Actress Meena: சவாலான அம்மன் வேடம்.. சாதித்து காட்டிய மீனா.. இப்படியெல்லாம் சிக்கல் வருமா?

தமிழ் சினிமாவில் குழந்தை நட்சத்திரமாக அறிமுகமாகி பின்னாளில் வெற்றிக்கரமான ஹீரோயினாக திகழ்ந்தவர் மீனா. இவர் சில படங்களில் அம்மன் வேடத்தில் நடித்தார். அதனைப் பற்றி மீனா நெகிழ்ச்சியாக பேசியுள்ளார்.

அம்மன் வேடத்தில் மீனா

Source : X

அம்மன் வேடத்தில் நடிக்கும்போது மிகப்பெரிய அளவில் சவால்களை எதிர்கொண்டதாக நடிகை மீனா நேர்காணல் ஒன்றில் தெரிவித்துள்ளார். 

அம்மனாக நடித்த மீனா

தமிழ் சினிமாவில் குழந்தை நட்சத்திரமாக அறிமுகமாகி பின்னாளில் வெற்றிக்கரமான ஹீரோயினாக திகழ்ந்தவர் மீனா. முன்னணி நட்சத்திரங்கள் அனைவருடனும் நடித்த அவர் தற்போது முக்கியத்துவம் வாய்ந்த கேரக்டர்களில் நடித்து வருகிறார். இதனிடையே மீனா  பாளையத்தம்மன், அங்காள பரமேஸ்வரி, படை வீட்டு அம்மன் உள்ளிட்ட படங்களில் அம்மன் வேடத்தில் நடித்தார். அதனைப் பற்றி நேர்காணல் ஒன்றில் தெரிவித்துள்ளார். 

அதாவது, “பாளையத்தம்மன் படத்தில் தான் நான் அம்மன் வேடத்தில் நடித்தேன். எந்த ஒரு கேரக்டர் என்றாலும் ஏதாவது ஒரு உதாரணம் இருக்கும். ஆனால் இப்படி கடவுள் வேடத்திற்கு எதை எடுத்துக் கொள்ள முடியும். இதற்கு முன்னால் இந்த கேரக்டர்கள் செய்தவர்கள் என்ன மாதிரி செய்திருக்கிறார்கள் என்பதை பார்த்து அதில் என்னுடைய பாவனையும் கலந்து தான் நடிக்க வேண்டியதாக இருந்தது. பாளையத்தம்மன் படத்தில் நடிப்பு மட்டுமல்ல அந்த அம்மன் கெட்டப்பில் பச்சை, கருப்பு, மஞ்சள் கலரில் எல்லாம் மேக்கப் போட்டிருப்பேன். அதில் மிகப்பெரிய அளவில் சவால் இருந்தது. ஆனால் அது அனைத்தும் எனக்கு மிகவும் பிடித்திருந்தது. 

Udayananu Tharam location still ❤️✨#Meena pic.twitter.com/gonDtfCMCp

— Meena (@ActressMeena_) February 6, 2026

அம்மன் பேசுற விதம், நடக்குற விதம், உச்சரிப்பு, சிரிப்பு என ஒவ்வொன்றும் பார்த்து கவனமாக செய்தேன். உண்மையில் அந்த நாட்கள் எல்லாம் மிகவும் அழகானது. அத்தகைய சவால்களை நான் விரும்பினேன். அப்படியான கேரக்டர்கள் செய்தது மிகவும் சந்தோஷமாக இருந்தது. அந்த படம் வெளியான சமயத்தில் தியேட்டரில் சாமியாடும் பெண்களின் கதையைக் கேட்டுள்ளேன். இப்போதும் கூட ஆடி மாதம் வந்துவிட்டால் அப்படத்தின் பாடல்கள் எல்லாம் ஒலிபரப்புகிறார்கள். 

இப்போது இருக்கும் அளவுக்கு டெக்னாலஜி அப்போது இல்லை. சாதாரணமாக ஒரு மேக்கப் கிடைக்கவே ரொம்ப கடினமாக இருக்கும். ஒவ்வொரு காட்சியும் மிக கடினமாக மேக்கப் போட்டு அது கலைந்து விடாத அளவுக்கு படாதபாடாக இருக்கும். தலையில் கிரீடம், கையில் வேல் வைத்து வைத்து டான்ஸ் ஆடுவதற்குள் ஒருவழியாகி விடும். 

ஆனால் இயக்குநர் ராம நாராயணன் அதை எளிதாக செய்து விடுவார். அவரின் செட் ரொம்ப சௌகரியமாக இருக்கும். அம்மன் படம் பண்ணும்போதெல்லாம் அசைவம் சாப்பிட மாட்டேன். தினமும் தலைக்கு குளிப்பேன் என பல விஷயங்களை பின்பற்றினேன்” என மீனா தெரிவித்துள்ளார்.   

மீனா தற்போது மலையாளத்தில் உருவான ரோஸ்லின் வெப் சீரிஸில் நடித்துள்ளார். இது வரும் பிப்ரவரி 27ம் தேதி ஹாட் ஸ்டார் ஓடிடி தளத்தில் வெளியாகவுள்ளது.