Actor Jiiva: திரைப்படமாக உருவாகும் முதலமைச்சரின் வாழ்க்கை வரலாறு...ஹீரோவாக நடிக்கும் ஜீவா...

நடிகர் ஜீவா கடந்தாண்டு காஃபி வித் காதல், வரலாறு முக்கியம் ஆகிய படங்களில் ஹீரோவாகவும், நித்தம் ஒரு வானம் படத்தில் சிறப்பு தோற்றத்திலும் நடித்திருந்தார்.

நடிகர் ஜீவா

ஆந்திரப்பிரதேசத்தின் முதலமைச்சர் ஜெகன் மோகன் ரெட்டியின் வாழ்க்கை வரலாற்று படத்தில் நடிகர் ஜீவா ஹீரோவாக நடிப்பதாக தகவல் வெளியாகியுள்ளது. 

ஒய்.எஸ்.ராஜசேகர ரெட்டி வரலாறு

ஒருங்கிணைந்த ஆந்திராவின் முன்னாள் முதலமைச்சராக ஒய்.எஸ்.ராஜசேகர ரெட்டி கடந்த 2009 ஆம் ஆண்டு விமான விபத்தில் உயிரிழந்தார். அவரது வாழ்க்கை வரலாற்றை மையப்படுத்தி “யாத்ரா” என்ற படம் கடந்த 2019 ஆம் ஆண்டு வெளியானது. மஹி ராகவ் இயக்கிய இப்படத்தில் ராஜசேகர ரெட்டி வேடத்தில் நடிகர் மம்மூட்டி நடித்திருந்தார். தெலுங்கில் எடுக்கப்பட்ட இப்படம் தமிழ், மலையாளம் உள்ளிட்ட மொழிகளில் டப் செய்து வெளியிடப்பட்டது. 

ஜெகன் மோகன் ரெட்டி வரலாறு

இதன் 2ஆம் பாகம் உருவாகும் என இயக்குநர் மஹி அறிவித்திருந்த நிலையில், அதற்கான பணிகளும் மும்முரமாக நடைபெற்றது. ‘யாத்ரா-2’ என பெயரிடப்பட்டுள்ள இந்த படத்தில் ஒய்.எஸ்.ராஜசேகர ரெட்டியின் மகனும், ஆந்திர முதலமைச்சருமான ஜெகன் மோகன் ரெட்டியின் வாழ்க்கையானது படமாக்கப்பட உள்ளது. அவரின் இளமை காலம் முதல் ஆந்திர முதலமைச்சர் ஆனது வரை இதில் இடம் பெற உள்ளதாக கூறப்படுகிறது. 

ஆந்திராவில் சட்டப்பேரவை தேர்தலுக்கு இன்னும் ஒரு வருடம் உள்ள நிலையில், இந்த படத்தை மக்களின் பார்வைக்கு கொண்டு வர படக்குழு திட்டமிட்டுள்ளது.முதல் பாகத்தில் அப்பா ராஜசேகர ரெட்டி கேரக்டரில் மம்மூட்டி நடித்த நிலையில், இரண்டாம் பாகத்தில் மகன் ஜெகன்மோகன் ரெட்டி கேரக்டரில் யார் நடிப்பார் என்ற எதிர்பார்ப்பு எழுந்தது.

இந்த நிலையில், ஜெகன்மோகன் ரெட்டியாக நடிக்க சூர்யா பெயர் பரிசீலிக்கப்பட்டதாக கூறப்பட்டது. ஆனால் தங்களை யாரும் அணுகவில்லை என சூர்யா தரப்பில் தெரிவிக்கப்பட்டது. இதனைத் தொடர்ந்து  நடிகர் ஜீவாவிடம் படக்குழுவினர் பேசி வருவதாக கூறப்பட்டது. இந்நிலையில்  ஜீவா தான் ஜெகன் மோகனாக நடிக்கப்போவதாக தகவல் வெளியாகியுள்ளது.  விரைவில்  இதற்கான அதிகாரப்பூர்வ அறிவிப்பு வெளியாக இருக்கிறது என்றும், திரைக்கதை தயாராகி விட்டதால் படப்பிடிப்பும் விரைவில் தொடங்க இருப்பதாகவும் தகவல்கள் தெரிவிக்கின்றன, 

தமிழ் சினிமாவில் முன்னணி கதாநாயர்களில் ஒருவராக வலம் வரும்  ஜீவா கடந்தாண்டு காஃபி வித் காதல், வரலாறு முக்கியம் ஆகிய படங்களில் ஹீரோவாகவும், நித்தம் ஒரு வானம் படத்தில் சிறப்பு தோற்றத்திலும் நடித்திருந்தார். இதனைத் தொடர்ந்து புதிய படம் ஒன்றில் நடிகர் ராஷிகண்ணாவுடன் அவர் இணைந்து நடிக்க உள்ளார். இந்நிலையில் ஆந்திர முதலமைச்சரின் வாழ்க்கை வரலாற்று படத்தில் ஜீவா நடிக்க உள்ள தகவல் ரசிகர்களை மகிழ்ச்சியில் ஆழ்த்தியுள்ளது.

மேலும் படிக்க: Naga Chaitanya : எனக்கு பிடிக்காத வார்த்தை 'நட்பு'... கிஸ் கொடுத்ததை கவுண்ட் வைக்கல... கடுப்பில் கொந்தளித்த நாக சைதன்யா