மயிலாடுதுறை: ஆன்லைன் மோசடி வலையில் சிக்கி கோடிகளை இழந்த நபர்கள்! சைபர் கிரைம் போலீசார் அதிரடி நடவடிக்கை..
மயிலாடுதுறையில் போலியான ஆன்லைன் வர்த்தக லிங்கை நம்பி கோடிக்கணக்கில் பணத்தை இழந்த நிலையில் சைபர் கிரைம் போலீஸார் அதிரடி நடவடிக்கையால் குறிப்பிட்ட பணம் மீட்கப்பட்டுள்ளது.
மயிலாடுதுறை: சமூக வலைதளங்கள் மூலம் வந்த போலியான இணைப்புகளைப் (links) பயன்படுத்தி ஆன்லைன் வர்த்தகத்தில் (Online Trading) பணப் பரிவர்த்தனை செய்து பணத்தை இழந்த இருவர் தொடர்பான புகார்களின் பேரில், மயிலாடுதுறை மாவட்ட சைபர் கிரைம் காவல்துறையினர் உடனடியாக நடவடிக்கை எடுத்துள்ளனர். இழந்த பணத்தில் ஒரு பகுதி காவல்துறையினரால் மீட்கப்பட்டு, நீதிமன்றம் மூலம் பாதிக்கப்பட்டவரின் வங்கிக் கணக்கில் வரவு வைக்கப்பட்டுள்ளது. எஞ்சிய தொகையை மீட்கும் பணி தீவிரமாக நடைபெற்று வருகிறது.
முதல் வழக்கு: போலியான செயலி மூலம் ₹ 72 லட்சத்து 2,701/- இழப்பு
மயிலாடுதுறை மாவட்டத்தைச் சேர்ந்த ஒருவருக்கு, இணையதள வர்த்தகம் செய்வது தொடர்பாக ஒரு ஆன்லைன் இணைப்பு (Online Link) அவரது வாட்ஸ்அப் எண்ணுக்கு வந்துள்ளது. அந்த இணைப்பைத் தொட்டவுடன், அவர் 'VIP Trading' என்ற வாட்ஸ்அப் குழுவிற்கு அழைத்துச் செல்லப்பட்டார். அந்தக் குழுவில் இருந்த அறிமுகமில்லாத நபர்கள், ஆன்லைன் டிரேடிங் மூலம் அதிக லாபம் பெற்றதாகத் தகவல்களைப் பகிர்ந்துள்ளனர்.
இதை நம்பிய அந்த நபர், குழு மூலம் அனுப்பப்பட்ட 'Shoonaxhni' என்ற ஆண்ட்ராய்டு செயலியை தனது செல்போனில் பதிவிறக்கம் செய்து, அதில் தனது வங்கிக் கணக்குகள் மற்றும் தனிப்பட்ட தகவல்களைப் பதிவு செய்துள்ளார்.
ஆன்லைன் டிரேடிங் மூலம் அந்த நபர் செலுத்திய சிறிய தொகைப் பரிவர்த்தனைகள் அனைத்தும், அந்தச் செயலியில் உள்ள 'Wallet' என்ற பிரிவில் 'Virtual Amount' ஆகக் காண்பிக்கப்பட்டுள்ளது. இது தனது வங்கிக் கணக்கில் உள்ள தொகை அல்ல என்பதை அறியாத அவர், ஆன்லைன் வர்த்தகம் செய்வதற்காகத் தனது வங்கிக் கணக்கிலிருந்து பல்வேறு வங்கிகளைச் சேர்ந்த 14 வங்கிக் கணக்குகளுக்கு 15 பரிவர்த்தனைகள் மூலம் மொத்தம் ₹ 72,02,701/- தொகையை அனுப்பியுள்ளார்.
பிறகு, அந்தக் குழு மற்றும் செயலியில் தொடர்ச்சியான செயல்பாடுகள் இல்லாததால் அவருக்கு சந்தேகம் ஏற்பட்டது. இதைத் தொடர்ந்து, மயிலாடுதுறை மாவட்ட சைபர் கிரைம் காவல் நிலையத்தில் புகார் அளித்தார்.
காவல்துறை நடவடிக்கை
சைபர் கிரைம் காவல்துறையினர் நடத்திய விசாரணையில், அவர் போலியான இணையதளம் மற்றும் அதிக லாபத்தை நம்பி பணத்தை இழந்தது தெரியவந்தது. இதையடுத்து, பணம் அனுப்பப்பட்ட 14 வங்கிக் கணக்குகளும் காவல்துறையினரால் முடக்கம் செய்யப்பட்டன. முடக்கப்பட்ட கணக்குகளில் இருந்து இழந்த மொத்தத் தொகையில் ஒரு பகுதியை மீட்டெடுத்த காவல்துறையினர், அதை நீதிமன்றம் மூலம் பாதிக்கப்பட்டவரின் வங்கிக் கணக்கில் வரவு வைத்துள்ளனர். எஞ்சிய தொகையைப் பெறத் தொடர்ச்சியான நடவடிக்கை எடுக்கப்பட்டு வருகிறது.
இரண்டாவது வழக்கு: போலியான செயலி மூலம் ₹ 93 லட்சத்து 65,595/- இழப்பு
இதேபோல், மயிலாடுதுறை மாவட்டத்தைச் சேர்ந்த மற்றொருவருக்கும் இணையதள வர்த்தகம் தொடர்பான ஆன்லைன் இணைப்பு அவரது மொபைல் எண்ணுக்கு வந்துள்ளது. அதைத் தொட்டதன் மூலம், அவர் 'NA investment' என்ற ஆண்ட்ராய்டு செயலியைத் தனது செல்போனில் பதிவிறக்கம் செய்து, தனிப்பட்ட தகவல்கள் மற்றும் வங்கிக் கணக்குகள் தொடர்பான தகவல்களைப் பதிவு செய்துள்ளார்.
இவர் ஆன்லைன் வர்த்தகம் செய்வதற்காகப் பல்வேறு வங்கிகளைச் சேர்ந்த 19 வங்கிக் கணக்குகளுக்கு 19 பரிவர்த்தனைகள் மூலம் மொத்தம் ₹ 93,65,595/- தொகையைச் செலுத்தியுள்ளார்.
இந்த ஆண்ட்ராய்டு செயலியில் தொடர்ச்சியான செயல்பாடுகள் இல்லாததால் சந்தேகம் ஏற்பட்ட அவர், இது தொடர்பாக மயிலாடுதுறை மாவட்ட சைபர் கிரைம் காவல் நிலையத்தில் புகார் மனு அளித்தார்.
காவல்துறை புலன் விசாரணை
புலன் விசாரணையில், இந்தப் புகார்தாரரும் போலியான இணையதளம் மற்றும் அதிக லாபத்தை நம்பி பணத்தை இழந்தது தெரியவந்தது. இதையடுத்து, பணம் அனுப்பப்பட்ட 19 வங்கிக் கணக்குகளும் காவல்துறையினரால் முடக்கம் செய்யப்பட்டுள்ளன. முடக்கப்பட்ட தொகையிலிருந்து அவருக்குக் கிடைக்க வேண்டிய தொகையை நீதிமன்றம் மூலம் பெற்றுத் தர காவல்துறையினரால் நடவடிக்கை மேற்கொள்ளப்பட்டு வருகிறது.
காவல்துறை எச்சரிக்கை மற்றும் அறிவுறுத்தல்
இந்தச் சம்பவங்கள் தொடர்பாக, மயிலாடுதுறை மாவட்ட காவல் கண்காணிப்பாளர் G. ஸ்டாலின், பொதுமக்களுக்கு முக்கிய அறிவுறுத்தல்களை வெளியிட்டுள்ளார். அவர் கூறியதாவது:
* அறிமுகம் இல்லாத நபர்கள் அனுப்பும் வாட்ஸ்அப் இணைப்புகள் மூலம் எந்தக் குழுவிலும் சேர வேண்டாம்.
* இணைப்புகள் மூலம் எந்தச் செயலியையும் பதிவிறக்கம் செய்ய வேண்டாம்.
* குறைந்த நாட்களில் அதிக லாபம் கிடைக்கும் என்று நம்பி, இதுபோன்ற குழுக்களில் பகிரப்படும் கவர்ச்சிகரமான வார்த்தைகளை நம்பிப் போலியான செயலிகளில் முதலீடு செய்ய வேண்டாம்.
* செபியில் (Sebi) பதிவுசெய்யப்பட்ட உண்மையான நிறுவனங்களை அறிந்து கொண்டு, தங்களின் டிமேட் (Demat) வங்கிக் கணக்குகள் மூலம் மட்டுமே பணப் பரிவர்த்தனை மேற்கொள்ள வேண்டும்.
* மோசடியாளர்கள் கூறும் பல்வேறு வங்கிக் கணக்குகளில் பணத்தைச் செலுத்தி ஏமாற வேண்டாம்.
மேலும், சைபர் கிரைம் தொடர்பான அவசர உதவிகளுக்கு 24 மணி நேர இலவச சேவை எண் 1930 என்ற எண்ணைத் தொடர்புகொள்ளுமாறு அவர் கேட்டுக்கொண்டுள்ளார்.
தலைப்பு செய்திகள்
ட்ரெண்டிங் செய்திகள்
