Crime: குடும்பத் தகராறில் காதல் மனைவியை வெட்டிய கணவர் தற்கொலை..!

மயிலாடுதுறை அருகே குடும்பத் தகராறு காரணமாக மனைவியை அரிவாளால் வெட்டிவிட்டு கணவன் தூக்கிட்டு தற்கொலை செய்து கொண்ட சம்பவம் பரபரப்பை ஏற்படுத்தியுள்ளது.

தற்கொலை

மயிலாடுதுறை மாவட்டம் தரங்கம்பாடி தாலுக்கா கீழப்பெரம்பூர் சித்தி விநாயகர் நகரை சேர்ந்தவர் தம்புசாமி என்பவரின் மகன் 62 வயதான அறிவழகன். அறிவழகனுக்கு ஏற்கனவே திருமணம் ஆகி அவர் மனைவி மற்றும் குழந்தைகளை பிரிந்துள்ளார். பின்னர் 15 ஆண்டுகளுக்கு முன்பு பிரேமா என்கிற 45 வயதான ஜெயினா பீவி என்பவரை அறிவழகன் இரண்டாவதாக காதல் திருமணம் செய்துள்ளார். 

இந்நிலையில் கடந்த 20 ஆண்டுகளுக்கு மேல் வெளிநாட்டில் பணியாற்றிய இவர் கடந்த ஒரு ஆண்டாக ஊரிலேயே தங்கியுள்ளார். இத்தம்பதியினருக்கு குழந்தைகள் இல்லை. இவருக்கும் இவரது காதல் மனைவியான ஜெயினா பீவிக்கும் இடையே அடிக்கடி குடும்ப தகராறு ஏற்பட்டுள்ளது. அதேபோன்று நேற்று இரவும் கணவன் மனைவி இடையே மீண்டும் தகராறு ஏற்பட்டுள்ளது.  இதில் மனைவி ஜெயினா பீவியை அறிவழகன் அரிவாளால் வெட்டி விட்டு தானும் தூக்கிட்டு தற்கொலை செய்து கொண்டுள்ளார்.

இன்று காலை நீண்ட நேரம் ஆகியும் வீட்டின் கதவு திறக்கப்படாததை அடுத்து, அறிவழகனின் உறவினர்கள் கதவை உடைத்து அறிவழகனின் வீட்டின் உள்ளே சென்று பார்த்துள்ளனர். அப்போது  ஜெரினா பீவி வெட்டு காயங்களுடன் ரத்த வெள்ளத்தில் உயிருக்கு போராடியதையும், அறிவழகன் தூக்கில் தொங்கியபடி இறந்திருந்ததையும் கண்டு அதிர்ச்சி அடைந்தனர். இதனை அடுத்து அவர்கள் காவல்துறையினருக்கும் அளித்த தகவல்களின் பேரில் பெரம்பூர் காவல்துறையினர் சம்பவ இடத்திற்கு விரைந்து சென்று ஜெயினா பீவியை மீட்டு சிகிச்சைக்காக உறவினர்கள் உதவியுடன் ஆம்புலன்ஸ் மூலம் தஞ்சாவூர் தனியார் மருத்துவமனைக்கு கொண்டுச் சேர்த்தனர். 

தொடர்ந்து இறந்த அறிவழகனின் உடலை கைப்பற்றி உடற்கூறு ஆய்வுக்காக மயிலாடுதுறை அரசு பெரியார் மருத்துவமனைக்கு அனுப்பி வைத்தனர். மேலும், காவல்துறையினர் நடத்திய விசாரணையில் கணவன், மனைவி இடையே ஏற்பட்ட தகராறினால் ஆத்திரமடைந்த அறிவழகன் அரிவாளால் மனைவியை வெட்டியுள்ளார். இதில் ஜெரினா பீவி படுகாயம் அடைந்து உயிருக்கு போராடியுள்ளார். அதனைக் கண்டு மனம் உடைந்த அறிவழகன், ஜெயினாபீவியின் கண் முன்னே தூக்கிட்டு தற்கொலை செய்து கொண்டது தெரியவந்தது. இதுகுறித்து பெரம்பூர் காவல்நிலையத்தில் வழக்கு பதிவு செய்து விசாரணை மேற்கொண்டுள்ளனர். இச்சம்பவம் அப்பகுதியில் பரபரப்பு பெரும் ஏற்படுத்தியுள்ளது.

மன உளைச்சலோ, தற்கொலை எண்ணமோ மேலிடும்போது உரிய ஆலோசனை பெற்றால் புதிய வாழ்க்கை அவர்களுக்காக காத்துக்கொண்டிருக்கிறது. அதற்காகவே சினேகா போன்ற தன்னார்வ தொண்டு நிறுவனங்கள் சேவை ஆற்றி வருகின்றன. அவர்களை தொடர்பு கொண்டு இலவசமாக ஆலோசனை பெறலாம். சினேகா தன்னார்வ தொண்டு நிறுவனம்,

எண்; 11, பார்க் வியூவ் சாலை, ஆர்.ஏ. புரம்,

சென்னை - 600 028.

தொலைபேசி எண் - (+91 44 2464 0050, +91 44 2464 0060)