரிழிவு மேலாண்மை என்பது மருந்துடன் மட்டும் நின்றுவிடாமல், மனநலத்தோடு இணைந்த ஒன்றாக இருக்க வேண்டும்.

நிபுணர்களின் அறிவுரை மற்றும் முன்னெச்சரிக்கைகள்

நீரிழிவு நோயாளிகள் கண்டிப்பாகத் தங்களுக்கு மனநலப் பரிசோதனை செய்துகொள்வது அவசியம் என எண்டோகிரைனாலஜிஸ்டுகள் மற்றும் மனநல மருத்துவர்கள் வலியுறுத்துகின்றனர். சிகிச்சை முறைகளில் கவுன்சிலிங் (Counseling) மற்றும் குடும்பத்தினரின் ஆதரவு மிக முக்கியப் பங்கு வகிக்கிறது.

முன்னெச்சரிக்கை நடவடிக்கையாக, சமச்சீரான உணவு, வழக்கமான உடற்பயிற்சி மற்றும் தியானம் ஆகியவற்றைப் பின்பற்ற வேண்டும். குறிப்பாக, போதுமான தூக்கம் மன அழுத்தத்தைச் சமன் செய்ய மிக அவசியமாகும். ரத்த சர்க்கரை அளவை முறையாகச் சரிபார்ப்பதுடன், உங்களுக்கு ஏற்படும் மன உளைச்சலை நம்பிக்கைக்குரியவர்களிடம் பகிர்ந்து கொள்ள வேண்டும். மேலும், காபி மற்றும் மது போன்றவற்றைத் தவிர்ப்பது மன அழுத்தத்தைக் குறைக்க உதவும்.

பொறுப்பு துறப்பு: இந்தத் தகவல் பொதுவான விழிப்புணர்வுக்காக மட்டுமே. இது மருத்துவ ஆலோசனையோ அல்லது சிகிச்சையோ அல்ல. உடல்நலக் குறைபாடுகள் குறித்து ஏதேனும் சந்தேகம் இருந்தால், உடனடியாக உங்கள் மருத்துவரை அணுகி ஆலோசனை பெறவும்.