Delhi Ganesh: "வளந்ததும் மறந்துட்றாங்க" பிரதீப் ரங்கநாதன் மீது டெல்லி கணேஷிற்கு கோபமா?

பிரபல இயக்குனர் பிரதீப் ரங்கநாதன் மீது மறைந்த நடிகர் டெல்லி கணேஷிற்கு கோபம் இருந்ததா? என்பதற்கு அவர் விளக்கம் அளித்தது வைரலாகி வருகிறது.

பிரதீப் ரங்கநாதன் - டெல்லி கணேஷ்

Source : twitter

தமிழ் திரையுலகின் மூத்த நடிகர்களில் ஒருவர் டெல்லி கணேஷ். ரஜினி, கமல் என முன்னணி நடிகர்கள் முதல் இளம் நடிகர்கள் வரை பலருடன் நடித்த அனுபவமிக்கவர். இவர் நேற்று காலமானார். இவரது மறைவு ரசிகர்கள் மத்தியில் பெரும் சோகத்தை ஏற்படுத்தியுள்ளது.

பிரதீப் ரங்கநாதன் மீது கோபமா?

பெரிய திரைப்படங்கள் மட்டுமின்றி சிறிய பட்ஜெட் படங்கள், குறும்படங்கள், சீரியல்கள் என பலவற்றில் நடித்து நடிகராக அசத்தியுள்ளார். தமிழ் திரையில் இன்று வளர்ந்து வரும் நடிகர் மற்றும் இயக்குனராக இருக்கும் பிரதீப் ரங்கநாதனின் லவ் டுடே படம் முதலில் அப்பா லாக் என்று குறும்படமாக எடுக்கப்பட்டது. அந்த படத்தில் நாயகியின் தந்தையாக டெல்லி கணேஷ் நடித்திருப்பார்.

ஆனால், அதே குறும்படத்தை பிரதீப் ரங்கநாதன் லவ் டுடே என்ற பெயரில் படமாக எடுத்தபோது டெல்லி கணேஷின் கதாபாத்திரத்தில் அவருக்கு பதிலாக சத்யராஜை நடிக்க வைத்திருப்பார். ஒரு முறை இதுதொடர்பாக டெல்லி கணேஷ் அளித்த பேட்டியில் கூறியிருப்பதாவது, சில பேரு வளந்துட்டா மறந்துட்றாங்க. அதைப்பத்தி நான் கவலைப்படல. நான் எத்தனையோ வளர்ச்சியை பாத்தாச்சு. நான் சொன்னேன். அதை எல்லாரும் வேற மாதிரி போட்டு எனக்கும் அவருக்கும் குழப்பம் இருக்கமாதிரி எழுதுனாங்க. அதெல்லாம் ஒன்னும் கிடையாது”

இவ்வாறு அவர் கூறினார்.

அப்பா லாக் - லவ் டுடே:

பிரதீப் ரங்கநாதனிடம் அப்பா லாக் படத்தில் டெல்லி கணேசை நடிக்க வைத்திருப்பீர்கள். லவ் டுடேவில் சத்யாராஜை நடிக்க வைத்திருப்பார்கள். அதற்கு என்ன காரணம் என்று கேட்டபோது அவர், “ படத்தை பெரிய திரைக்கு கொண்டு வந்ததே காரணம். அனைத்து தரப்பினரையும் கொண்டு சேரனும். கதாநாயகன் புதிது என்பதால் பெரிய நடிகர் இருந்தால் மக்களைச் சேரும் என்று நினைத்தேன். அதனால்தான் சத்யராஜ் சாரை தேர்வு செய்தேன்.” இவ்வாறு அவர் விளக்கம் அளித்திருந்தார்.

பிரதீப் ரங்கநாதன் நடித்து இயக்கிய லவ் டுடே படம் 2022ம் ஆண்டு மிகப்பெரிய வெற்றியைப் பெற்றது. இதே படத்தை 2017ம் ஆண்டு அப்பா லாக் என்ற குறும்படமாக இயக்கியிருப்பார். அந்த படம் ரசிகர்கள் மத்தியில் பெரும் வரவேற்பை பெற்றது. அந்த குறும்படத்தில் பிரதீப் ரங்கநாதனே நாயகனாக நடித்திருப்பார்.