Madurai corporation election 2022 | பொங்கல் பரிசை மாட்டுக்கு வைத்தால் மாடு முறைத்து பார்க்கிறது - ஓபிஎஸ் கிண்டல்

நீட் தேர்வை ரத்து செய்வோம் என்று பொய் பிரச்சாரம் செய்தார் ஸ்டாலின். ஸ்டாலின் நினைத்த உடன் நீட் தேர்வை ரத்து செய்துவிடமுடியுமா ?

பரப்புரை கூட்டத்தில் பேசும் ஓபி.எஸ்

மதுரை மாநகராட்சியில் அ.தி.மு.க சார்பில் போட்டியிடும் 100 வேட்பாளர்களுக்கு வாக்கு கேட்டு அக்கட்சியின் ஒருங்கிணைப்பாளர் ஓ.பன்னீர்செல்வம் பழங்காநத்தம் பகுதியில் பிரச்சாரம் செய்தார். அப்போது ”அண்ணா பிறந்த காஞ்சியில் ஆரம்பித்த தேர்தல் பிரச்சாரத்தை இன்று  மீனாட்சியாளும் மதுரையில் நிறைவு செய்கிறேன். 22 இடங்களில் தேர்தல் பிரச்சாரத்தில் ஈடுபட்டேன். இது போன்ற கூட்டத்தை பார்க்க முடியவில்லை. மாநாடு போல மதுரையில் மக்கள் திரண்டுள்ளனர்.

செல்லூர் ராஜூ, ராஜன் செல்லப்பா, ஆர்.பி.உதயகுமார் ஆகியோரை மும்மூர்த்திகள் என்று தான் சொல்ல வேண்டும். அந்த அளவிற்கு மதுரையில் சிறப்பாக செயல்பட்டு வருகின்றனர். அ.தி.மு.கவை எந்த கொம்பாதி கொம்பன் வந்தாலும் அசைக்க முடியாத எக்கு கோட்டையாக உருவாக்கியவர்கள் எம்.ஜி.ஆர், ஜெயலலிதாவும். நுற்றுக்கு நூறு வாக்குறுதிகளையும் நிறைவேற்றிய ஒரே முதல்வர் ஜெயலலிதா அவர்கள்தான். கடந்த 10 ஆண்டு கால ஆட்சியில் மக்கள் மிகவும் மகிழ்ச்சியாக இருந்தனர். தாலிக்கு தங்கம், மின்சாரத்தில் தன்னிறைவு, ஜீவா தார பிரச்னைகளில் காப்பாற்றியது உள்ளிட்ட பல்வேறு சாதனைகள் அ.தி.மு.க ஆட்சியில் தான் நடைபெற்றது.

நீட் தேர்வை ரத்து செய்வோம் என்று பொய் பிரச்சாரம் செய்தார் ஸ்டாலின். ஸ்டாலின் நினைத்த உடன் நீட் தேர்வை ரத்து செய்துவிடமுடியுமா ? அதில் பல்வேறு கட்ட பணிக்கு பின்பு தான் ரத்து செய்யமுடியும். கடைசியாக அதில் ஜனாதிபதி கையெழுத்திட வேண்டும். பெண்களுக்கு மாதம், மாதம் 1000 ரூபாய் கொடுப்போம் என தெரிவித்தனர். ஆனால் தற்போது வரை அந்த பணம் வந்து சேரவில்லை. நகை கடனை தள்ளுபடி செய்வோம் என தெரிவித்துவிட்டு 13 லட்சம் நபர்கள் தான் அதில் தகுதியானவர் என 35 லட்சத்திற்கும் மேற்பட்ட நபர்களை ஏமாற்றிவிட்டனர்.

அதே போல் பொங்கல் பரிசு 5ஆயிரம் தரவேண்டும் என அழுத்தம் கொடுத்தார். ஆனால் அவர் ஆட்சிக்கட்டில் வந்து, தற்போது நாங்கள் கொடுத்த 2500 ரூபாயைக்  கூட பொங்கல் பரிசில் கொடுக்கவில்லை. பொங்கல் பரிசில் கொடுத்த வெல்லம் அதுவே உருகிவிட்டது. அரிசியை சாப்பிட முடியவில்லை. அதை மாட்டுக்கு வைத்தால் மாடு முறைத்து பார்க்கிறது. தி.மு.க ஆட்சியில் எந்த திட்டங்களையும் முறையாக கொண்டுவரவில்லை. ஆனால் அ.தி.மு.க பல்வேறு நல்ல திட்டங்களை செயல்படுத்தியுள்ளது. அ.தி.மு.க.வில் தொண்டர்களும் தலைவராகலாம். அப்படியான கட்சிதான் அ.தி.மு.க., நகர்புற உள்ளாட்சியில் அ.தி.மு.க அதிக இடங்களில் வெற்றிபெறும் என தெரிவித்தார்.

இதை படிக்க மிஸ் பண்ணாதீங்க பாஸ் - Madurai corporation election 2022 | “தூங்கா நகரத்தில் மனசாட்சி மட்டும் தூங்குகிறது” - மதுரையில் கமல் ஆதங்கம் !