மழை பாதித்த சம்பா, தாளடி பயிர்களைக் காக்க உடனடி தீர்வு! விவசாயிகள் கவனத்திற்கு: வேளாண் இணை இயக்குநர் அறிவுரை
மயிலாடுதுறை மாவட்டத்தில் மழையால் பாதிக்கப்பட்ட சம்பா, தாளடி பயிர்களை காக்க விவசாயிகளுக்கு வேளாண்மைத்துறை அறிவுரை வழங்கியுள்ளது.
மயிலாடுதுறை: தமிழகத்தில் வடகிழக்குப் பருவமழை தொடங்கியுள்ள நிலையில், டெல்டா மாவட்டங்களில் பெய்துவரும் கனமழையின் காரணமாகச் சம்பா மற்றும் தாளடி நெல் இளம் பயிர்கள் பெருமளவில் பாதிக்கப்பட்டுள்ளன. குறிப்பாக, சீர்காழி, கொள்ளிடம் மற்றும் செம்பனார்கோயில் வட்டாரங்களில் வயல்களில் தண்ணீர் தேங்கி, இளம் பயிர்கள் நீரில் மூழ்கிச் சேதமடைந்துள்ளதால் விவசாயிகள் கவலையில் ஆழ்ந்துள்ளனர்.
இந்தச் சூழ்நிலையில், பாதிக்கப்பட்ட பயிர்களை மீட்டெடுப்பதற்கும், மகசூல் இழப்பைத் தவிர்ப்பதற்கும் விவசாயிகள் உடனடியாகப் பயிர் மேலாண்மை முறைகளைப் பின்பற்ற வேண்டும் என வேளாண்மை இணை இயக்குநர் சேகர் கேட்டுக்கொண்டுள்ளார். இதுகுறித்து அவர் விரிவான வழிகாட்டுதல்களை வழங்கியுள்ளார்.
நீர் வடிகால் மற்றும் காற்றோட்ட மேலாண்மை
மழைநீரில் மூழ்கியுள்ள வயல்களில் உடனடியாகக் கவனம் செலுத்த வேண்டியது வடிகால் வசதியை ஏற்படுத்துவதுதான். வயல்களில் தேங்கியுள்ள நீரை வெளியேற்றத் துரிதமாக வடிகால் வசதியை ஏற்படுத்தி, பயிர்களுக்கு நல்ல காற்றோட்ட வசதி கிடைக்குமாறு செய்ய வேண்டும். தேங்கியுள்ள நீரை முழுமையாக வடித்தால்தான், பயிரின் வேர்கள் மண்ணில் உள்ள சத்துக்களை எடுத்துக்கொண்டு மீண்டும் வீரியத்துடன் வளர முடியும்.
சேதமடைந்த பயிர்களுக்கான தீர்வுகள்
தண்ணீர் தேங்கியிருந்த பகுதிகளில் இளம் பயிரின் குத்துக்கள் (நாற்றுகள்) முழுவதுமாகப் பாதிக்கப்பட்டு, வளர்ச்சி குன்றியிருந்தால், விவசாயிகள் மறு நடவு செய்ய வேண்டும். பாதிக்கப்பட்ட குத்துக்களில் அதே ரக நாற்றுகள் கிடைக்கும்பட்சத்தில் உடனடியாக மறு நடவு செய்ய வேண்டும்.
முழுமையாகச் சேதமடைந்த வயல்களுக்கு நேரடி விதைப்பு
பயிர் முழுமையாகச் சேதமடைந்து, மறு நடவு செய்ய முடியாத நிலையில் உள்ள வயல்களில், விவசாயிகள் குறுகிய கால நெல் ரகங்களைத் தேர்ந்தெடுத்து நேரடி விதைப்பு செய்யலாம். ஏடிடீ 45, ஏடிடீ 53 மற்றும் கோ 51 போன்ற குறுகிய கால நெல் ரகங்களை இந்தச் சமயத்தில் நேரடி விதைப்பு செய்வதன் மூலம் ஓரளவு மகசூலைப் பெற வாய்ப்புள்ளது.
கோனோவீடர் பயன்பாடு
வயல்களில் தேங்கியிருந்த நீரை வடித்த உடனேயே, வரிசை நடவு செய்யப்பட்ட வயல்களில் விவசாயிகள் கோனோவீடர் கருவியைப் பயன்படுத்த வேண்டும். இந்தக் கருவியைப் பயன்படுத்துவதன் மூலம் மண்ணில் காற்றோட்டத்தை ஏற்படுத்தி, பயிரின் வேர்கள் மண்ணில் உள்ள சத்துக்களை எளிதாக எடுத்துக்கொள்ள வழிவகை செய்யலாம். காற்றோட்டம் கிடைப்பது வேர் அழுகலைத் தடுக்கும் ஒரு முக்கிய நடவடிக்கையாகும்.
சரியான வளர்ச்சிக்கு ஊட்டச்சத்து மேலாண்மை
மழைநீர் தேங்கியதால் பயிரின் வளர்ச்சி குன்றி, நிறம் மாறிப் காணப்படும் வயல்களில் பயிர் ஊட்டச்சத்து நிர்வாகத்தைக் கட்டாயம் மேற்கொள்ள வேண்டும்.
* உரமிடுதல்: பயிரின் வளர்ச்சி சரியாக இல்லாமல் காணப்படும் வயல்களில் ஏக்கருக்கு 22 கிலோ யூரியாவுடன் 18 கிலோ ஜிப்சம் மற்றும் 4 கிலோ வேப்பம் புண்ணாக்கு ஆகியவற்றைக் கலந்து ஒரு நாள் இரவு வைத்திருந்து, அதனுடன் 17 கிலோ பொட்டாஷ் உரத்தைக் கலந்து வயலில் சீராகத் தூவ வேண்டும்.
* முக்கியக் குறிப்பு: உரங்களை இடும்போது வயல்களில் சீராகத் தண்ணீர் இருக்குமாறு பார்த்துக் கொள்வது அவசியம். நீர் வற்றிய வயலில் உரம் இட்டால் பயன் குறையும்.
துத்தநாகச் சத்து பற்றாக்குறை நிவர்த்தி
பயிரின் வளர்ச்சி மிகவும் குன்றி, மஞ்சள் நிறமாகக் காணப்படும் வயல்களில் துத்தநாகச் சத்து பற்றாக்குறை ஏற்பட்டிருக்கலாம். இதனை நிவர்த்தி செய்ய, விவசாயிகள் பின்வரும் தெளிப்பு முறையைப் பின்பற்ற வேண்டும்.
* தெளிப்பு முறை: ஏக்கருக்கு 200 லிட்டர் தண்ணீரில் 2 கிலோ யூரியா (1 சதவீதம்) மற்றும் 1 கிலோ ஜிங்க் சல்பேட் (துத்தநாகச் சல்பேட்) (0.5 சதவீதம்) ஆகியவற்றைக் கரைக்க வேண்டும்.
* இந்தக் கரைசலைத் தனியான கைத்தெளிப்பான் கொண்டு காலை அல்லது மாலை வேளையில் பயிரில் நன்கு நனையும்படி தெளிக்க வேண்டும். இது பயிரின் மஞ்சள் நிறத்தைப் போக்கிப் பச்சை நிறத்தைப் பெற உதவும்.
பூஞ்சாணம் மற்றும் பாக்டீரியா நோய் மேலாண்மை
மழைநீர் தேங்கியுள்ள பகுதிகளில் அதிக ஈரப்பதம் காரணமாகப் பூஞ்சாணம் மற்றும் பாக்டீரியாவினால் நெற்பயிர் அழுகல் ஏற்பட அதிக வாய்ப்புள்ளது. இதைத் தடுக்க, விவசாயிகள் உடனடியாகப் பின்வரும் தடுப்பு நடவடிக்கையை எடுக்க வேண்டும்
* மருந்து தெளித்தல்: ஏக்கருக்கு 400 கிராம் கார்பன்டசிம் மருந்தை 200 லிட்டர் நீரில் கலந்து கைத்தெளிப்பான் கொண்டு உடனடியாகப் பயிரில் சீராகத் தெளிக்க வேண்டும்.
"விவசாயிகள் காலதாமதமின்றி இந்த முக்கியப் பயிர் மேலாண்மை முறைகளைக் கடைப்பிடிப்பதன் மூலம், மழைநீரால் பாதிக்கப்பட்டிருக்கும் சம்பா மற்றும் தாளடிப் பயிர்களைக் காத்திட முடியும் இதற்கான தொழில்நுட்ப உதவிகள் மற்றும் ஆலோசனைகளைப் பெற அருகில் உள்ள வேளாண்மை விரிவாக்க மையங்களை அணுகலாம்," என்றும் வேளாண்மை இணை இயக்குநர் சேகர் தெரிவித்துள்ளார்.
தலைப்பு செய்திகள்
ட்ரெண்டிங் செய்திகள்
