Anant Ambani - Radhika: அம்பானி வீட்ல சர்க்கஸா, பணம் இருந்தா இப்படி செய்வீங்களா.. அனுராக் காஷ்யப் மகள் காட்டம்!

அம்பானி வீட்டுத் திருமணம் குறித்து இயக்குநர், நடிகர் அனுராக் காஷ்யப் மகள் ஆலியா பதிவிட்டுள்ளது பேசுபொருளாகி உள்ளது.

மகளுடன் அனுராக் காஷ்யப் - ஆனந்த் அம்பானி - ராதிகா மெர்ச்சன்ட்

Source : Other

ரிலையன்ஸ் குழுமத்தின் தலைவரும் இந்தியாவின் மிகப்பெரிய பணக்காரர்களில் ஒருவருமான முகேஷ் அம்பானியின் இளைய மகன் ஆனந்த் அம்பானிக்கும் தொழிலதிபர் வீரேன் மெர்ச்சன்ட்டின் மகள் ராதிகா மெர்ச்சன்ட்டுக்கும் இன்று (ஜூலை.12) மும்பையில் உள்ள ஜியோ வேர்ல்ட் கன்வென்க்ஷன் சென்டரில் மிகவும் பிரமாண்டமாக பாரம்பரிய முறைப்படி திருமணம் நடைபெற்று வருகிறது.

கடந்த ஜனவரி மாதம் ஆனந்த் அம்பானி - ராதிகா மெர்ச்சன்ட் திருமண நிச்சயதார்த்தம் நடைபெற்றது. அதன் தொடர்ச்சியாக திருமணத்துக்கு முன்னதான கொண்டாட்டங்கள் என அனைத்துமே மிகவும் பிரமாண்டமாக நடைபெற்றது. கடந்த மார்ச் மாதம் குஜராத் மாநிலம் ஜாம் நகரில் விழா தொடங்கப்பட்டபோது இந்தியத் திரை பிரபலங்கள் மட்டுமின்றி சர்வதேச அளவில் உள்ள ஏராளமான பிரபலங்கள் இந்த விழாவில் கலந்து கொண்டு சிறப்பித்தனர். 

சில தினங்களுக்கு முன்னர் மெஹந்தி மற்றும் சங்கீத் நிகழ்ச்சிகள் கோலாகலமாக நடைபெற்றது. அதிலும் பல பிரபலங்கள் கலந்து கொண்டனர்.  அம்பானி இல்லத் திருமண கொண்டாட்டங்கள் உலக அளவில் அனைவரின் கவனத்தையும் ஈர்த்துள்ளது. 

உள்நாடு மற்றும் வெளிநாட்டில் இருந்து திருமணத்தில் கலந்து கொள்வதற்காக வருகை தந்த முக்கியப் பிரமுகர்களை தங்க வைக்க ஐந்து நட்சத்திர ஹோட்டல்களில் ரூம்ஸ் ரிசர்வ் செய்யப்பட்டுள்ளது. சிறப்பு விருந்தினர்களின் பயன்பாட்டிற்காக விமான வசதிகள் ஏற்பாடு செய்யப்பட்டுள்ளன. தொடர்ச்சியாக ஜூலை 12 முதல் 15ஆம் தேதி வரையில் திருமணக் கொண்டாட்டங்கள் நடைபெற உள்ளதால் அந்த நேரத்தில் போக்குவரத்து நெரிசல்  ஏற்படக்கூடாது என்பதற்காக போக்குவரத்தில் மாற்றங்கள் செய்யப்பட்டுள்ளது. இப்படியாக அம்பானி இல்ல திருமணம் மும்பையில் களைகட்டி வருகிறது. 

இந்நிலையில் பாலிவுட் திரையுலகின் முன்னணி இயக்குநரும் தமிழ் சினிமாவில் நடிகராக கவனமீர்த்து வருபவருமான அனுராக் காஷ்யப் மகள் ஆலியாவுக்கும் அம்பானி வீட்டு திருமணத்தில் கலந்து கொள்ள அழைப்பு விடப்பட்டு இருந்தது.  ஆனால் அவரோ இந்தத் திருமணத்தில் கலந்து கொள்ள தனக்கு விருப்பமில்லை என மறுத்துவிட்டார். மேலும் இது குறித்து தன்னுடைய சோசியல் மீடியா பக்கத்தில் அவர் பகிர்ந்துள்ள போஸ்ட் பேசுபொருளாகியுள்ளது.

 

அவர் பதிவிட்டுள்ள போஸ்டில் “அம்பானி வீட்டு திருமணம் ஒரு திருமணமே இல்லை. சர்க்கஸ் நிகழ்ச்சியை போல ஆகிவிட்டது. எனக்கும் திருமண விழாவில் கலந்து கொள்ள அழைப்பு வந்தது. விளம்பரத்திற்காக தான் அழைக்கிறார்கள் என தெரியும், அதனால் நான் மறுத்துவிட்டேன். எனக்கு சுயமரியாதை இருக்கிறது.

பணத்திற்காக திருமண விழாவுக்கு செல்ல எனக்கு விருப்பமில்லை. பணம் அதிகமாக இருக்கிறது என்பதற்காக இப்படி எல்லாம் செய்கிறார்கள். எங்களிடமும் அதிகமாக பணம் இருக்கிறது. ஆனால் அதை வைத்து என்ன செய்ய முடியும்" என காரசாரமாக தன்னுடைய கருத்தை பதிவிட்டு இருந்தார் நடிகர் அனுராக் காஷ்யப் மகள் ஆலியா. இந்தப் பதிவு சோசியல் மீடியாவில் வைரலாகியுள்ளது.