Director Manikandan: முதிய வயதிலும் சோர்வின்றி நடித்து, கதாப்பாத்திரத்தை உயிர்ப்பித்த அய்யா நல்லாண்டிக்கு நன்றி - மணிகண்டன் உருக்கம்
Director Manikandan: இந்த ஆண்டு வழங்கப்பட்ட தேசிய திரைப்பட விருதுகளில் கடைசி விவசாயி படம் இரண்டு விருதுகளை வென்றது.
Director Manikandan: இந்த ஆண்டு வழங்கப்பட்ட தேசிய திரைப்பட விருதுகளில் கடைசி விவசாயி படம் இரண்டு விருதுகளை வென்றது. சிறந்த தமிழ் படம் என்ற விருதும், சிறந்த நடிகர் என்ற சிறப்பு விருதும் கடைசி விவசாயி திரைப்படம் வென்றது. இப்படத்தை காக்கா முட்டை திரைப்படம் மூலம் தனி கவனம் ஈர்த்த மணிகண்டன் கடைசி விவசாயி படத்தையும் இயக்கி இருந்தார்.
இப்படத்திற்கு இரண்டு தேசிய விருதுகள் வழங்கப்பட்டதைத் தொடர்ந்து அப்படத்தின் இயக்குநர் மணிகண்டன் நன்றி தெரிவித்து கடிதம் எழுதியுள்ளார். அதில் அவர் ”அனைவருக்கும் அன்பான வணக்கம். மக்களாலும் விமர்சகர்களாலும் கொண்டாடப்பட்ட கடைசி விவசாயி திரைப்படத்திற்கு மிகப்பெரும் அங்கீகாரமாக தேசிய விருது அறிவிக்கப்பட்டுள்ளது. டிரைபல் ஆர்ட்ஸ் நிறுவனத்தின் முதல் தயாரிப்பான “கடைசி விவசாயி” படத்திற்கு இரண்டு தேசிய விருதுகள் கிடைக்க காரணமாக இருந்த விருது தேர்வு குழுவினருக்கும், இந்த படத்தை மக்களிடம் கொண்டு சேர்த்த ஊடகங்களுக்கும், மூத்த பத்திரிகையாளர்களுக்கும், ஊடக நண்பர்களுக்கும், இணையதள ஊடகங்களுக்கும் இந்நேரத்தில் என் சிரம் தாழ்ந்த நன்றிகளை தெரிவித்துக் கொள்கிறேன்.
கடைசி விவசாயி படத்தினில், முதிய வயதிலும் சோர்வின்றி நடித்து, கதாப்பாத்திரத்தை உயிர்ப்பித்து, கொண்டாட வைத்த மறைந்த அய்யா நல்லாண்டி அவர்களுக்கும், இப்படத்தினை உருவாக்க மிகப்பெரும் ஒத்துழைப்பை தந்த ஊர்மக்களுக்கும், இப்படத்தினை உலகம் முழுதும் கொண்டு சேர்த்த Vijaysethupathi Production மற்றும் 7cs Entertaiments நிறுவனங்களுக்கும், இந்தப் படத்தினை உருவாக்க உறுதுணையாகவும் இருந்து, சிறப்பாக நடித்தும் கொடுத்த மக்கள் செல்வன் விஜய் சேதுபதிக்கும், சக தொழில் நுட்ப கலைஞர்களுக்கும், நன்றிகளை தெரிவித்துக்கொள்கிறேன்.
தேசிய விருதுக்காக மனதார பாராட்டிய மக்கள் அனைவருக்கும் கோடான கோடி நன்றிகளை தெரிவித்துக்கொள்கிறேன். 69-வது தேசிய விருதுகளில், தமிழ் மொழிக்கு, கடைசி விவசாயி படம் இரண்டு விருதுகளை பெற்றுள்ளது மிகப்பெரும் மகிழ்ச்சியை தருகிறது. இதுபோல படைப்புகளை உருவாக்க, இந்த விருது மிகப்பெரிய ஊக்கம் தந்துள்ளது. மீண்டும் உங்கள் அனைவருக்கும் என் மனமார்ந்த நன்றியை தெரிவித்துக் கொள்கிறேன்” என குறிப்பிட்டுள்ளார்.
தலைப்பு செய்திகள்
ட்ரெண்டிங் செய்திகள்
