திண்டுக்கல் அருகே கட்டிட தொழிலாளி மர்ம கொலை; உறவினர்கள் சாலைமறியல்

வத்தலக்குண்டு அருகே கட்டிட வேலை செய்து வந்தவர் மர்மமான முறையில் கொலை செய்யப்பட்ட சம்பவத்தால் பரபரப்பு. கொலையாளிகளை உடனடியாக கைது செய்யக் கூறி உறவினர்கள் சாலை மறியல்.

கொலை செய்யப்பட்டவர்

திண்டுக்கல் மாவட்டம் வத்தலக்குண்டுவை அடுத்த பழைய வத்தலக்குண்டு பட்டாளம்மன் கோவில் பகுதியை சேர்ந்தவர் பாண்டியராஜன் (வயது 35). இவர் அப்பகுதியில் கட்டிட வேலை செய்து வந்துள்ளார். இவருக்கு திருமணமாகி மனைவி, 2 மகள்கள், ஒரு மகன் உள்ளனர். இந்தநிலையில், பாண்டியராஜன் நேற்று காலை வத்தலக்குண்டுவில், திண்டுக்கல் சாலையில் உள்ள தனியார் பெட்ரோல் விற்பனை நிலையத்துக்கு பின்புறம் காட்டுப்பகுதியில் ரத்த காயங்களுடன் சடலமாக இறந்துகிடந்தார்.

இதனை பார்த்த அக்கம்பக்கத்தினர் உடனடியாக வத்தலக்குண்டு போலீசாருக்கு தகவல் தெரிவித்தனர். அதன்பேரில் காவல் ஆய்வாளர் முருகன் தலைமையிலான போலீசார் சம்பவ இடத்துக்கு விரைந்து வந்து பார்வையிட்டனர். பின்னர் இறந்துகிடந்த பாண்டியராஜனின் உடலை கைப்பற்றி பிரேத பரிசோதனைக்காக வத்தலக்குண்டு அரசு மருத்துவமனைக்கு அனுப்பி வைத்தனர். பின்னர் இதுதொடர்பாக போலீசார் வழக்குப்பதிவு செய்து விசாரணை நடத்தி வருகின்றனர்.

முதற்கட்ட விசாரணையில், பாண்டியராஜனை மர்மகும்பல் கத்தியால் சரமாரியாக குத்திக்கொலை செய்துவிட்டு, உடலை இப்பகுதியில் போட்டுவிட்டு சென்றது தெரியவந்தது. இதற்கிடையே சம்பவ இடத்திற்கு திண்டுக்கல் மாவட்ட காவல் கண்காணிப்பாளர்  பாஸ்கரன் சம்பவ இடத்தை பார்வையிட்டார். பின்னர் மோப்பநாய் டிம்பி வரவழைக்கப்பட்டு அப்பகுதியை சோதனை செய்தனர் போலீசார். இதையடுத்து பாண்டியராஜன் முன்விரோதத்தில் கொலை செய்யப்பட்டாரா? அல்லது வேறு ஏதேனும் காரணத்தால் கொலை செய்யப்பட்டாரா? கொலை செய்த மர்மநபர்கள் யார்? என்பது குறித்து தனிப்படை அமைத்து போலீசார் தீவிர விசாரணை நடத்தி வருகின்றனர்.

இதற்கிடைேய கொலை செய்த மர்மநபர்களை கைது செய்யக்கோரி பாண்டியராஜனின் உறவினர்கள் வத்தலக்குண்டு காவல் நிலையம் முன்பு பெரியகுளம் சாலையில் மறியலில் ஈடுபட்டனர். இதையடுத்து போலீசார் சம்பவ இடத்துக்கு வந்து பேச்சுவார்த்தை நடத்தினர். அப்போது குற்றவாளிகள் விரைந்து கைது செய்யப்படுவார்கள் என்று கூறினர். அதைத்தொடர்ந்து உறவினர்கள் மறியலை கைவிட்டு கலைந்து சென்றனர்.இந்த கொலை சம்பவம் வத்தலக்குணடுவில் பெரும் பரபரப்பை ஏற்படுத்தியது.