’8 நிமிடம் மட்டுமே நடித்த ஜோதிகாவிற்கு விருதா?’ மாநில அரசு விருதுகள் மீது கடும் விமர்சனம்..!

தமிழ்நாடு அரசு மாநில விருதுகள் அறிவிக்கப்பட்டுள்ள நிலையில் விருதுக்கு தகுதியான பல கலைஞர்கள் புறக்கணிக்கப்பட்டுள்ளதாக ரசிகர்கள் விமர்சனம் தெரிவித்துள்ளார்கள்

தமிழ்நாடு மாநில திரைப்பட விருதுகள்

Source : X

தமிழ்நாடு அரசின் திரைப்பட விருதுகளின்  அறிவிப்பு வெளியானது  முதல் ரசிகர்கள் மற்றும் திரைத்துறையைச் சேர்ந்த கலைஞர்கள் பலர், பரிந்துரைக் குழுவின் தேர்வுகளின்  மேல் அதிருப்தியை வெளிப்படுத்தி வருகிறார்கள். ரிலீஸ் ஆகாத படத்திற்கு 3 விருதுகள் வழங்கப்பட்டிருப்பதாகவும் , பல தகுதியான கலைஞர்கள் புறக்கணிக்கப்பட்டு  அரசியல் சார்பின் அடிப்படையில் சிலருக்கு விருதுகள் வழங்கப்பட்டிருப்பதையும் சமூக வலைதளங்களில் ரசிகர்கள் சுட்டிகாட்டியுள்ளார்கள்.

2016 முதல் 2022 ஆம் ஆண்டில் வெளியான திரைப்படங்களுக்கான தமிழ்நாடு மாநில விருதுகள் கடந்த ஜனவரி 29 ஆம் தேதி அறிவிக்கப்பட்டன. பிப்ரவரி 13ம் தேதி சென்னை கலைவாணர் அரங்கில் விருது வழங்கும் விழா நடைபெறும் என்றும்  துணை முதலமைச்சர் உதயநிதி ஸ்டாலின் வழங்குவார் என்று தெரிவிக்கப்பட்டுள்ளது. விருது வென்ற கலைஞர்கள் மாநில திரைப்பட குழு மற்றும் தமிழ்நாடு அரசுக்கு தங்களது நன்றியை தெரிவித்து வந்தாலும் பல கலைஞர்கள் தங்களது ஏமாற்றத்தையும் வெளிப்படுத்தி வருகிறார்கள். 

அந்த வகையில் திரைப்பட இயக்குநர் பா ரஞ்சித் , கோபி நயினார் , நடிகர் தினேஷ் , கைதி படத்தில் குழந்தை நட்சத்திரமாக நடித்த மோனிகா , சின்னத்திரை நடிகை லக்‌ஷ்மி உள்ளிட்ட பலர் தங்களுக்கு விருது கிடைக்காதது குறித்த அதிருப்தியை பகிர்ந்துள்ளார்கள். இன்னொரு பக்கம் சமூக வலைதளங்களில் ரசிகர்கள் விருதுக்குழுவின் அலட்சியமான சில முடிவுகளையும் சுட்டிகாட்டியுள்ளார்கள். ரிலீஸே ஆகாத சண்டக்காரி என்கிற படத்திற்கு மூன்று விருதுகள் வழங்கப்பட்டிருப்பது பெரியளவில் பேசுபொருளாகியுள்ளது. இன்னொரு பக்கம்  செக்கச் சிவந்த வானம் படத்திற்காக ஜோதிகாவுக்கு சிறந்த நடிகைக்கான விருது வழங்கப்பட்டது குறித்து ரசிகர்கள் கேள்வி எழுப்பியுள்ளார்கள் 

8 நிமிடங்கள் நடித்த ஜோதிகாவுக்கு விருதா ?

கடந்த 2018 ஆம் ஆண்டுக்கான சிறந்த நடிகைக்கான மாநில விருது நடிகை ஜோதிகாவுக்கு அறிவிக்கப்பட்டுள்ளது. சிறந்த நடிகைக்கான பிரிவில் இந்த விருது அவருக்கு அறிவிக்கப்பட்டுள்ளது. ஆனால் இந்த படத்தில் ஜோதிகா மொத்தமே 8 நிமிடங்களுக்கு மட்டுமே வந்து போகிறார் அவருக்கு சிறந்த நடிகை விருது அறிவித்திருப்பதை ஏற்றுக்கொள்ள முடியவில்லை  என சமூக வலைதளத்தில் நெட்டிசன்கள் பதிவிட்டு வருகிறார்கள். 

போஸ் வெங்கட் 

அதே போல் சிறந்த குணச்சித்திர நடிகருக்காக மொத்தம் மூன்று விருதுகள் நடிகர் போஸ் வெங்கட்டிற்கு அறிவிக்கப்பட்டுள்ளது. 2017 ஆம் ஆண்டு கவன் , தீரன் அதிகாரம் ஒன்று ஆகிய படங்களுக்கும் 2022 ஆம் ஆண்டு  டாணாக்காரன் படத்திற்கு இந்த விருதுகள் அறிவிக்கப்பட்டுள்ளன. ஆனால் டாணாக்காரன் படத்தில் போஸ் வெங்கட் நடித்த கதாபாத்திரத்தை காட்டிலும் எம்.எஸ் பாஸ்கர் மற்றும் லால் நடித்த கதாபாத்திரங்களே மக்களால் அதிகம் பேசப்பட்டன. அவர்களை புறக்கணித்துவிட்டு ஒரு சிறிய கதாபாத்திரத்தில் வரும் போஸ் வெங்கட்டிற்கு விருது அறிவிக்கப்பட்டிருப்பதையும் ரசிகர்கள்  சுட்டிகாட்டியுள்ளார்கள் 

சிவகார்த்திகேயன் மகளுக்கு சிறந்த பின்னணி பாடகி விருது 

2018 ஆம் ஆண்டு சிவகார்த்திகேயன் தயாரிப்பில் கனா திரைப்படம் வெளியானது. இந்த படத்தில் சிவகார்த்திகேயனின் மகள் ஆராதனா 'வாயாடி பெத்த புள்ள' பாடலை பாடியிருந்தார். இந்த பாடலுக்காக சிறந்த பெண் பின்னணி பாடகி விருது அவருக்கு அறிவிக்கப்பட்டிருப்பதும் விமர்சனத்திற்கு உள்ளாகி வருகிறது. a