Iran Dancing Missile: ஈரானின் ‘டான்ஸிங் ரோஸ்.!‘; முதல் முறையாக செஜ்ஜில் ஏவுகணையை வீசி தாக்குதல்; சிதறிய இஸ்ரேல்

Iran Sejjil Missile: அமெரிக்கா-இஸ்ரேலுக்கு எதிரான போரில், டான்ஸிங் ஏவுகணை என்று அழைக்கப்படும் செஜ்ஜில் ஏவுகணையை முதல் முறையாக ஈரான் பயன்படுத்தியுள்ளது. அந்த ஏவுகணை குறித்து இப்போது பார்க்கலாம்.

முதல் முறையாக டான்ஸிங் ஏவுகணை எனப்படும் செஜ்ஜில் ஏவுகணையை பயன்படுத்திய ஈரான்

Source : X

இஸ்ரேலுடன் இணைந்து ஈரான் மீது போர் தொடுத்துள்ளது அமெரிக்கா. இந்த போர் நாளுக்கு நாள் தீவிரமடைந்து வருகிறது. இரு தரப்பும் மாறி மாறி பெரிய அளவில் தாக்குதல்களை நடத்தி வருகின்றன. அதில், ஈரான் அவ்வப்போது தாங்கள் தயாரித்த புது ஆயுதங்களை களமிறக்கி, சர்வதேச அளவில் ஆச்சர்யத்தை ஏற்படுத்தி வருகிறது. அந்த வரிசையில், டான்ஸிங் ஏவுகணை என்று அழைக்கப்படும் செஜ்ஜில் ஏவுகணையை முதல் முறையாக இந்த போரில் பயன்படுத்தி, இஸ்ரேலை சிதறடித்துள்ளது. இந்த ஏவுகணை என்ன செய்யும்.? பார்க்கலாம்.

செஜ்ஜில் ஏவுகணையை களமிறக்கிய ஈரான்

இஸ்ரேலுக்கு எதிரான போரில், நேற்று தங்களது ஆப்ரேஷன் ட்ரூ ப்ராமிஸ் 4-ன் ஒரு பகுதியாக, 54-வது அலை தாக்குதலை நடத்தியது ஈரான் புரட்சிகர காவல்படையான IRGC. இந்த தாக்குதலில், 2 டன் எடையுள்ள போர்முனை பொருத்தப்பட்ட சூப்பர் கனரக கோர்ரம்ஷஹர் ஏவுகணைகள், கைபர்-ஷேகன்(கைபர் பஸ்ட்டர்), காதர், எமாத் ஏவுகணைகள் ஏவப்பட்டதாக ஈரான் அரசின் ஒரு அறிக்கையில் தெரிவிக்கப்பட்டுள்ளது.

இவைகளுடன், இந்த போர் தொடங்கியதில் இருந்து முதன் முறையாக, இஸ்ரேல் ஆட்சியின் வான்வழி நடவடிக்கைகளில் பாதிப்புகளை ஏற்படுத்தும் விதமாக, அதன் மேலாண்மை மற்றும் முடிவெடுக்கும் மையங்களின் மீது, மூலோபாய மற்றும் திட எரிபொளால் இயங்கும் ஏவுகணையான செஜ்ஜில் 2(Sejjil 2) ஏவுகணை ஏவப்பட்டதாக குறிப்பிடப்பட்டுள்ளது.

இதன் மூலம், இஸ்ரேலின் ராணுவ பாதுகாப்புத் தொழில்களில் ஆதிக்கம் செலுத்தும் முக்கிய உள்கட்டமைப்புகள், இஸ்ரேலின் ராணுவப் படைகள் ஒன்றுகூடும் இடங்கள் இருக்கும் பிரதேசத்தின் மையப் பகுதியில் தாக்குதல் நடத்தப்பட்டதாக IRGC தெரிவித்துள்ளது.

இந்த ஏவுகணை ஏவப்பட்ட வீடியோ இணையத்திலும் பரவி வருகிறது.

Iran using the Sejjil for the first time tells you everything.

Liquid-fueled missiles take hours to set up... With Israeli and U.S. eyes on every launcher, those are death traps. Solid fuel launches in minutes.

But Iran has far fewer of them. The escalation is a sign of… pic.twitter.com/dFNFX8BqKo

— Open Source Intel (@Osint613) March 15, 2026

செஜ்ஜில் ஏவுகணை என்பது என்ன.?

இஸ்ரேலுக்கு எதிரான போரில் முதன் முறையாக இந்த  செஜ்ஜில் 2 ஏவுகணையை ஈரான் பயன்படுத்தியுள்ளது. ஈரானின் சொந்த தயாரிப்பான இந்த ஏவுகணைக்கு, டான்ஸிங் ஏவுகணை(Dancing Missile) என்றும் ஒரு பெயர் உண்டு. அதாவது, எதிரி நாட்டின் பாதுகாப்பு ரேடார்களில் சிக்காமல், அவற்றை எளிதாக ஏமாற்றக் கூடியது என்பதால், இதற்கு டான்ஸிங் ஏவுகணை என்று பெயர். அதேபோல், இந்த ஏவுகணையில் திரவ எரிபொருளுக்கு பதிலாக, திட எரிபொருள் பயன்படுத்தப்படுகிறது. இதன் காரணமாக, இந்த ஏவுகணை மிகவும் வேகமாக பயணிக்கும். எதிரி நாட்டு ரேடார்களால் இதன் திசையை கணிக்க முடியாத அளவிற்கு இது வேகமானது.

இதற்கு, அஷோரா அல்லது அஷுரா என்றும் பெயர்கள் உள்ளன. இது சுமார் 2,000 முதல் 2,500 கிலோமீட்டர் தூரம் வரை, தோராயமாக 700 கிலோகிராம் எடையை சுமந்து செல்லும் திறன் கொண்ட நடுத்தர தூர பாலிஸ்டிக் ஏவுகணையாகும் (MRBM). அதிக உயரத்தில் சென்று சூழ்ச்சிகளை செய்து, இஸ்ரேலின் இரும்பு டோம் போன்ற ஏவுகணை பாதுகாப்பு அமைப்புகளை ஏமாற்றும் திறன் கொண்டதால், இதற்கு டான்ஸிங் ஏவுகணை என்ற செல்லப் பெயர் வைக்கப்பட்டுள்ளது.

மூலோபாய மற்றும் சர்வதேச ஆய்வுகள் மையத்தின்(CSIS) தகவலின்படி, இந்த ஏவுகணை சுமார் 18 மீட்டர் நீளம், சுமார் 1.25 மீட்டர் விட்டம் மற்றும் ஏவுதல் எடை தோராயமாக 23,600 கிலோகிராம் ஆகும். செஜ்ஜில் அமைப்பின் பணிகள் 1990-களின் முற்பகுதியில் தொடங்கி, முதல் சோதனை 2008-ல் நடத்தப்பட்டுள்ளது. அப்போது இந்த ஏவுகணை சுமார் 800 கிலோமீட்டர் தூரம் பயணித்ததாகக் கூறப்படுகிறது.

பின்னர், 2009-ல் இரண்டாவது சோதனை அதன் வழிகாட்டுதல் மற்றும் வழிசெலுத்தல் அமைப்புகளில் மேம்பாடுகளை மதிப்பிடுவதை நோக்கமாகக் கொண்டு நடத்தப்பட்டுள்ளது. அடுத்தடுத்த சோதனைகளில் சுமார் 1,900 கிலோமீட்டர் வரையிலான வரம்பை இந்த ஏவுகணை காட்டியதாகக் கூறப்படுகிறது. ஈரான் இந்த அமைப்பின் பல வகைகளை உருவாக்கியுள்ளதாக நம்பப்படுகிறது. அதில் செஜ்ஜில்-2-வும் அடங்கும், அதே நேரத்தில், செஜ்ஜில்-3 வகை ஏவுகணை உருவாக்கத்தில் இருக்கலாம் என்றும் தகவல்கள் தெரிவிக்கின்றன.