GST Theatre Food : அதிரடி.. தியேட்டர் உணவுகளுக்கான ஜிஎஸ்டி வரி 13 சதவிகிதம் குறைப்பு.. மக்கள் வருகை அதிகரிக்குமா?

GST Theatre Food : டெல்லியில் நடைபெற்ற ஜிஎஸ்டி கவுன்சில் கூட்டத்தில் தியேட்டரில் விற்கப்படும் உணவுப் பொருட்களுக்கான ஜிஎஸ்டி வரி குறைக்க முடிவெடுக்கப்பட்டுள்ளது. 

தியேட்டர் உணவுகள்

GST Theatre Food : டெல்லியில் நடைபெற்ற ஜிஎஸ்டி கவுன்சில் கூட்டத்தில் தியேட்டரில் விற்கப்படும் உணவுப் பொருட்களுக்கான ஜிஎஸ்டி வரி குறைக்க முடிவெடுக்கப்பட்டுள்ளது. 

கடந்த 2017 ஆம் ஆண்டு சரக்கு மற்றும் சேவை வரி அறிமுகம் செய்யப்பட்ட நிலையில், டெல்லியில் மத்திய நிதியமைச்சர் நிர்மலா சீதாராமன் தலைமையில் ஜிஎஸ்டி கவுன்சிலின் 50ஆவது கூட்டம் நேற்று நடைபெற்றது. இந்த கூட்டத்தில் மாநில நிதியமைச்சா்கள், மத்திய நிதித்துறை அமைச்சகத்தின் உயர் அலுவலர்கள் உள்ளிட்ட பலரும் கலந்து கொண்டனர். தமிழ்நாடு அரசு சார்பில்  நிதியமைச்சர் தங்கம் தென்னரசு கலந்து கொண்டார். 

இந்த கூட்டத்தில் இணைய விளையாட்டுகள், குதிரைப் பந்தயம், கேசினோ விளையாட்டுகள் ஆகியவற்றுக்கு 28 சதவீத ஜிஎஸ்டி வரி விதிக்கப்படும் என ஆலோசனை நடத்தப்பட்டது. தொடர்ந்து புற்றுநோய் சிகிச்சைக்கு பயன்படுத்தப்படும் இறக்குமதி மருந்துகளுக்கு வரி விலக்கு அளிக்கவும், செயற்கை ஜரிகைக்கு 12% வரியில் 5% ஆக குறைப்பது போன்றவை தொடர்பாகவும்  விவாதிக்கப்பட்டது. 

அப்போது தியேட்டர்களில் விற்பனை செய்யப்படும் உணவுப் பொருட்களுக்கான ஜிஎஸ்டி வரி 18 சதவிகிதத்தில் இருந்து 5 சதவிகிதமாக குறைக்கப்படும் என நிதியமைச்சர் நிர்மலா சீதாராமன் அறிவித்தார். இந்த அறிவிப்பு சினிமா ரசிகர்களிடையே மிகப்பெரிய அளவில் பெரும் வரவேற்பை பெற்றுள்ளது. 

உணவுப் பொருட்களின் தாறுமாறு விலை 

தமிழ்நாட்டில் ஆயிரத்திற்கும் மேற்பட்ட தியேட்டர்கள் செயல்பட்டு வரும் நிலையில், முன்பை விட தற்போது படம் பார்ப்பவர்களின் எண்ணிக்கை குறைந்து விட்டது. அதற்கு காரணம் தியேட்டர்களில் விற்கப்படும் உணவுப் பொருட்களின் தாறுமாறு விலை தான் காரணம். டிக்கெட் விலையை விட உணவுப் பொருட்கள் விலை அதிகமாக இருப்பதால் பலரும் குடும்பத்துடன் படம் பார்க்க செல்லும் முடிவையே கைவிடும் நிலை ஏற்படுகிறது. இதற்கு ஒரு முடிவு கட்ட வேண்டும் என ரசிகர்கள் பல காலமாக கோரிக்கை விடுத்து வருகின்றனர். 

இப்படியான நிலையில் தியேட்டர்களில் விற்பனை செய்யப்படும் உணவுப் பொருட்களுக்கான ஜிஎஸ்டி வரி குறைக்கப்பட்டுள்ளதால், அதன் மொத்த விலையின் கணிசமான தொகை குறைய வாய்ப்புள்ளது. இதனால் மீண்டும் ரசிகர்கள் அதிக எண்ணிக்கையில் தியேட்டருக்கு வருவார்கள் என எதிர்பார்க்கப்படுகிறது.

அதேசமயம் கடந்த சில நாட்களுக்கு முன், தமிழ்நாடு திரையரங்கு உரிமையாளர்கள் சங்கம் தியேட்டர்களில் டிக்கெட் கட்டணத்தை உயர்த்திக்கொள்ள அனுமதி கோரி  தமிழ்நாடு அரசிடம் மனு ஒன்றை அளித்தனர். அதன்படி மல்டிபிளக்ஸ் ஏசி தியேட்டர் கட்டணம் ரூ.250 ஆகவும், பிற ஏசி தியேட்டர் கட்டணம் ரூ.200 வரையும், ஏசி இல்லாத தியேட்டர்களில் ரூ.120 வரையும் கட்டணம் உயர்த்த கோரிக்கை விடுக்கப்பட்டது. இதற்கு கடும் எதிர்ப்பு எழுந்துள்ள நிலையில், தியேட்டர் உணவுப் பொருட்களுக்கான வரி குறைப்பு சற்று நிம்மதியை ஏற்படுத்தியுள்ளது எனலாம்.