SV Ramanan Passed Away: அனிருத் தாத்தா காலமானார்... இயக்குனர் உள்ளிட்ட பன்முகம் கொண்டவர்!

பிரபல இயக்குநரும் அனிருத்தின் தாத்தாவுமான எஸ்.வி.ரமணன் இன்று காலமானார்.

எஸ்.வி.ரமணன்

பிரபல இயக்குநரும் அனிருத்தின் தாத்தாவுமான எஸ்.வி.ரமணன் இன்று காலமானார். 

இயக்குநரும், ரேடியோவில் விளம்பர படங்களுக்கு குரல் கொடுத்து பிரபலமானவருமான எஸ்.வி.ரமணன் இன்று தனது ஆர்.ஏ.புரத்தில் உள்ள வீட்டில் காலமானார். அவரது இறுதி சடங்கு இன்று மாலை நடைபெற இருக்கிறது. பழமபெரும் இயக்குநரான கே. சுப்ரமணியத்தின் மகனான இவர் தியேட்டர் ஆர்ட்டிஸ்டாக தனது திரைப்பயணத்தை தொடங்கினார். பல்வேறு மேடைகளில் தனது நடிப்பு திறமையை வெளிப்படுத்திய அவர், தூர்தர்ஷனுக்காக பல்வேறு சீரியல்களையும் இயக்கியுள்ளார். 

டாக்குமெண்ட்ரி ஃபிலிம் மேக்கராகவும் அறியப்பட்ட எஸ்.வி.ரமணனுக்கு திருமணமாகி இரண்டு பெண் குழந்தைகள் உள்ளது. தனது பலதரப்பட்ட திறமைகளால் அறியப்பட்ட எஸ்.வி.ரமணன், ஆல் இந்தியா ரேடியோவில் ஒலிப்பரப்பட்ட விளம்பரங்களுக்கு குரல் கொடுத்தார். அவரது பாரிடோன் குரல் இன்று வரை பிரபலமாக உள்ளது. இவரது தங்கையான டாக்டர் பத்ம சுப்ரமணியம் பிரபல பரதநாட்டிய கலைஞர்.

பிரபல இசைக்கலைஞர் அபஸ்வரம் ராம்ஜி மற்றும் டாக்குமெண்ட்ரி ஃபிலிம் மேக்கர் டாக்டர் கிருஷ்ணமூர்த்தி ஆகிய இருவரும் இவரது சகோதர்கள். தற்போது தமிழ் சினிமாவின் முன்னணி இசையமைப்பாளர்களில் ஒருவராக வலம்வரும் இசையமைப்பாளர் அனிருத் இவரது பேரன் என்பது குறிப்பிடத்தக்கது. 

தமிழ் சினிமாவின் சூப்பர் ஸ்டாராக ரசிகர்களால் அழைக்கப்படும் ரஜினிகாந்த் இவரது டாக்குமெண்ட்ரி படங்களில் வாய்ஸ் ஓவர் ஆர்ட்டிஸ்டாக பணியாற்றி இருக்கிறார். அந்த வகையில் ஆன்மீகம், கலை, கட்டிடக்கலை, தேசியவாதம் ஆகிய பிரிவுகளில் இவர் இயக்கிய டாக்குமெண்ட்ரிகள் பெரிய அளவில் பாராட்டை பெற்றிருக்கின்றன. ரமணன் இறப்புக்கு திரையுலக பிரபலங்கள், தொலைக்காட்சியை சார்ந்த பிரபலங்கள் என பலரும்  இரங்கல் தெரிவித்து வருகின்றனர்.