நெல்லை: லஞ்ச புகாரில் கையும் களவுமாக சிக்கிய நில அளவையர், உதவியாளர்

அப்போது அவர் அந்த பணத்தை தன்னுடைய உதவியாளர் சாந்தியிடம் கொடுக்குமாறு கூறினார்.

கைது செய்யப்பட்ட நில அளவையர்

நெல்லை மாவட்டம் கங்கைகொண்டானை அடுத்த வடகரை பகுதியைச் சேர்ந்தவர் புதுமாடசாமி(44). இவர் தேங்காய் வியாபாரியாக இருந்து வருகிறார். இவரது சகோதரர் மகாராஜன். இவர்கள்  இருவரும் தங்களுக்கு சொந்தமான 52 சென்ட் இடத்தை தனித்தனியாக பட்டா போடுவதற்கு கங்கைகொண்டான் பகுதி-1 கிராம நிர்வாக அலுவலகத்தில் மனு செய்துள்ளனர். இதனை தொடர்ந்து நிலத்தை அளவு செய்து பட்டா வழங்கும் நடவடிக்கைகளுக்கு  நில அளவையர் லிங்கம்மாள்  பட்டா ஒன்றிற்கு ரூ. 30,000 லஞ்சமாக கேட்டதாக கூறப்படுகிறது. லஞ்சம் கொடுக்க மனமில்லாத சகோதரர்கள் பணம் கொடுக்க மறுத்ததாக தெரிகிறது.  

தொடர்ந்து நில அளவையர் லஞ்சம் கேட்ட நிலையில் பேச்சுவார்த்தை நடத்தி பட்டா ஒன்றுக்கு ரூ. 25,000 தருவதாக பேசியுள்ளனர். எனினும்  லஞ்சம் கொடுக்க மனம் இல்லாததால் இதுகுறித்து  நெல்லை மாவட்ட லஞ்ச ஒழிப்பு போலீசாரிடம் புகார் கொடுத்துள்ளனர். அதன்படி லஞ்ச ஒழிப்பு டிஎஸ்பி மெக்லரின் எஸ்கால் தலைமையில் அவர்  அறிவுறுத்தலின்படி  நில அளவை செய்வதற்கு பணத்தை புதுமாடசாமியின் சகோதரர் நில அளவையர் லிங்கமாவிடம் கொடுத்தார். அப்போது அவர் அந்த பணத்தை தன்னுடைய உதவியாளர் சாந்தியிடம் கொடுக்குமாறு கூறினார். சாந்தி அதனை பெற்றுக் கொண்டார். அப்போது அங்கு மறைந்திருந்த லஞ்ச ஒழிப்புத்துறை போலீசார் கையும், களவுமாக இருவரையும் பிடித்தனர். அவர்களிடம் விசாரணை நடத்திய லஞ்ச ஒழிப்பு போலீசார் கிராம நிர்வாக அலுவலகத்திலும் சோதனை மேற்கொண்டனர். தொடர்ந்து அவர்களிடமிருந்து லஞ்ச பணம் 25 ஆயிரம் ரூபாய் பறிமுதல் செய்யப்பட்டது. அவர்களை கைது செய்த லஞ்ச ஒழிப்பு போலீசார்  நெல்லை லஞ்ச ஒழிப்பு நீதிமன்ற நீதிபதி (பொறுப்பு) மனோஜ்குமார் முன்னிலையில் ஆஜர்படுத்தி சிறையில் அடைத்தனர். லஞ்ச புகாரில் நில அளவையர் மற்றும் உதவியாளர் என இரண்டு பெண்கள் கையும் களவுமாக பிடிபட்டு கைது செய்யப்பட்ட சம்பவம் நெல்லையில் பெரும் பரபரப்பை ஏற்படுத்தி உள்ளது..