South Indian Artists: வீண் வதந்திகளைப் பரப்ப வேண்டாம்... ரெட் கார்டு விவகாரத்தில் தென்னிந்திய நடிகர் சங்கம் அறிக்கை

”ஒரு தரப்பு வாதங்களை மட்டுமே மையமாக வைத்து செய்திகள் பரவுவது வருத்தம் அளிக்கிறது. இரு தரப்பிலும் பேச்சுவார்த்தை மிக சுமூகமாக நடைபெற்று வருகிறது” என தென்னிந்திய

தென்னிந்திய நடிகர்கள், தயாரிப்பாளர்கள்

தமிழ் சினிமாவைச் சேர்ந்த 19 நடிகர், நடிகைகளுக்கு ரெட் கார்டு வழங்கப்பட உள்ளதாக கடந்த சில நாள்களாக தகவல்கள் வெளியாகி வந்தன. இந்நிலையில்,  தென்னிந்திய நடிகர் சங்கம் மற்றும் தமிழ் திரைப்படத் தயாரிப்பாளர்  சங்கங்களுக்கு இடையேயான நல்லுறவை சீர்குலைக்கும் விதத்தில் வீண் வதந்திகளை பரப்ப வேண்டாம் என, தென்னிந்திய நடிகர் சங்கம் கண்டனம் தெரிவித்துள்ளது. 

இது குறித்து தென்னிந்திய நடிகர் சங்கம் வெளியிட்டுள்ள அறிக்கையில் தெரிவித்திருப்பதாவது:

“தென்னிந்திய நடிகர் சங்கத்துக்கும் தமிழ் திரைப்படத் தயாரிப்பாளர்கள் சங்கத்துக்கும் இடையே நீண்டகாலமாக நல்லுறவு நிலவி வருகிறது. நடிகர்கள் நலனை, உரிமைகளை பாதுகாப்பது போலவே தயாரிப்பாளர்கள் நலனை கருத்தில் கொண்டே தென்னிந்திய நடிகர் சங்கம் செயல்பட்டு வந்து கொண்டிருக்கிறது.

கடந்த சில நாட்களாக இரு சங்கங்கள் இடையே மோதல் என்ற ரீதியில் செய்திகள் பரப்பப்படுகின்றன.  தமிழ் திரைத்துறையின் முக்கிய சங்கங்களான தென்னிந்திய நடிகர் சங்கம் மற்றும் தமிழ்த் திரைப்படத் தயாரிப்பாளர்கள் சங்கங்களுக்குள் இடையே எந்த மோதலும் இல்லை.

நடிகர்களின் கால்ஷீட், புதிய ஒப்பந்தங்கள் குறித்து தயாரிப்பாளர்கள் தரப்பில் இருந்து சில புகார்கள் வந்தன. அதேபோல் நடிகர்கள் தரப்பிலும் சில பிரச்சினைகளைக் கூறியுள்ளனர். இவை வழக்கமாக இரு தரப்பிலும் எழக் கூடிய பேசினால் தீர்ந்து விடக் கூடிய பிரச்சினைகள்தான்.

ஆனால் ஒரு தரப்பு வாதங்களை மட்டுமே மையமாக வைத்து செய்திகள் பரவுவது வருத்தம் அளிக்கிறது. இரு தரப்பிலும் பேச்சுவார்த்தை மிக சுமூகமாக நடைபெற்று வருகிறது. அனைத்து பிரச்சினைகளும் விரைவில் களையப்படும். இதை விடுத்து இரு சங்கங்களிடையேயான நல்லுறவை சீர்குலைக்கும் விதத்தில் வீண் வதந்திகளை பரப்புவோருக்கு எங்கள் கண்டனத்தை பதிவு செய்கிறோம்” எனத் தெரிவிக்கப்பட்டுள்ளது.

முன்னதாக சம்பளம் பெற்றுக் கொண்டு கால்ஷீட் வழங்காத நடிகர்களுக்கு இனி ஒத்துழைப்பு வழங்காமல், ரெட் கார்டு வழங்க தமிழ் திரைப்பட தயாரிப்பாளர்கள் சங்கம் முடிவெடுத்ததாகத் தகவல்கள் பரவின.

முதலில் நடிகர்கள் சிம்பு,  எஸ்.ஜே. சூர்யா, அதர்வா, யோகி பாபு, விஷால் ஆகிய 5 நடிகர்களுக்கு ரெட் கார்டு வழங்கப்போவதாகத் தகவல்கள் வெளியான நிலையில், நடிகர்கள் சங்கத்திடம் இது குறித்து  விளக்கம் கேட்கப்பட உள்ளதாகவும் தகவல்கள் வெளியாகின.

தொடர்ந்து, நேற்று முன் தினம், தனுஷ், ராய் லட்சுமி, அமலா பால் உள்ளிட்ட 14 நடிகர்கள் மீது புகார் அளிக்கப்பட்டுள்ளதாகத் தகவல் வெளியாகின. மேலும் இது குறித்து தமிழ்நாடு திரைப்படத் தயாரிப்பாளர்கள் சங்கத்தின் பொதுக்குழு கூட்டத்தில் முக்கிய முடிவுகள் எடுக்கப்பட்டதாகவும் தகவல் வெளியானது.

இத்தகவல்கள் தமிழ் சினிமா வட்டாரத்தில் கடந்த சில நாள்களாக பரபரப்பை ஏற்படுத்தி வந்த நிலையில் தற்போது தென்னிந்திய நடிகர் சங்கம் சார்பில் இந்த அறிக்கை பகிரப்பட்டுள்ளது.