Cinema Headlines : களைகட்டிய வரலட்சுமி சங்கீத் கொண்டாட்டம்...100 கோடி தொட்ட மகாராஜா வசூல்...சினிமா செய்திகள் இன்று

நடிகர் சரத்குமார் மகள் வரலட்சுமி திருமண கொண்டாட்டங்கள் முதல் நெப்போலியன் மகனின் திருமணம் உள்ளிட்ட இன்று ஜூலை 2 ஆம் தேதி சினிமா செய்திகளைப் பார்க்கலாம்

சினிமா செய்திகள்

Source : Other

வரலட்சுமி சங்கீத் கொண்டாட்டம்

தமிழ் சினிமாவின் மூத்த நடிகர் சரத்குமார் மகள் நடிகை வரலக்ஷ்மி சரத்குமார் (Varalaxmi Sarathkumar) திருமணம் இன்று நடைபெறுகிறது. இந்நிலையில், திருமணத்துக்கு முன்னதான கொண்டாட்டங்களான ஹல்தி, மெஹந்தி மற்றும் சங்கீத் நிகழ்ச்சியில் கடந்த இரண்டு நாட்களாக சென்னையில் கோலாகலமாக நடைபெற்றது. ஏராளமான பிரபலங்கள் வரலட்சுமி - நிக்கோலாய் சச்தேவ் திருமண கொண்டாட்டங்களில் கலந்து கொண்டு மணமக்களை வாழ்த்தினர். அந்தப் புகைப்படங்கள் சோசியல் மீடியாவில் மிகவும் வைரலாக பகிரப்பட்டு வருகின்றன.

நெப்போலியன் மகன் திருமணம்

நெப்போலியனின் இளைய மகன் அன்மையில் தனது பட்டப் படிப்பை முடித்தார். படிப்பு முடிந்த கையோடு அவருக்கு திருமணம் செய்து வைக்க முடிவு செய்துள்ளார் நெப்போலியன். தனது மகன் திருமணத்தை முன்னிட்டு தமிழ்நாடு முதலமைச்சர் மு.க ஸ்டாலினை நேரில் சந்தித்து திருமண பத்திரிகையை அவருக்கு வழங்கி அழைப்பு விடுத்துள்ளார். இதன் புகைப்படங்கள் சமூக வலைதளத்தில் வைரலாகி வருகிறது. நெப்போலியனின் மகன் திருமணத்தில் தமிழ் சினிமாவின் பிரபல நட்சத்திரங்கள் அனைவரும் கலந்துகொள்வார்கள் என்று எதிர்பார்க்கலாம் .  

மகாராஜா பாக்ஸ் ஆபிஸ்

விஜய் சேதுபதி ஹீரோவாக நடிக்க, நிதிலன் சுவாமிநாதன் இயக்கத்தில் கடந்த ஜூன் 14ஆம் தேதி வெளியான திரைப்படம் மகாராஜா. அனுராக் காஷ்யப், மம்தா மோகன் தாஸ், சிங்கம் புலி, அபிராமி, நட்டி, பாரதிராஜா, முனிஷ்காந்த் உள்ளிட்ட பலர் நடிப்பில் வெளியான இத்திரைப்படம் அதன் திரைக்கதைக்காக பாசிட்டிவ் விமர்சனங்களைப் பெற்றது. தொடர்ந்து பாலியல் வன்முறையைக் கையாண்ட விதம் மற்றும் யு/ ஏ சான்றிதழ் உள்ளிட்ட காரணங்களால் இணையத்தில் நெகட்டிவ் விமர்சனங்களைப் பெற்றது. ஆனால் இப்படி கலவையான விமர்சனங்கள் தாண்டி, வசூலில் இப்படம் வெளியானது முதலே ஏறுமுகத்தில் பயணித்து வருகிறது. மகாராஜா திரைப்படம் உலகளவில் 100 கோடி வசூலித்துள்ளதாக பாக்ஸ் ஆபிஸ் தரவுகளை வெளியிடும் சாக்னிக் தளம் தகவல் வெளியிட்டுள்ளது.

 நாயகனாகும் பிக் பாஸ் பிரபலம்

சின்னத்திரையில் இருந்து வெள்ளித்திரைக்கு பயணித்தவர்களில் ஒருவர் நடிகர் ராஜு ஜெயமோகன். விஜய் டிவியில் எவர்கிரீன் தொடரான 'கனா காணும் காலங்கள்' மூலம் அறிமுகமான ராஜூ ஜெயமோகன் அதைத் தொடர்ந்து சரவணன் மீனாட்சி சீசன் 2 , நாம் இருவர் நமக்கு இருவர் உள்ளிட்ட தொடர்களில் தோன்றி சின்னத்திரை மக்களின் மனதில் இடம் பிடித்தார். அவரின் டைமிங் காமெடி சென்ஸ் அனைவரும் அறிந்ததே! 'நட்புன்னா என்னனு தெரியுமா" , "டான்", "முருங்கக்காய்  சிப்ஸ்" உள்ளிட்ட படங்களில் சிறு சிறு கதாபாத்திரத்தில் நடித்ததன் மூலம் வெள்ளித்திரையில் அடியெடுத்து வைத்தார். தற்போது Rain of Arrows Entertainemt நிறுவனத்தின் கீழ் சுரேஷ் சுப்பிரமணியம் தயாரிக்கும் படத்தின் மூலம் ஹீரோவாக அறிமுகமாகிறார் நடிகர் ராஜூ ஜெயமோகன். இவர் ஏற்கனவே 'எண்ணித்துணிக' என்ற படத்தை தயாரித்துள்ளார் என்பது குறிப்பிடத்தக்கது.  'காலங்களில் அவள் வசந்தம்' என்ற படத்தின் மூலம் இயக்குநராக அறிமுகமான ராகவ் மிர்தாத் தான் ராஜூ அறிமுகமாகும் இப்படத்தை இயக்க உள்ளார். 'சைஸ் ஜீரோ' படத்தின் வசனங்களையும், தேசிய விருது பெற்ற 'பாரம்' படத்தை திரைக்கதை மற்றும் வசனத்தை எழுதியவர் ராகவ் மிர்தாத் என்பது குறிப்பிடத்தக்கது.