புதுச்சேரி: மொபைல் ஆப்பில் 10-ஆம் வகுப்பு மதிப்பெண் சான்றிதழ் பதிவிறக்கம் மற்றும் வேலைவாய்ப்பு பதிவு - புதிய வசதி அறிமுகம்!
புதுச்சேரி மாநிலத்தில் பத்தாம் வகுப்பு முடித்த மாணவர்கள் தங்களது மதிப்பெண் சான்றிதழ்களை மொபைல் ஆப் மூலமாகவே பதிவிறக்கம் செய்து கொள்ளலாம் என அறிவிக்கப்பட்டுள்ளது
புதுச்சேரி: புதுச்சேரி மாநிலத்தில் பத்தாம் வகுப்பு முடித்த மாணவர்கள் தங்களது மதிப்பெண் சான்றிதழ்களை மொபைல் ஆப் மூலமாகவே பதிவிறக்கம் செய்து கொள்ளலாம் என அறிவிக்கப்பட்டுள்ளது.
இது குறித்து தொழிலாளர் துறை செயலர் ஸ்மித்தா வெளியிட்டுள்ள செய்திக்குறிப்பில் கூறப்பட்டிருப்பதாவது:
தேசிய தகவல்தொழில்நுட்ப மையத்துடன் இணைந்து ஏற்பாடு:
புதுச்சேரி வேலைவாய்ப்பு அலுவலகம், 2025–26-ஆம் கல்வியாண்டில் பத்தாம் வகுப்பு தேர்ச்சி பெற்ற மாணவ, மாணவிகளின் மதிப்பெண் சான்றிதழ்களைப் பள்ளிக் கல்வி இயக்ககத்தின் மூலம் பெற்றுள்ளது. இவை அனைத்தையும் தேசிய தகவல்தொழில்நுட்ப மையத்தின் (NIC) உதவியுடன் மொபைல் ஆப்பில் பதிவேற்றம் செய்யத் தகுந்த ஏற்பாடுகள் செய்யப்பட்டுள்ளன.
வேலைவாய்ப்பு அலுவலகத்திற்கு நேரில் செல்லத் தேவையில்லை:
பத்தாம் வகுப்பு மாணவர்கள் தங்களின் அசல் மதிப்பெண் சான்றிதழைப் பெற்ற பிறகு, இந்த மொபைல் ஆப்பைப் பயன்படுத்தி சான்றிதழைப் பதிவிறக்கம் செய்து கொள்ளலாம். இதனைத் தொடர்ந்து, புதுச்சேரி மற்றும் காரைக்கால் பிராந்தியத்தில் உள்ள பத்தாம் வகுப்பு ஸ்டேட் போர்டு மற்றும் சி.பி.எஸ்.இ. மாணவர்கள் தங்களின் உண்மை மதிப்பெண் சான்றிதழைப் பெற்ற பின்னர், வேலைவாய்ப்புப் பதிவுக்காக வேலைவாய்ப்பு அலுவலகத்தை நேரில் அணுக வேண்டிய அவசியமில்லை.
பதிவு செய்யும் முறை:
பத்தாம் வகுப்பு கல்வித் தகுதியை மொபைல் ஆப்பில் பதிவு செய்யும் வழிமுறைகள் மற்றும் விவரங்கள் தொழிலாளர் துறையின் அதிகாரப்பூர்வ இணையதளங்களான https://labour.py.gov.in மற்றும் https://ee.py.gov.in ஆகியவற்றில் வழங்கப்படும்.
முதுநிலை (Seniority) பாதிக்கப்படாது:
பத்தாம் வகுப்பு மூப்பைப் (Seniority) பொறுத்தவரை, மாணவர்கள் பதியும் தேதியே அவர்களின் மூப்புத் தேதியாகக் கருதப்படும். இந்த மொபைல் ஆப் லிங்கைப் பயன்படுத்தி, மாணவர்கள் தங்களின் கல்வித் தகுதியைப் பதிந்து, அடையாள அட்டையையும் நேரடியாகப் பதிவிறக்கம் செய்து கொள்ளலாம். மேலும், இந்த ஆப் மூலம் தங்களது பிராந்தியம், பத்தாம் வகுப்பு ஏழு இலக்க எண், பிறந்த தேதி மற்றும் இதர விவரங்களைப் பதிந்து, தங்களது பதிவு எண்ணையும் எளிதாகப் பதிவிறக்கம் செய்யலாம்.
இவ்வாறு அந்தச் செய்திக்குறிப்பில் கூறப்பட்டுள்ளது.
தலைப்பு செய்திகள்
ட்ரெண்டிங் செய்திகள்
