India Corona Spike: ஒரே நாளில் 12 ஆயிரத்தை கடந்த தினசரி கொரோனா..! இந்தியாவில் பாதிப்பு நிலவரம் என்ன?

இந்தியாவில் கடந்த 24 மணி நேரத்தில் புதிதாக 12,193 பேருக்கு கொரோனா தொற்று பாதிப்பு பதிவு செய்யப்பட்டுள்ளது.

கொரோனா தடுப்பூசி (கோப்பு புகைப்படம்)

இந்தியாவில் கடந்த 24 மணி நேரத்தில் புதிதாக 12,193 பேருக்கு கொரோனா தொற்று பாதிப்பு பதிவு செய்யப்பட்டுள்ளது.

கொரோனா பாதிப்பு:

இந்தியாவில் புதன்கிழமை கடந்த 8 மாதங்களில் இல்லாத அளவு தினசரி கொரோனா பாதிப்பு உச்சம் அடைந்தது. 12,591 பேருக்கு கொரோனா தொற்று பாதிப்பு உறுதி செய்யப்பட்டது. ஆனால் நேற்றும் இன்றும் சற்று குறைந்துள்ளது. கடந்த 24 மணி நேரத்தில் 12,193 பேருக்கு புதிதாக கொரோனா தொற்று பாதிப்பு உறுதி செய்யப்பட்டுள்ளது. இந்தியாவில் மொத்தமாக கொரோனா தொற்று பாதிக்கப்பட்டு சிகிச்சை பெற்று வருபவர்களின் எண்ணிக்கை 67,000-ஐ கடந்து பதிவாகியுள்ளது.

இதுவரை தொற்று பாதிப்பு ஏற்பட்டு 4,42,83,021 பேர் வீடு திரும்பியுள்ளனர். மேலும் கொரோனா தொற்றால் பாதிக்கப்பட்டு சிகிச்சை பலனின்றி உயிரிழந்தவர்களின் எண்ணிக்கை 5,31,258 ல் இருந்து 5,31,300 ஆக உயர்ந்துள்ளது. தொற்றிலிருந்து மீண்டு வருபவர்களின் சதவீதம் 98.66 சதவீதமாக பதிவாகியுள்ளது. இறப்பு விகிதமும் 1.18 சதவீதமாக உள்ளது. கடந்த 24 மணிநேரத்தில் 42 பேர் இந்தியாவில் கொரோனா தொற்று ஏற்பட்டு சிகிச்சை பலனின்றி உயிரிழந்துள்ளனர்.  இந்தியாவில் கொரோனா தொற்று ஏற்பட்டு சிகிச்சை பெற்று வருபவர்களின் எண்ணிக்கை 66,170 லிருந்து 67,556 ஆக உயர்ந்துள்ளது.

கேரளாவில் அதிக பாதிப்பு:

தொடர்ந்து இந்தியாவில் அதிகபட்சமாக கேரளாவில் 18,143 பேர் தொற்றால் பாதிக்கப்பட்டுள்ளனர். அதனை தொடர்ந்து மகாராஷ்டிராவில் – 5970 பேர், தலைநகர் டெல்லியில் 6496 பேர், உத்திர பிரதேசத்தில் – 4691 பேர், தமிழ்நாடு – 3660 பேர், ஹரியானாவில் – 5491 பேர், குஜராத்தில் – 1997 பேர், ஹிமாச்சல் பிரதேசத்தில் – 1717 பேர் பாதிக்கப்பட்டுள்ளனர். இந்தியாவில் மொத்தமாக 67,556 பேர் கொரோனா தொற்றால் பாதிக்கப்பட்டு சிகிச்சை பெற்று வருகின்றனர். நேற்று ஒரே நாளில் 1,97,477 ஆர்டிபிசிஆர் மாதிரிகள் பரிசோதிக்கப்பட்டுள்ளது. கடந்த 24 மணி நேரத்தில் டெல்லியில் 8 பேர், மகாராஷ்டிராவில் 5 பேர், உத்திர பிரதேசத்தில் 3 பேர், தமிழ்நாடு 2 பேர், சத்தீஸ்கரில் 3 பேர், உத்திர பிரதேசத்தில் 3 பேர், கேரளாவில் 3 பேர் என மொத்தம் 42 பேர் சிகிச்சை பலனின்றி உயிரிழந்துள்ளனர்.

2021 ஆம் ஆண்டு கொரோனா தொற்றின் காரணமாக தினசரி பாதிப்பு 4 லட்சம் கடந்து பதிவானது. இறப்பு விகிதமும் இரண்டாம் அலையில் அதிகரித்தது. தற்போது பரவி வரும் கொரோனா வைரஸ் பெரிய அளவு பாதிப்புகள் ஏற்படுத்துவது இல்லை என மருத்துவர்கள் தெரிவிக்கின்றனர். மேலும் முதியவர்கள், இணை நோயாளிகள், நோய் எதிர்ப்பு சக்தி குறைவாக இருப்பவர்கள் அதிக கவனத்துடன் இருக்க வேண்டும் என ஐசிஎம்ஆர் தரப்பில் தெரிவிக்கப்பட்டுள்ளது. ஆனாலும் மக்கள் அனைவரும் பொது இடங்களில் முகக்கவசம் அணிய அறிவிறுத்தப்பட்டுள்ளது.