Annamalai: தேர்தலில் சீட் இல்லை, கல்தா கொடுத்த கட்சி; பாஜக அண்ணாமலை பரபரப்பு ட்வீட்!

BJP Candidate List 2026 Tamil Nadu: 2026 தேர்தலில் பாஜகவின் வெற்றி உறுதி! அண்ணாமலை போட்டியிடாத மர்மம் என்ன? பரபரப்பு தகவல்!

பிரதமர் மோடியுடன் அண்ணாமலை

Source : twitter

தமிழ்நாடு சட்டமன்றத் தேர்தலில் பாஜக முன்னாள் தலைவர் அண்ணாமலைக்கு போட்டியிட வாய்ப்பு அளிக்கப்படாத நிலையில், ஒரு தொண்டனாக அனைத்து வெற்றி வேட்பாளர்களுக்கும் பிரச்சாரம் செய்ய உள்ளதாக அண்ணாமலை தெரிவித்துள்ளார். 

அண்ணாமலைக்கு ஆப்பு

நீண்ட இழுபறிக்குப் பிறகு பாஜக, தனது 27 தொகுதிகளுக்கான வேட்பாளர் பட்டியலை வெளியிட்டது. இதில் கடந்த 2021 தேர்தலில் அரவக்குறிச்சி தொகுதியில் போட்டியிட்ட அண்ணாமலைக்கு சீட் வழங்கப்படவில்லை. 

இதுகுறித்துப் பல்வேறு ஊகங்கள் எழுந்த நிலையில் அண்ணாமலையே பரபரப்பு ட்வீட்டைப் பதிவிட்டுள்ளார். அதில் அவர் கூறும்போது, ''2026 தமிழ்நாடு சட்டமன்றத் தேர்தலில் வெற்றி பெற உள்ள அனைத்து பாஜக வேட்பாளர்களுக்கும் மனமார்ந்த வாழ்த்துக்கள். ஊழல், அலட்சியம் மற்றும் திமுகவின் துரோகத்தால் வெறுப்பில் இருக்கும் தமிழ்நாட்டின் ஒவ்வொரு சகோதர சகோதரிகளின் ஆதரவும் அவர்களுக்கு இருக்கும்.

சுயநலமான திமுக அரசால் பின்தங்கிய தமிழ்நாடு

நமது பிரதமர் நரேந்திர மோடியின் தொலைநோக்குப் பார்வை கொண்ட தலைமையின் கீழ், இந்தியா வலிமையுடனும், பரந்த அளவிலும், நோக்கத்துடனும் முன்னேறியுள்ளது. தேசம் முன்னேறிக் கொண்டிருக்கும் வேளையில், தோல்வியடைந்த, ஆணவமிக்க, சுயநலமிக்க திமுக அரசால் தமிழ்நாடு பின்தங்கியுள்ளது.

ஒரு தொண்டனாக நான், வரவிருக்கும் சட்டமன்றத் தேர்தலில் தேசிய ஜனநாயகக் கூட்டணி 210 இடங்களை வெல்ல வேண்டும் என்ற நோக்கத்தில், நமது பாஜக மற்றும் பிற தேசிய ஜனநாயகக் கூட்டணி வேட்பாளர்கள் அனைவரும் வெற்றி பெற தோளோடு தோள் நின்று பிரச்சாரம் செய்வேன்’’ என்று தெரிவித்துள்ளார்.

கமலாலயம் கப்சிப்

பாஜக முன்னாள் மாநில தலைவர் அண்ணாமலை கோவை மக்களவை தொகுதிக்குட்பட, 6 சட்டமன்ற தொகுதிகளில் ஏதேனும் ஒன்றில் போட்டியிட விருப்பம் தெரிவித்தார். ஆனால், அந்த ஆறு தொகுதிகளில் ஒன்றை கூட, அதிமுக தலைமை பாஜகவிற்கு வழங்கவில்லை. கோவை வடக்கு தொகுதியில் போட்டியிட விரும்பினாலும், வானதி ஸ்ரீனிவாசன் அதனை விட்டுக்கொடுக்க முன்வரவில்லை என கூறப்படுகிறது.

நீண்ட நாட்களாகவே தேர்தலில் இந்த முறை போட்டியிடவில்லை என்று அண்ணாமலை கூறி வந்த நிலையில் உண்மையில் அவராகவே போட்டியிடவில்லையா அல்லது கட்சி மேலிடம் சீட் வழங்கவில்லையா என்பது கமலாலயத்துக்கே வெளிச்சம்.