TNPSC Interview: சமூகநீதிக்கு பெரும் தடை; அரசுப் பணிகளுக்கு நேர்முகத் தேர்வை ரத்து செய்க - ராமதாஸ்

தமிழக அரசில் அனைத்து குரூப் பணிகளுக்கும் நேர்முகத் தேர்வை ரத்து செய்ய வேண்டும்  என்று பா.ம.க. நிறுவனர் ராமதாஸ் வலியுறுத்தி உள்ளார். 

டிஎன்பிஎஸ்சி | கோப்புப்படம்

தமிழக அரசில் அனைத்து நிலை பணிகளுக்கும் நேர்முகத் தேர்வில் முறைகேடுகள் நடைபெறுவதாக குற்றச்சாட்டுகள் எழுப்பப்பட்டு வரும் நிலையில், நேர்முகத் தேர்வையே ரத்து செய்ய வேண்டும்  என்று பா.ம.க. நிறுவனர் ராமதாஸ் வலியுறுத்தி உள்ளார். 

டிஎன்பிஎஸ்சி என்று அழைக்கப்படும் தமிழ்நாடு அரசு பணியாளர் தேர்வாணையம் மூலம் பல்வேறு அரசுத் துறைகளுக்கான பணிகளில் உள்ள காலியிடங்கள் ஆண்டுதோறும் நிரப்பப்பட்டு வருகின்றன. இவை குரூப் 1, குரூப் 2 எனத் தொடங்கி பல்வேறு தேர்வுகளாக நடத்தப்பட்டு வருகின்றன. இதற்காக நடத்தப்படும் தேர்வுகளின் அட்டவணையையும் தேர்வு முடிவுகள் வெளியாகும் உத்தேச அட்டவணையையும் டிஎன்பிஎஸ்சி அவ்வப்போது வெளியிட்டு வருகிறது. 

இதற்கிடையே உயர் பொறுப்புகளுக்கு நடத்தப்படும் தேர்வுகளுக்கு, தேர்வு 3 கட்டமாக நடத்தப்படுகிறது. குறிப்பாக, முதல்நிலைத் தேர்வு, முதன்மைத் தேர்வு மற்றும் நேர்காணல் ஆகியவை நடத்தப்படுகின்றன. இதில் நேர்காணல் தேர்வில், முறைகேடுகள் நடந்து வருவதாகவும் ஊழல் விளையாடுவதாகவும் குற்றச்சாட்டுகள் எழுந்து வருகின்றன. இந்த நிலையில், நேர்முகத் தேர்வையே ரத்து செய்ய வேண்டும்  என்று பா.ம.க. நிறுவனர் ராமதாஸ் வலியுறுத்தி உள்ளார். 

இதுகுறித்து இன்று அவர் வெளியிட்டுள்ள ட்விட்டர் பதிவுகள்:

’’தமிழ்நாட்டில் தமிழ்நாடு அரசுப் பணியாளர் தேர்வாணையத்தின் மூலமாக அரசுத் துறைகளில் உள்ள பல்வேறு பணிகளுக்கு தகுதியானவர்களை  தேர்ந்தெடுக்கும்போது, அதற்காக நடத்தப்படும் நேர்முகத் தேர்வு  தகுதியும்,  திறமையும் கொண்ட பலரின்  வாய்ப்புகளை பறித்து விடுகிறது.  அனைவருக்கும் சம நீதியும், சமுக நீதியும் கிடைக்க நேர்முகத் தேர்வு பெருந்தடையாக உள்ளது. அந்தத் தடை விரைவாக நீக்கப்பட வேண்டும்.

தமிழக அரசில் அனைத்து நிலை பணிகளுக்கும் நேர்முகத் தேர்வை ரத்து செய்ய வேண்டும்!!

தமிழ்நாட்டில் தமிழ்நாடு அரசுப் பணியாளர் தேர்வாணையத்தின் மூலமாக அரசுத்துறைகளில் உள்ள பல்வேறு பணிகளுக்கு தகுதியானவர்களை தேர்ந்தெடுக்கும் போது, அதற்காக நடத்தப்படும் நேர்முகத்தேர்வு தகுதியும்,…

— Dr S RAMADOSS (@drramadoss) September 14, 2023

ஆந்திரத்தில் குரூப் 1 பணிகள் உள்ளிட்ட அனைத்து பணிகளுக்கும் 2019-ஆம் ஆண்டு  முதல்  நேர்காணல் ரத்து செய்யப்பட்டுள்ளது. தமிழ்நாட்டிலும் அரசு பணிகளுக்கான நேர்காணல்களில் பெருமளவில் முறைகேடுகள் நடைபெறுவதாக தொடர்ந்து குற்றச்சாட்டுகள் எழுப்பப்பட்டு வருகிறது. இந்த நிலையில், இங்கும் அது  நடைமுறைப்படுத்தப்பட வேண்டும்.

எழுத்துத் தேர்வுகளின் அடிப்படையில் தரவரிசைப் பட்டியல் தயாரிக்கப்பட்டு, அதன் அடிப்படையில் அனைத்துப் பணிகளுக்கும் தகுதியானவர்களை தேர்வு செய்வதுதான் சரியாக இருக்கும்; வெளிப்படைத்தன்மையுடன் இருக்கும்; முறைகேடுகளைத் தடுக்கும். இதற்கான அரசாணை பிறப்பிக்கப்பட்டால் நான் மிகுந்த மகிழ்ச்சியடைவேன்’’.

இவ்வாறு ராமதாஸ் தெரிவித்துள்ளார்.

இதையும் வாசிக்கலாம்: Arts College UG Admission: மிஸ் பண்ணிடாதீங்க மாணவர்களே... அரசு கலை அறிவியல் கல்லூரிகளில் சேர இன்றே கடைசி!