ஹேட்டர்ஸ்கு சவால்...மீண்டும் கமர்சியல் ரூட்டிற்கு திரும்பிய சிவகார்த்திகேயன்..மிரட்டும் சேயோன் ப்ரோமோ

ராஜ்கமல் ஃபிலிம்ஸ் தயாரிப்பில் சிவகார்த்திகேயன் நடிக்கும் சேயோன் திரைப்படத்தின் ப்ரோமோ வீடியோ வெளியாகி ரசிகர்களிடம் கவனமீர்த்துள்ளது

சேயோன் , சிவகார்த்திகேயன்

Source : X

 

 

ராஜ்கமல் ஃபிலிம்ஸ் இண்டர்நேசனல் மற்றும் டர்மரிக் மீடியா இணைந்து தயாரிக்க, சிவகார்த்திகேயன் நடிப்பில், சிவகுமார் முருகேசன் இயக்கத்தில் உருவாகும் புதிய திரைப்படம் "சேயோன்". துடிப்புமிக்க அதிரடியான புதிய கதாபாத்திரத்தில் சிவகார்த்திகேயன் தோன்றும் இந்தப் படம் ஒரு கிராமியப் பின்னணியில் மிகச்சிறந்த பொழுதுபோக்குச் சித்திரமாக மலரவிருக்கிறது. 

நமது மண் சார்ந்த உணர்வுகளுடன் அதிரடி காட்சிகள், அட்டகாசமான பாடல்கள் என குடும்பத்தின் அனைத்து உறுப்பினர்களும் ரசிக்கும்படியான ஒரு முழுமையான ‘கமர்ஷியல் எண்டர்டெயினராக’, 2026-ஆம் ஆண்டின் மிகப்பெரிய குடும்பக் கொண்டாட்டமாக "சேயோன்" அமையும்.

சேயோன் ப்ரோமோ

அனைத்து தரப்பின் பாராட்டுதலோடு, வசூல் ரீதியாகவும் பெரும் சாதனை படைத்த 'அமரன்' படத்தின் பிரம்மாண்ட வெற்றிக்குப் பிறகு, சிவகார்த்திகேயன் மீண்டும் ராஜ்கமல் ஃபிலிம்ஸ் இண்டர்நேசனல் நிறுவனத்துடன் இணைவது ஒரு முக்கியமான மைல்கல்லாகப் பார்க்கப்படுகிறது. அனுபவமும் இளமையும் கைகோர்க்கும் இந்த வெற்றிக் கூட்டணி மாநில மொழி எல்லைகளைக் கடந்து புதிய உயரங்களை எட்டும் என்பதில் ஐயமில்லை. கமல்ஹாசன் மற்றும் ஆர். மகேந்திரன் தயாரிப்பில் உருவாகும் சேயோன், வலிமையான கதைக்களத்தையும் ஈர்க்கக்கூடிய திரைக்காட்சிகளையும் ஒன்றிணைக்கிறது. விரைவில் வெளியாகவிருக்கும் ‘தாய்க்கிழவி’ படத்தை இயக்கிய இயக்குனர் சிவகுமார் முருகேசனின் இரண்டாவது படம் இது.  முதன்முறையாக ராஜ்கமலுடனும், சிவகார்த்திகேயனுடன் இசையமைப்பாளர் சந்தோஷ் நாராயணன் இணைந்திருப்பது இத்திரைப்படத்தின் பாடல்கள் குறித்த பெரும் எதிர்பார்ப்பை ஏற்படுத்தியுள்ளது.  ராஜ்கமல் ஃபிலிம்ஸ் இண்டர்நேசனல் நிறுவனத்தின் பாரம்பரியம் மற்றும் டர்மரிக் மீடியாவின் நவீனத்துவப் பாய்ச்சல் ஆகியவற்றுடன் உருவாகும் "சேயோன்" 2026-ஆம் ஆண்டின் மிகவும் எதிர்பார்க்கப்படும் திரைப்படங்களில் ஒன்றாகத் திகழும். இப்படத்தின் இதர நடிகர்கள், தொழில்நுட்பக் கலைஞர்கள் மற்றும் வெளியாகும் தேதி குறித்த கூடுதல் தகவல்கள் விரைவில் அறிவிக்கப்படும்.

மீண்டும் கமர்சியல் பாதைக்கு திரும்பிய சிவகார்த்திகேயன்

தனது கரியரின் தொடக்கத்தில் சிவகார்த்திகேயன் பெரும்பாலும் கிராமத்து கதைக்களங்களையே தேர்வு செய்து நடித்து வந்தார். இடைபட்ட காலத்தில் வேலைக்காரன் , ஹீரோ , என பல்வேறு மாறுபட்ட கதைகளில் நடித்தார். ஆனால் இந்த படங்கள் அவருக்கு கமர்சியல் ரீதியாக கைகொடுக்கவில்லை. கடந்த ஆண்டு வெளியான மாவீரன் , இந்த ஆண்டு வெளியான பராசக்தி ஆகிய படங்களும் கமர்சியலாக பெரிதாக வர்க் அவுட் ஆகவில்லை. இதனால் மறுபடியும் தனது சொந்த கதைக்களத்திற்கு திரும்பியுள்ளார் எஸ்.கே. தற்போது வெளியாகியுள்ள சேயோன் பட ப்ரோமோவும் அதற்கேற்ற விதமாக அமைந்துள்ளது. பல வருடங்களுக்கு பின் சிவகார்த்திகேயனை மீண்டும் கிராமத்து கதாபாத்திரத்தில் பார்க்க ரசிகர்கள் ஆவலாக காத்திருக்கிறார்கள்