அண்ணாமலை ரீமேக் செய்யக்கூடாது...சிவகார்த்திகேயனை கண்டித்த ரஜினி மக்கள் தொடர்பாளர் பதிவு நீக்கம்
சிவகார்த்திகேயன் ரஜினிகாந்தின் அண்ணாமலை படத்தை ரீமேக் செய்ய விருப்பம் தெரிவித்த நிலையில், ரஜினியின் மக்கள் தொடர்பாளர் ரியாஸ் கே. அகமத் தெரிவித்த எதிர்ப்புக் கவனம் பெற்றுள்ளது.
நடிகர் சிவகார்த்திகேயன் இதுவரை தனது திரைப்பயணத்தில் பிற நடிகர்களின் வெற்றிப் படங்களை ரீமேக் செய்து நடித்ததில்லை. இந்நிலையில், ரஜினிகாந்த் நடித்த ‘அண்ணாமலை’ படத்தை ரீமேக் செய்ய விருப்பம் இருப்பதாக சிவகார்த்திகேயன் பேசியது தற்போது கவனம் பெற்றுள்ளது.
அண்ணாமை ரீமேக்கில் நடிக்க சிவகார்த்திகேயன் ஆசை
சமீபத்தில் நடைபெற்ற நிகழ்ச்சி ஒன்றில் பங்கேற்ற சிவகார்த்திகேயனிடம், இதுவரை எந்தப் படத்தையும் ரீமேக் செய்து நடிக்கவில்லையே என்றும், அப்படி ஒரு வாய்ப்பு கிடைத்தால் எந்தப் படத்தை தேர்வு செய்வீர்கள் என்றும் கேள்வி எழுப்பப்பட்டது.
அதற்கு பதிலளித்த சிவகார்த்திகேயன், பொதுவாக மற்ற நடிகர்களின் படங்களை ரீமேக் செய்வதில் தனக்கு ஆர்வம் இல்லை என்று தெரிவித்தார். அதேநேரம், தனக்கு ஏற்றதாக ஒரு படத்தை தேர்வு செய்ய வேண்டுமென்றால் ரஜினிகாந்த் நடித்த ‘அண்ணாமலை’ படத்தை ரீமேக் செய்ய விரும்புவதாக கூறினார்.
மேலும், அந்தப் படத்தில் இடம்பெற்றுள்ள “அசோக், இந்த நாளை உன் காலண்டரில் குறித்து வைத்துக்கொள்” என்ற வசனம் தனக்கு மிகவும் பிடிக்கும் என்றும் சிவகார்த்திகேயன் குறிப்பிட்டார். ‘அண்ணாமலை’ படத்தின் உரிமையை வாங்கி, ரஜினிகாந்தின் ஆசீர்வாதத்துடன் படத்தை உருவாக்கலாம் என்றும் அவர் நகைச்சுவையாக பேசியிருந்தார்.
ரஜினி மக்கள் தொடர்பாளர் எதிர்ப்பு
இதனிடையே சிவகார்த்திகேயனின் இந்தப் பேச்சுக்கு ரஜினிகாந்தின் மக்கள் தொடர்பாளர் ரியாஸ் கே. அகமத் சமூக வலைதளத்தில் எதிர்ப்பு தெரிவித்துள்ளார். ‘அண்ணாமலை’ போன்ற கல்ட் கிளாசிக் படங்களை ரீமேக் செய்து அதன் தன்மையை கெடுக்கக் கூடாது என்றும், இதுபோன்ற படங்களை பார்த்து ரசிப்பதுடன் அவற்றை பாதுகாப்பதே சிறந்தது என்றும் அவர் தெரிவித்துள்ளார்.
பதிவு நீக்கம்
ரியாஸ் கே. அகமத்தின் இந்தக் கருத்து சமூக வலைதளங்களில் விவாதத்தை ஏற்படுத்தியுள்ளது. அதேவேளையில், சிவகார்த்திகேயன் தனது பேச்சை நகைச்சுவையாகவே குறிப்பிட்டதாகவும், அதற்கு இவ்வளவு கடுமையான எதிர்ப்பு தேவையில்லை என்றும் சில ரசிகர்கள் கருத்து தெரிவித்து வருகின்றனர். ரஜினியின் மக்கள் தொடர்பாளரின் இந்த பதிவு சமூக வலைதளத்தில் வைரலான நிலையில் இந்த பதிவை அவர் தனது எக்ஸ் பக்கத்தில் இருந்து நீக்கியுள்ளார்
தலைப்பு செய்திகள்
ட்ரெண்டிங் செய்திகள்
