மயிலாடுதுறை மாணவர்களுக்கு அரசின் சூப்பர் சலுகைகள்! இலவச தங்குமிடம், உணவு, சீருடை மற்றும் பல!
மயிலாடுதுறை மாவட்டத்தில் பிற்படுத்தப்பட்டோர், மிகப்பிற்படுத்தப்பட்டோர் மற்றும் சீர்மரபினருக்கான அரசு விடுதிகளை மாணவ, மாணவியர்கள் பயன்படுத்திகொள்ள மாவட்ட ஆட்சியர் வேண்டுகோள் விடுத்துள்ளார்.
மயிலாடுதுறை மாவட்டத்தில் பிற்படுத்தப்பட்டோர், மிகப்பிற்படுத்தப்பட்டோர் மற்றும் சீர்மரபினர் பிரிவைச் சேர்ந்த பள்ளி மற்றும் கல்லூரி மாணவ, மாணவியரின் கல்வி மற்றும் தங்குமிடத் தேவைகளைப் பூர்த்தி செய்யும் வகையில், தமிழ்நாடு அரசால் மொத்தம் 20 விடுதிகள் சிறப்பாகச் செயல்பட்டு வருகின்றன. இந்த விடுதிகள் மூலம் மாணவர்கள் எவ்வித செலவின்றி தங்கிப் படிப்பதற்கான அரிய வாய்ப்பை மாவட்ட நிர்வாகம் வழங்குகிறது. இந்த வசதிகளைப் பயன்படுத்திக் கொள்ள வேண்டும் என மாவட்ட ஆட்சியர் ஹெச்.எஸ். ஸ்ரீகாந்த் மாணவ, மாணவியர் மற்றும் பெற்றோர்களுக்கு வேண்டுகோள் விடுத்துள்ளார்.
மயிலாடுதுறை மாவட்டத்தில் செயல்படும் விடுதிகளின் விபரம்
- பள்ளி மாணவர்களுக்கான விடுதிகள்: 6
- பள்ளி மாணவியர்களுக்கான விடுதிகள்: 7
- கல்லூரி மாணவர்களுக்கான விடுதிகள்: 4
- கல்லூரி மாணவியர்களுக்கான விடுதிகள்: 3
இந்த விடுதிகள் மூலம் பள்ளி மற்றும் கல்லூரி மாணவர்கள் என இரு பிரிவினரும் பயனடைய முடியும்.
யார் விண்ணப்பிக்கலாம்?
இந்த அரசு விடுதிகளில் சேர சில தகுதிகள் நிர்ணயிக்கப்பட்டுள்ளன.
பள்ளி விடுதிகளில் சேர 4 ஆம் வகுப்பு முதல் 12 ஆம் வகுப்பு வரை பயிலும் மாணவ, மாணவியர் சேரத் தகுதியுடையவர்கள்.
கல்லூரி விடுதிகளில் பட்டப்படிப்பு, பட்ட மேற்படிப்பு, ஐடிஐ மற்றும் பாலிடெக்னிக் படிப்புகளில் பயிலும் மாணவ, மாணவியர் இந்த விடுதிகளில் சேரலாம்.
வழங்கப்படும் சலுகைகள்
இந்த விடுதிகளில் தங்கிப் படிக்கும் மாணவ, மாணவியருக்கு தமிழ்நாடு அரசு பல்வேறு சலுகைகளை வழங்குகிறது.
- முழுமையான உணவு மற்றும் தங்குமிடம்: அனைத்து விடுதி மாணவ, மாணவியருக்கும் மூன்று வேளை சத்தான உணவுடன், பாதுகாப்பான மற்றும் சுகாதாரமான தங்குமிட வசதியும் அளிக்கப்படும்.
சீருடைகள்: 10 ஆம் வகுப்பு வரை பயிலும் மாணவ, மாணவியருக்கு ஆண்டுதோறும் 4 இணை சீருடைகள் தைத்து வழங்கப்படும்.
கல்வி மேம்பாட்டு வசதிகள்
போட்டித் தேர்வுகளுக்குத் தயாராகும் மாணவர்களுக்கு உதவும் வகையில் 10 ஆம் வகுப்பு மற்றும் 12 ஆம் வகுப்பு பயிலும் மாணவ, மாணவியர்களின் கல்வித் திறனை மேம்படுத்தும் பொருட்டு, NEET/JEE நுழைவுத்தேர்வுக்கான வினா வங்கி நூல்கள், சிறப்பு வழிகாட்டிகள் மற்றும் பிற வினா வங்கி நூல்கள் வழங்கப்படும்.
பயன்பாட்டுப் பொருட்கள்:
கல்லூரி விடுதிகளில் முதலாம் ஆண்டு தங்கிப் பயிலும் மாணவ, மாணவியருக்கு பாய்களும், பள்ளி விடுதிகளில் தங்கிப் பயிலும் மாணவ, மாணவியருக்கு ஆண்டுதோறும் பாய்களும் வழங்கப்படும்.
மேலும் பள்ளி மற்றும் கல்லூரி விடுதிகளில் தங்கிப் பயிலும் அனைத்து மாணவ, மாணவியர்களுக்கும் இரண்டு ஆண்டுகளுக்கு ஒருமுறை போர்வைகள் வழங்கப்படும். மலைப்பிரதேசங்களில் இயங்கும் விடுதிகளில் கம்பளி மேலாடைகள் கூடுதலாக வழங்கப்படும்.
விடுதிகளில் சேர்வதற்கான தகுதிகள்
வருமான வரம்பு: பெற்றோர் அல்லது பாதுகாவலரின் ஆண்டு வருமானம் ரூ.2,00,000/-க்கு மிகாமல் இருக்க வேண்டும்.
இதன் மூலம் பொருளாதார ரீதியாக பின்தங்கிய மாணவர்களுக்கு முன்னுரிமை அளிக்கிறது.
தொலைவு விதி: இருப்பிடத்தில் இருந்து பயிலும் கல்வி நிலையத்தின் தொலைவு குறைந்தபட்சம் 8 கிலோமீட்டருக்கு மேல் இருக்க வேண்டும். எனினும், இந்த தூர விதி மாணவியருக்குப் பொருந்தாது என்பது குறிப்பிடத்தக்கது.
இது கிராமப்புற மற்றும் தொலைதூரப் பகுதிகளில் இருந்து வரும் மாணவிகளுக்கு சிறப்புச் சலுகை அளிக்கிறது.
விண்ணப்ப நடைமுறை மற்றும் காலக்கெடு
தகுதியுடைய மாணவ, மாணவியர் விண்ணப்பங்களை இலவசமாகப் பெற்றுக்கொள்ளலாம்.
விண்ணப்பங்கள் பெறும் இடங்கள்: சம்பந்தப்பட்ட விடுதி காப்பாளர்/காப்பாளினிகளிடமிருந்தோ அல்லது மாவட்ட ஆட்சியர் அலுவலகத்தில் உள்ள மாவட்ட பிற்படுத்தப்பட்டோர் மற்றும் சிறுபான்மையினர் நல அலுவலகத்திலிருந்தோ விண்ணப்பங்களைப் பெற்றுக்கொள்ளலாம்.
விண்ணப்பங்களைச் சமர்ப்பிப்பதற்கான காலக்கெடு
பள்ளி விடுதிகள்: பூர்த்தி செய்யப்பட்ட விண்ணப்பங்கள் சம்பந்தப்பட்ட விடுதி காப்பாளர்/காப்பாளினியிடம் அல்லது மாவட்ட பிற்படுத்தப்பட்டோர் மற்றும் சிறுபான்மையினர் நல அலுவலகத்தில் 2025 ஆம் ஆண்டு ஜூன் மாதம் 18 ஆம் தேதிக்குள் சமர்ப்பிக்கப்பட வேண்டும்.
கல்லூரி விடுதிகள்: பூர்த்தி செய்யப்பட்ட விண்ணப்பங்கள் சம்பந்தப்பட்ட விடுதி காப்பாளர்/காப்பாளினியிடம் அல்லது மாவட்ட பிற்படுத்தப்பட்டோர் மற்றும் சிறுபான்மையினர் நல அலுவலகத்தில் 2025 ஆம் ஆண்டு ஜூலை மாதம் 15 ஆம் தேதிக்குள் சமர்ப்பிக்கப்பட வேண்டும்.
முக்கிய குறிப்பு: மாணவ, மாணவியர்கள் விண்ணப்பிக்கும் போது சாதி மற்றும் பெற்றோரது ஆண்டு வருமானம் குறித்த சான்றிதழ்கள் எதையும் அளிக்கத் தேவையில்லை. விடுதியில் சேரும் போது மட்டும் இச்சான்றிதழ்களை அளித்தால் போதுமானது.
இலங்கைத் தமிழர்களின் குழந்தைகளுக்கான சிறப்பு ஒதுக்கீடு:
தமிழ்நாட்டில் உள்ள ஒவ்வொரு விடுதியிலும் முகாம்வாழ் இலங்கைத் தமிழர்களின் குழந்தைகளுக்கென தனியே 5 இடங்கள் ஏற்படுத்தப்பட்டுள்ளன.
தலைப்பு செய்திகள்
ட்ரெண்டிங் செய்திகள்
