விஷ்ணு விஷால் கரியரில் புதிய சாதனை..கட்டா குஸ்தி 2 படத்தின் வசூல் நிலவரம்

Gatta Kusthi Collection : விஷ்ணு விஷால் நடித்துள்ள கட்டா குஸ்தி 2 திரைப்படத்தின் வசூல் ராட்ச்சசன் திரைப்படத்தின் மொத்த வசூலை முந்தியுள்ளது

கட்டா குஸ்தி 2 , விஷ்ணு விஷால்

Source : X

விஷ்ணு விஷால் நடித்துள்ள  கட்டா குஸ்தி 2  திரைப்படம் அவரது திரைப்பயணத்தில் புதிய வசூல் சாதனையை படைத்துள்ளது. இதுவரை அவரது அதிக வசூல் செய்த படமாக இருந்த ராட்சசன் திரைப்படத்தின் மொத்த வசூலை கட்டா குஸ்தி 2  முந்தியுள்ளதாக பாக்ஸ் ஆபிஸ் தகவல்கள் வெளியாகியுள்ளன. 

தொடர்ச்சியாக வெற்றிப்படங்களை கொடுத்து வந்தாலும் தமிழ் சினிமாவில் பெரியளவில் பேசப்படாத நடிகர் விஷ்ணு விஷால். வெண்ணிலா கபடிக் குழு , நீர்ப்பறவை என தனது கரியரின் தொடக்கத்திலேயே தனித்துவமான படங்களை கொடுத்தவர். 2018 ஆம் ஆண்டு வெளியான ராட்ச்சசன் திரைப்படம் விஷ்ணு விஷாலின் கரியரில் மிகப்பெரிய வெற்றிப்படமாக அமைந்தது. 

ராட்ச்சசன் படத்தின் வெற்றியைத் தொடர்ந்து அதே மாதிரியான ஒரு த்ரில்லர் படத்தை எதிர்பார்த்து காத்திருந்தனர். ஆனால் விஷ்ணு விஷால் நடிப்பில் கடந்த ஆண்டு வெளியான ஆர்யன் திரைப்படம் எதிர்பார்த்த வெற்றியை பெறவில்லை. அதற்கு முற்றிலும் மாறாக முழுக்க முழுக்க நகைச்சுவை திரைப்படமாக உருவாகி சமீபத்தில் வெளியாகியுள்ள கட்டா குஸ்தி 2 திரைப்படம் விஷ்ணு விஷால் கரியரில் புதிய வசூல் சாதனை படைத்துள்ளது. 

ராட்ச்சசன் வசூலை முந்திய கட்டா குஸ்தி 2

ராட்ச்சசன் திரைப்படம் உலகளவில் சுமார் ₹22 முதல் ₹25 கோடி வரை வசூலித்ததாக கூறப்படும் இந்த படம், பல ஆண்டுகளாக விஷ்ணு விஷாலின் அதிக வசூல் செய்த திரைப்படமாக இருந்து வந்தது. இந்த நிலையில், சமீபத்தில் வெளியான கட்டா குஸ்தி 2 திரைப்படம் உலகளவில் ₹26 கோடிக்கும் அதிகமான வசூலை ஈட்டியுள்ளதாக தகவல்கள் வெளியாகியுள்ளன. இதன் மூலம், விஷ்ணு விஷாலின் கேரியரில் அதிக வசூல் செய்த திரைப்படம் என்ற சாதனையை ராட்சசன் படத்திடம் இருந்து கட்டா குஸ்தி 2 கைப்பற்றியுள்ளது.

படம் வெளியாவதற்கு முன்பும், வெளியான பிறகும் சமூக வலைதளங்களில் சில எதிர்மறை பிரசாரங்கள் நடைபெற்றன. இருப்பினும், அவை வசூலில் எந்த தாக்கத்தையும் ஏற்படுத்தவில்லை. முதல் வார இறுதியைத் தொடர்ந்து கூட திரையரங்குகளில் படம் நிலையான வரவேற்பைப் பெற்றதால், வசூல் தொடர்ந்து உயர்ந்தது.

செல்லா அய்யாவு இயக்கத்தில் உருவாகியுள்ள கட்டா குஸ்தி 2 திரைப்படத்தில் விஷ்ணு விஷால் மற்றும் ஐஸ்வர்யா லக்‌ஷ்மி முக்கிய கதாபாத்திரத்தில் நடித்துள்ளார்கள் ரம்யா கிருஷ்ணன், யோகி பாபு, கருணாஸ், முனிஸ்காந்த், காளி வெங்கட், கருணாகரன், ஜாரா, மோக்ஷா மற்றும் பலரும் படத்தில் நடித்துள்ளார்கள்.