வேலை தேடுபவரா நீங்கள்? வேலை கொடுப்பவராக மாற இதோ ஒரு பொன்னான வாய்ப்பு!

தொழில் முனைவோருக்காக தஞ்சாவூரில் ஜூன் 1 முதல் ஒரு மாத காலம் நடைபெறும் சிறப்புத் தொழில் கடன் முகாமினை பயன்படுத்தி கொள்ளுமாறு ஆட்சியர் வலியுறுத்தியுள்ளார்.

செயற்கை நுண்ணறிவு சித்தரிப்பு படம்

Source : ABP

மயிலாடுதுறை: தமிழகத்தின் தொழில் வளர்ச்சியை அடுத்த கட்டத்திற்கு எடுத்துச் செல்லும் நோக்கோடும், புதிய தொழில்முனைவோரை ஊக்குவிக்கும் விதமாகவும், தமிழ்நாடு தொழில் முதலீட்டுக் கழகம் (TIIC) சார்பில் தஞ்சாவூரில் ஒரு மாத கால சிறப்புத் தொழில் கடன் முகாம் நடைபெற உள்ளது. இந்த அரிய வாய்ப்பினைப் பயன்படுத்தி, மயிலாடுதுறை மாவட்டத்தில் உள்ள தகுதியுள்ள நபர்கள் அரசின் மானியங்களுடன் கூடிய கடனுதவியைப் பெறலாம் என மயிலாடுதுறை மாவட்ட ஆட்சியர் ஹெச்.எஸ்.ஸ்ரீகாந்த் அழைப்பு விடுத்துள்ளார்.

தொழில் வளர்ச்சியின் முன்னோடி: TIIC

தமிழ்நாடு தொழில் முதலீட்டுக் கழகம் என்பது மாநில அளவில் செயல்பட்டு வரும் ஒரு முன்னோடி அரசு நிதி நிறுவனமாகும். 1949-ஆம் ஆண்டு தொடங்கப்பட்ட இக்கழகம், கடந்த 75 ஆண்டுகளுக்கும் மேலாக தமிழக அரசின் பேராதரவுடன் செயல்பட்டு வருகிறது. ஆயிரக்கணக்கான தொழிற்சாலைகள் உருவாவதற்கும், லட்சக்கணக்கானோருக்கு வேலைவாய்ப்புகள் கிடைப்பதற்கும் இக்கழகம் முதுகெலும்பாகத் திகழ்கிறது. குறிப்பாக, குறு, சிறு மற்றும் நடுத்தரத் தொழில் பிரிவுகளின் (MSME) தேவைகளை உணர்ந்து, அவர்களுக்குத் தேவையான நிதி மற்றும் வழிகாட்டுதல்களை வழங்குவதில் இக்கழகம் முன்னிலை வகிக்கிறது.

சிறப்புத் தொழில் கடன் முகாம்: விவரங்கள்

தஞ்சாவூர் கிளை அலுவலகத்தின் மூலம் நடத்தப்படும் இந்த சிறப்பு முகாம், வரும் ஜூன் 1, 2026 முதல் ஜூன் 30, 2026 வரை நடைபெற உள்ளது.

முகாம் நடைபெறும் இடம்:

எண். 2854, NGM அபார்ட்மென்ட், நாஞ்சிக்கோட்டை சாலை, பழைய அருள் தியேட்டர் எதிரில், தஞ்சாவூர் - 613 001.

இந்த முகாமில் புதிய தொழிற்சாலைகளை நிறுவுதல், தற்போது இயங்கி வரும் நிறுவனங்களை விரிவுபடுத்துதல் (Expansion) மற்றும் உற்பத்தியை நவீனமயமாக்குதல் போன்ற பல்வேறு நோக்கங்களுக்காக கடனுதவிகள் வழங்கப்பட உள்ளன.

அரசின் அள்ளிக் கொடுக்கும் மானியங்கள்

இந்த முகாமின் மிக முக்கிய அம்சமாக மத்திய மற்றும் மாநில அரசுகள் வழங்கும் மானியங்கள் குறித்த விழிப்புணர்வு மற்றும் வழிகாட்டுதல்கள் வழங்கப்பட உள்ளன.

1.முதலீட்டு மானியம்: தமிழக அரசின் மூலம் தகுதிபெறும் தொழில்களுக்கு 25 சதவீத முதலீட்டு மானியம் வழங்கப்படுகிறது. இதன் மூலம் அதிகபட்சமாக ரூ. 150 இலட்சம் (1.5 கோடி ரூபாய்) வரை மானியம் பெற வாய்ப்புள்ளது.

2. NEEDS திட்டம்: புதிய தொழில் முனைவோர் மற்றும் தொழில் நிறுவன மேம்பாட்டுத் திட்டத்தின் (NEEDS) கீழ், முதல் தலைமுறை தொழில் முனைவோருக்குக் கூடுதல் முன்னுரிமை அளிக்கப்படுகிறது.

3.இதர சலுகைகள்: பல்வேறு சிறு தொழில்களுக்கான மத்திய அரசின் மானியத் திட்டங்கள் குறித்தும் இந்த முகாமில் விரிவான ஆலோசனைகள் வழங்கப்படும்.

100 சதவீத ஆய்வுக் கட்டணச் சலுகை

தொழில்முனைவோரை ஊக்கப்படுத்தும் விதமாக ஒரு முக்கிய அறிவிப்பை ஆட்சியர் வெளியிட்டுள்ளார். இந்த ஒரு மாத முகாம் காலத்தில் சமர்ப்பிக்கப்படும் பொதுக் கடன் விண்ணப்பங்களுக்கு (General Loan Applications), விண்ணப்ப ஆய்வு கட்டணத்தில் (Investigation Fees) 100 சதவீத முழு விலக்கு அளிக்கப்படும். இது தொடக்கக் கட்டச் செலவுகளைக் குறைக்க தொழில் முனைவோருக்குப் பெரும் உதவியாக இருக்கும்.

மாவட்ட ஆட்சியரின் வேண்டுகோள்

இது குறித்து மயிலாடுதுறை மாவட்ட ஆட்சியர் ஹெச்.எஸ்.ஸ்ரீகாந்த் விடுத்துள்ள செய்திக்குறிப்பில் தெரிவித்ததாவது: "தமிழக அரசு தொழில் துறையில் ஒரு புரட்சியை ஏற்படுத்தி வருகிறது. அந்த வகையில், மயிலாடுதுறை மற்றும் தஞ்சாவூர் மாவட்டத்தைச் சேர்ந்த ஆர்வமுள்ள இளைஞர்கள் மற்றும் தொழிலதிபர்கள் இந்த முகாமினை உரிய முறையில் பயன்படுத்திக் கொள்ள வேண்டும். உங்களிடம் உள்ள சிறந்த தொழில் திட்டங்களுடன் (Project Profiles) நேரடியாக முகாமிற்கு வந்து, அரசின் நிதி உதவிகளையும் மானியங்களையும் பெற்று உங்கள் கனவுத் தொழிலைத் தொடங்கலாம்."

தொடர்பு கொள்ள வேண்டிய விபரங்கள்

இந்த முகாம் மற்றும் கடன் திட்டங்கள் குறித்த கூடுதல் விவரங்களை அறிய விரும்புவோர், தஞ்சாவூர் கிளை அலுவலகத்தை நேரடியாகவோ அல்லது 04362-274230 என்ற தொலைபேசி எண்ணிலோ தொடர்பு கொள்ளலாம்.