TVK Candidate List: பெரம்பூரில் களமிறங்கும் விஜய்? ஆதவ், ஆனந்த் எங்கே? தவெக வேட்பாளர் பட்டியல் வெளியீடு! பரபரப்பு தகவல்!
TVK Candidate List Tamil Nadu Election 2026: தேர்தலில் போட்டியிடும் தவெக முதற்கட்ட வேட்பாளர் பட்டியல் நாளை (மார்ச் 18) அல்லது நாளை மறுநாள் வெளியாகலாம் என்றும் தகவல் கசிந்துள்ளது.
தமிழக வெற்றிக் கழகத்தின் உத்தேச வேட்பாளர் பட்டியல் வெளியாகி உள்ளது. இதன்படி பெரம்பூர் தொகுதியில் அக்கட்சியின் தலைவர் விஜய் களமிறங்குகிறார். பொதுச் செயலாளர் புஸ்ஸி ஆனந்த், தி நகர் தொகுதியிலும் தேர்தல் வியூக மேலாண்மைப் பொதுச் செயலாளர் ஆதவ் அர்ஜூனா வில்லிவாக்கம் தொகுதியிலும் போட்டியிட உள்ளனராம்.
ஏப்ரல் 23-ல் தேர்தல்
தமிழக சட்டமன்ற தேர்தல் ஏப்ரல் 23ஆம் தேதி நடைபெற உள்ளது. இதையொட்டி கட்சிகள் அனைத்தும் அனல்பறக்கத் தேர்தல் பணிகளைத் தொடங்கி உள்ளன.
திமுக 19 கட்சிகளோடு கூட்டணியை இறுதி செய்துள்ளது. அதிமுக தலைமையில் பாஜக, அன்புமணி பாமக உள்ளிட்ட சில கட்சிகள் இணைந்துள்ளன. இரு கட்சிகளும் கூட்டணிக் கட்சிகளோடு தொகுதிப் பங்கீடு மும்முரமாக நடந்து வருகிறது.
தனித்துக் களமிறங்கும் தவெக
இதற்கிடையே விஜய் தலைமையில் கடந்த 2 ஆண்டுகளுக்கு முன்னால் உருவாக்கப்பட்ட தமிழக வெற்றிக் கழகம் தனித்துக் களம் காண்பதாகவே தெரிகிறது. முன்னதாக பாஜகவின் தேசிய ஜனநாயகக் கூட்டணியில் தவெக இணைய முயற்சிகள் எடுக்கப்பட்டு வருவதாகத் தகவல்கள் வெளியாகின. எனினும் இந்தத் தகவல்களை தவெக நிர்வாகிகள் செங்கோட்டையன், சிடிஆர் நிர்மல் குமார் ஆகியோர் மறுத்தனர்.
இந்த நிலையில் தவெக சார்பில் போட்டியிட பிப்ரவரி 20ஆம் தேதி வரை விருப்ப மனுக்கள் பெறப்பட்டன. தொடர்ந்து வேட்பாளர் நேர்காணல் நடந்து வந்தது. முதற்கட்டமாக இறுதி செய்யப்பட்ட வேட்பாளர்களை, விஜய் நேரடியாக நேர்காணல் செய்தார். இதற்காக டெல்லி சிபிஐ விசாரணையையே ஒத்திவைத்தார் விஜய்.
நாளை வெளியாகும் பட்டியல்?
இந்த நிலையில் தேர்தலில் போட்டியிடும் தவெக வேட்பாளர் தேர்வு முடிந்துள்ளதாக பனையூர் வட்டாரம் தெரிவிக்கிறது. முதற்கட்ட வேட்பாளர் பட்டியல் நாளை (மார்ச் 18) அல்லது நாளை மறுநாள் வெளியாகலாம் என்றும் தகவல் கசிந்துள்ளது.
யார் யாருக்கு என்னென்ன தொகுதி?
விஜய்- பெரம்பூர்
செங்கோட்டையன் – கோபிச்செட்டி பாளையம்
ஆதவ் அர்ஜூனா- வில்லிவாக்கம்
புஸ்ஸி என்.ஆனந்த்- தி நகர் அல்லது விழுப்புரம்
மைலாப்பூர்- வெங்கட்ராமன்
ஜேசிடி பிரபாகர்- ஆயிரம் விளக்கு
மரிய வில்சன் – ஆர்.கே.நகர்
அருண் ராஜ்- திருச்செங்கோடு
ஆரம்பத்தில் விஜய் ’வி’ ராசியில், வேளச்சேரி தொகுதியில் போட்டியிடுவார் என்று கூறப்பட்டு வந்த நிலையில், தற்போது உத்தேசப் பட்டியல் வெளியாகி உள்ளது. இதற்கிடையே பெரம்பூர் பகுதியில் தவெக சார்பில் தேர்தல் பணிமனைகள் மும்முரமாக உருவாக்கப்பட்டு வருகின்றன.
மா.செ.க்களுக்கும் வாய்ப்பு
தவெக தலைமை நிர்வாகிகள் போட்டியிடுவதற்கு மத்தியில், சில மாவட்டச் செயலாளர்களுக்கும் வாய்ப்பு வழங்கப்பட்டு உள்ளது. தஞ்சை மத்திய மாவட்டச் செயலாளர் சரவணன், திருவள்ளூர் மேற்கு மாவட்டச் செயலாளர் பிரபு உள்ளிட்டோரும் வேட்பாளர் நேர்காணலுக்காக வந்ததாகத் தகவல் வெளியாகி உள்ளது.
தலைப்பு செய்திகள்
ட்ரெண்டிங் செய்திகள்
