"புதுசா வந்திருக்குற குழந்தையையும் சேத்து காப்பாத்துவேன்.." : இமான் தந்தை மீது குற்றச்சாட்டு வைக்கிறாரா இமானின் முன்னாள் மனைவி?

டி.இமானின் திருமணத்திற்குப் பிறகு, அவரது முன்னாள் மனைவி மோனிகா ரிச்சார்டின் பெயரில் சமூக வலைத்தளங்களில் வாழ்த்து தெரிவித்தும், அவரது தந்தை மீது புகார் கூறியும் பதிவு ஒன்று வெளியாகியுள்ளது.

இமான் திருமண புகைப்படம்

பிரபல திரைப்பட இசையமைப்பாளர் டி.இமான் சமீபத்தில் அமலி உபாலித் என்பவரை மறுமணம் செய்து கொண்டார். அமலி உபாலித் மறைந்த திரைப்படக் கலை இயக்குநர் உபாலித்தின் மகள். கடந்த மே 15 அன்று நடைபெற்ற இந்தத் திருமணம் குறித்து தனது சமூக வலைத்தளப் பக்கங்களிலும் இசையமைப்பாளர் டி.இமான் தகவல் வெளியிட்டிருந்தார். டி.இமானின் திருமணத்திற்குப் பிறகு, அவரது முன்னாள் மனைவி மோனிகா ரிச்சார்டின் பெயரில் சமூக வலைத்தளங்களில் டி.இமானின் திருமணத்திற்கு வாழ்த்து தெரிவித்தும், அவரது தந்தை மீது புகார் கூறியும் பதிவு ஒன்று வெளியாகியுள்ளது. 

அந்தப் பதிவில், `டியர் டி.இமான், உங்கள் இரண்டாவது திருமணத்திற்கு வாழ்த்துகள். உங்களோடு 12 ஆண்டுகள் வாழ்ந்தவரை உடனே மாற்றிக் கொள்ள உங்களால் முடிந்திருக்கிறது. உங்களைப் போன்ற ஒரு நபருக்காக எனது காலத்தை வீணடித்து முட்டாளாகியுள்ளேன் என நினைக்கிறேன். நான் இதற்காக வருந்துகிறேன். கடந்த 2 ஆண்டுகளாக உங்கள் குழந்தைகளைப் பார்க்கவோ, அவர்கள் குறித்து கவனம் செலுத்தவோ முடியாத உங்களால் அவர்களுக்கும் மாற்று கண்டுபிடிக்க முடிந்திருக்கிறதா? என்ன நடந்தாலும், உங்கள் தந்தையிடம் இருந்து எனது குழந்தைகளை நான் பாதுகாப்பேன். தேவைப்பட்டால் புதிதாக வந்திருக்கும் குழந்தையையும் பாதுகாப்பேன்’ எனக் குறிப்பிடப்பட்டுள்ளது. 

Dear @immancomposer, happy married life. #SingleMomstrong #TamilCinema #Indiaglitz #DImman #vikatan #tamilmovies #tamilnews pic.twitter.com/xATB1eJH8n

— Monicka Richard (@MonickaRichard) May 15, 2022

 

இது ஒருபக்கம் இருக்க, இசையமைப்பாளர் டி.இமான் தனது மறுமணம் குறித்தும், அமலி உபாலித்தின் மகளைத் தன் மகளாக ஏற்றுக் கொண்டிருப்பது குறித்து நெகிழ்ச்சியான பதிவு ஒன்றை வெளியிட்டுள்ளார். 

`அமலி உபால்துடனான எனது மறுமணம் குறித்த தகவலைப் பகிர்வதில் மகிழ்கிறேன். எனது தந்தை டேவிட் கிருபாகர தாஸ் என் கடின காலங்களில் எனக்கு தூணாக இருந்ததனால் அவருக்கு என்றும் கடமைப்பட்டிருக்கிறேன். கடந்த சில ஆண்டுகளாக நானும், எனது குடும்பத்தினரும் எதிர்கொண்ட சவால்களுக்கு மருந்தாக இந்தத் திருமணம் இருக்கிறது. மறைந்த எனது தாய் மஞ்சுளா டேவிட்டிடன் இருந்து வந்த ஆசிர்வாதமாக இதனைக் கருதுகிறேன். அமலி போன்ற சிறந்த நபரை எனக்கு காட்டிய எனது குடும்ப உறுப்பினர்களுக்கும் நண்பர்களுக்கும் நன்றி கூற விரும்புகிறேன். அமலியின் மகள் நேத்ரா இனி எனது மூன்றாவது மகளாக இருப்பார். நேத்ராவின் தந்தையாக இருப்பது எனக்கு பெருமகிழ்ச்சியை அளிக்கிறது. என் மகள்கள் வெரோனிகா, ப்ளேசிக்கா ஆகியோர என் திருமண நாளில் மிஸ் செய்கிறேன். முழு அன்புடன், என் மகள்கள் ஒருநாள் என் வீட்டுக்கு வருவார்கள் என நம்புகிறேன். அப்போது நான், அமலி, நேத்ரா மற்றும் எனது உறவினர்கள் அனைவருமே என் மகள்களை வரவேற்க காத்திருக்கிறோம். அமலியின் குடும்பத்தினரின் தீராத அன்புக்கு நன்றி. என் இசை ரசிகர்கள் கடந்த காலங்களில் எனக்கு ஆதரவாக இருந்ததற்கும் நன்றி!’ என டி.இமான் தனது ஃபேஸ்புக் பதிவில் தெரிவித்துள்ளார். 

Posted by D Imman on Tuesday, 17 May 2022

கடந்த 2008ஆம் ஆண்டு, கணினி பொறியியலாளர் மோனிகாவைத் திருமணம் செய்துகொண்டார் டி.இமான். இருவருக்கும் வெரோனிகா டோரதி இமான், ப்ளேசிக்கா கேதி இமான் என்ற இரண்டு மகள்கள் உண்டு. கடந்த ஆண்டு டி.இமானும், மோனிகாவும் இருதரப்பு சம்மதத்துடன் பிரிந்தனர் என்பது குறிப்பிடத்தக்கது.