Sundar C: மாளவிகாவால் எனக்கும் குஷ்புவுக்கும் இடையே வந்த சண்டை.. மனம் திறந்த இயக்குநர் சுந்தர்.சி!

Sundar C: அஜித் - சுந்தர்.சி காம்போவில் வெளியான உன்னைத் தேடி படத்தின் மூலம் தான் ஸ்வேதா கொன்னூர் மேனன் எனும் நடிகை மாளவிகாவை அவரது 19 வயதில் சுந்தர்.சி அறிமுகப்படுத்தினார்.

மாளவிகா, சுந்தர்.சி - குஷ்பு

இயக்குநர் சுந்தர்.சியின் பிரபல பேய் பட சீரிஸான அரண்மனை திரைப்படத்தின் 4ஆம் பாகம் இன்று வெளியாகி பாசிட்டிவ் விமர்சனங்களைப் பெற்று வருகிறது.

அஜித் - சுந்தர். சி இணைந்த படம்

தமிழ் சினிமாவில் சுமார் 30 ஆண்டுகளுக்கும் மேலாக வெற்றிகரமான இயக்குநர், நடிகர் என வலம் வரும் சுந்தர்.சி தன் வெற்றி, தோல்வி, திரையுலக அனுபவங்கள், நடிகர், நடிகைகள் குறித்து பகிர்ந்துகொண்டு வருகிறார். அந்த வகையில் நடிகை ஸ்வேதா கொன்னூர் மேனன் எனும் மாளவிகாவை அறிமுகப்படுத்தியது குறித்து தனியார் ஊடகத்துக்கு அளித்த பேட்டியில் மனம் திறந்து பேசியுள்ள சுந்தர். சி, அவரை தமிழில் அறிமுகப்படுத்தும்போது மாளவிகா எனும் பெயர் சூட்டியது பற்றிய சுவாரஸ்யக் கதையையும் கூறியுள்ளார்.

கடந்த 1999ஆம் ஆண்டு அஜித் - சுந்தர்.சி காம்போவில் வெளியான உன்னைத் தேடி படத்தின் மூலம் தான் ஸ்வேதா கொன்னூர் மேனன் எனும் நடிகை மாளவிகாவை அவரது 19 வயதில் சுந்தர்.சி அறிமுகப்படுத்தினார். இந்நிலையில் மாளவிகா என்று அவரது பெயரை மாற்றி உன்னைத் தேடி படத்தில் வைத்தது பற்றி சுந்தர்.சி பகிர்ந்து கொண்டுள்ளார்.

மாளவிகாவால் சுந்தர். சி - குஷ்பு இடையே ஏற்பட்ட சண்டை!

மாளவிகா என்ற பெயரை வைத்ததால், தனக்கும் தன் மனைவி குஷ்புவுக்கும் ஒரு சண்டையே ஏற்பட்டதாகவும், தங்களுக்கு குழந்தை பிறந்தால் இந்தப் பெயர் தான் வைக்க வேண்டும் என குஷ்பு தேர்வு செய்து வைத்திருந்த பெயர் மாளவிகா என்றும் சுந்தர்.சி பகிர்ந்துள்ளார்.

மேலும், பெயர் புத்தகத்தில் இருந்தெல்லாம் ரொம்ப சீரியஸாகத் தேடி மாளவிகா என்ற பெயரை குஷ்பு கண்டுபிடித்து வந்து சொன்னதாகவும், இரண்டு பெண் குழந்தைகள் என்பது குஷ்புவின் பல நாள் கனவு என்றும் பகிர்ந்துள்ளார்.

தேவா உன்னைத் தேடி படத்துக்கு இசையமைக்க கமிட் ஆன நிலையில், தேவாவிடம் தான் ஹீரோயின் பெயரில் பாடல் வேண்டும் என்று கேட்ட நிலையில், தேவா தன்னையே ஒரு பெயர் சொல்லும்படி கேட்க, தான் மாளவிகா என்ற பெயரை பரிந்துரை செய்ததை அடுத்து அவர் பெயரில் உன்னைத் தேடி படத்தில் பாடல் உருவானதாகவும்  சுந்தர். சி பகிர்ந்துள்ளார். 

மாளவிகாவுக்கு நடனம் வராது, நடை வராது ஆனால் பின் நாட்களில் அவர் வாளமீனுக்கு பாடலில் எல்லாம் நடனமாடி பெரிய டான்சராக மாறிவிட்டார் என்றும் சுந்தர்.சி ஆச்சர்யத்துடன் பகிர்ந்துள்ளார். அரண்மனை 4 படத்தில் சுந்தர் சி, நடிகைகள் தமன்னா, ராஷி கண்ணா, நடிகர்கள்  சந்தோஷ் பிரதாப், யோகிபாபு, விடிவி கணேஷ் எனப் பலரும் நடித்திருக்கின்றனர். ஹிப் ஹாப் ஆதி இந்த படத்துக்கு இசையமைத்துள்ளார்.