MBBS BDS Application 2025: தொடங்கிய எம்பிபிஎஸ், பிடிஎஸ் மருத்துவ படிப்புகளுக்கான விண்ணப்பம்; கட்டணம், தகுதி, வழிமுறைகள் என்னென்ன?
Tamil Nadu MBBS BDS Admission 2025: இளநிலை மருத்துவப் படிப்பில் சேர விரும்பும் மாணவர்கள் இன்று (ஜூன் 6) முதல் ஆன்லைன் மூலம் விண்ணப்பிக்கலாம்.
தமிழ்நாடு முழுவதும் எம்பிபிஎஸ், பிடிஎஸ் ஆகிய இளநிலை மருத்துவ படிப்புகளில் சேர்வதற்கான விண்ணப்பப் பதிவு இன்று (ஜூன் 6) தொடங்கி உள்ளது. மாணவர் சேர்க்கைக்கு விண்ணப்பிப்பதற்கான கட்டணம், அடிப்படைத் தகுதி, விதிகள், இட ஒதுக்கீடு உள்ளிட்ட விவரங்களை கீழே அறியலாம்.
முன்கூட்டியே தொடங்கிய விண்ணப்ப பதிவு
நாடு முழுவதும் நீட் தேர்வு முடிவுகளை அடிப்படையாகக் கொண்டு இளநிலை மற்றும் முதுநிலை மருத்துவ மாணவர் சேர்க்கை நடத்தப்பட்டு வருகிறது. ஜூன் 14ஆம் தேதி நீட் தேர்வு முடிவுகள் வெளியாக உள்ள நிலையில், மாணவர்களின் கடைசி நிமிட அவசரத்தைத் தவிர்க்கும் வகையில் தமிழக அரசு முன்கூட்டியே விண்ணப்பப் பதிவை தொடங்கி உள்ளது.
இளநிலை மருத்துவப் படிப்பில் சேர விரும்பும் மாணவர்கள் இன்று (ஜூன் 6) முதல் https://reg25.tnmedicalonline.co.in/ugnew/ என்ற இணைப்பை க்ளிக் செய்து விண்ணப்பிக்கலாம்.
எனினும் முன்கூட்டியே மாணவர்கள், முன்பதிவு செய்துகொள்ள வேண்டியது முக்கியம். அப்போது விண்ணப்பதாரர்கள் சம்பந்தப்பட்ட ஆவணங்களுடன் தங்களது புகைப்படம் மற்றும் கையொப்பத்தினை இணையதளம் வாயிலாக பதிவேற்றம் செய்யவேண்டும்.
அடிப்படை தகுதி
- இந்தியராக இருக்க வேண்டும்.
- தமிழ்நாட்டைச் சேர்ந்த மாணவர்கள், நேட்டிவிட்டி சான்றிதழைச் சமர்ப்பிக்க வேண்டும்.
- நீட் தேர்வில் தேர்ச்சி பெற்று, குறைந்தபட்சம் 40 சதவீத மதிப்பெண்களைப் பெற்றிருக்க வேண்டும்.
விண்ணப்பக் கட்டணம்
அரசு ஒதுக்கீட்டில் சேர மாணவர்களுக்கான விண்ணப்பப் படிவத்தின் கட்டணம் 500 ரூபாயாக உள்ளது. எனினும் எஸ்சி/ எஸ்சி அருந்ததியர்கள் மற்றும் எஸ்டி பிரிவினருக்கு கட்டணம் எதுவும் இல்லை.
என்னென்ன ஆவணங்கள் தேவை?
i. NEET- UG 2025 நுழைவுச் சீட்டு மற்றும் மதிப்பெண் அட்டை.
ii. பத்தாம் வகுப்பு மதிப்பெண் பட்டியல் (சான்றிதழின் இருபுறமும்).
iii. பன்னிரண்டாம் வகுப்பு மதிப்பெண் பட்டியல் (சான்றிதழின் இருபுறமும்).
iv. உயர்நிலைப் பள்ளி மதிப்பெண் பட்டியல் (மதிப்பீட்டு பட்டியலின் இருபுறமும்) அல்லது வேறு ஏதேனும் சமமான தேர்வு.
v. உயர்நிலைப் பள்ளி அல்லது அதற்கு சமமான படிப்புகளை முடித்த பிறகு பெறப்பட்ட மாற்றுச் சான்றிதழ்.
vi. தமிழ்நாட்டில் முழுமையாகப் படித்த விண்ணப்பதாரர்களுக்கு VI முதல் XII வகுப்பு வரை படிப்புச் சான்றிற்கான சான்றிதழ்.
vii. சாதிச் சான்றிதழ் (பொருந்தினால்).
viii. பிறப்புச் சான்றிதழ்.
ix. இடஒதுக்கீட்டின் கீழ் தங்கள் பூர்வீகத்தை தமிழ்நாட்டாகக் கூறும் விண்ணப்பதாரர்களுக்கு பெற்றோரின் ஆவணங்கள் பதிவேற்றப்பட வேண்டும்
x. தகுதிவாய்ந்த மாற்றுத்திறனாளிகள், சிறந்த விளையாட்டு வீரர் மற்றும் முன்னாள் படைவீரர்களுக்கான பொருத்தமான சான்றிதழ்களுடன் கூடிய சிறப்புப் பிரிவு படிவம், ஆன்லைன் விண்ணப்பப் படிவத்துடன் பதிவேற்றப்பட வேண்டும்.
7.5% இட ஒதுக்கீட்டுக்கு எப்படி?
xi. தமிழ்நாடு அரசுப் பள்ளிகளில் 6 முதல் 12 ஆம் வகுப்பு வரை 7.5% சிறப்பு இடஒதுக்கீட்டில் படித்த விண்ணப்பதாரர்களுக்கு முதன்மைக் கல்வி அலுவலரிடமிருந்து உறுதிச் சான்றிதழ் கட்டாயமாகும்.
xii. கட்டண விலக்கு கோரும் விண்ணப்பதாரர்களுக்கு பெற்றோரின் வருமானச் சான்றிதழ்.
xiii. பிற பல்கலைக்கழகங்கள் / வாரியங்களின் (மாநில வாரியம், CBSE வாரியம் மற்றும் ISCE வாரியம் தவிர) விண்ணப்பதாரர்களுக்கு தமிழ்நாடு டாக்டர் எம்.ஜி.ஆர். மருத்துவப் பல்கலைக்கழகத்தில் இருந்து பெறப்பட்ட தகுதிச் சான்றிதழ்.
விண்ணப்பிப்பது எப்படி?
- ஏற்கனவே விண்ணப்பித்த விண்ணப்பதாரர்கள் தங்களது உள்நுழை எண்ணை மற்றும் கடவுச்சொல்லை பயன்படுத்தவும்.
- தற்பொழுது உபயோகிக்கும் அலைபேசி எண் மற்றும் மின்னஞ்சலை மட்டும் உரிய இடத்தில் பதிவுசெய்யவும்.
- பதிவு செய்தபின், விண்ணப்பதாரர்கள் தங்கள் அலைபேசி எண் மற்றும் மின்னஞ்சலை மாற்ற முடியாது.
- விண்ணப்பக் கட்டணத்தை கிரெடிட் கார்டு/ டெபிட் கார்டு /நெட் பேங்கிங் / யுபிஐ பயன்படுத்தி இணையதளம் வாயிலாக மட்டுமே செலுத்த முடியும்.
- இறுதியாக விண்ணப்பத்தை பூர்த்தி செய்த (Final Submission) பின் அந்த விண்ணப்பத்தினை மாற்ற இயலாது.
- விண்ணப்பக்கட்டணத்தை செலுத்திய பிறகு அவர்களுக்கு விண்ணப்பத்தினை பதிவிறக்கம் செய்வதற்கான இணைப்பு தரப்படும். அதனை பயன்படுத்தி விண்ணப்பத்தினை பதிவிறக்கம் செய்துகொள்ளலாம்.
அரசு ஒதுக்கீட்டு இடங்களில் சேர விண்ணப்பிப்பதற்கு, https://tnmedicalselection.net/news/06062025002732.pdf என்ற அறிவிக்கையை முழுதாகப் படித்து, அறிந்துகொள்ள வேண்டியது முக்கியம்.
தொலைபேசி எண்கள்: 044 – 28361674 / 044 – 28363822 / 044 - 28364822 / 044 – 28365822 / 044 – 28366822 / 044 – 28367822 / 044 – 29862045 / 044 – 29862046
கூடுதல் விவரங்களை https://tnmedicalselection.net/ அல்லது www.tnhealth.tn.gov.in ஆகிய இணைய முகவரிகளை க்ளிக் செய்து அறியலாம்.
தலைப்பு செய்திகள்
ட்ரெண்டிங் செய்திகள்
