Rohit - Shubman Gill: உலகக்கோப்பை வரலாற்றில் அதிக ஸ்ட்ரைக் வைத்த இந்திய தொடக்க ஜோடி! ரோகித் - சுப்மன் புதிய வரலாறு!

ஒருநாள் உலகக்கோப்பை வரலாற்றில் அதிக ஸ்ட்ரைக் ரேட் வைத்துள்ள இந்திய தொடக்க ஜோடி என்ற புதிய சாதனையை ரோகித் சர்மா - சுப்மன்கில் படைத்துள்ளனர்.

தொடக்க வீரர்கள் சுப்மன்கில் - ரோகித் சர்மா

உலகக் கோப்பை கிரிக்கெட் தொடர் விறுவிறுப்பான இறுதிக்கட்டத்திற்கு வந்துள்ளது. இந்த தொடரில் முதல் ஆளாக இறுதிப்போட்டிக்கு செல்லப்போவது யார்? என்பதை தீர்மானிக்கும் முதல் அரையிறுதிப் போட்டியில் இந்தியா – நியூசிலாந்து அணிகள் மோதி வருகின்றனர்.

ஸ்ட்ரைக் ரேட்டில் மிரட்டல்:

இந்த போட்டியில் இந்திய அணிக்காக கேப்டன் ரோகித் சர்மா அபாரமான தொடக்கம் அளித்தார். அவரது அபாரமான தொடக்கத்தில் இந்திய அணி சிறப்பாக பேட்டிங் செய்து வருகிறது. டாஸ் வென்று பேட்டிங்கைத் தேர்வு செய்த இந்திய கேப்டன் ரோகித்சர்மா 29 பந்துகளில் 4 பவுண்டரி 4 சிக்ஸருடன் 47 ரன்கள் எடுத்து ஆட்டமிழந்தார்.

ஒருநாள் போட்டிகளில் அபாரமான ஸ்ட்ரைக் ரைட் கொண்டுள்ள ரோகித் சர்மா, இன்றைய போட்டியிலும் சிறப்பான ஸ்ட்ரைக் ரேட் வைத்தே அவுட்டானார். ஒருநாள் உலகக்கோப்பை வரலாற்றிலே அதிகமான ஸ்ட்ரைக் ரேட் வைத்துள்ள இந்திய தொடக்க வீரர்கள் என்ற சாதனையை இந்திய வீரர்கள் படைத்துள்ளனர்.

தொடக்க வீரர்களாக சாதனை:

லீக் போட்டியில் தென்னாப்பிரிக்க அணிக்கு எதிராக ரோகித்சர்மா 166.66 ஸ்ட்ரைக் ரேட் வைத்திருந்தார். நியூசிலாந்து அணிக்கு எதிராக இன்று நடந்து வரும் போட்டியில் 162.06 ஸ்ட்ரைக் ரேட் வைத்து ஆட்டமிழந்தார். நெதர்லாந்து அணிக்கு எதிராக 159.37 ஸ்ட்ரைக் ரேட்டை சுப்மன்கில் வைத்திருந்தார்.  ஆப்கானிஸ்தான் அணிக்கு எதிராக 155.95 ஸ்ட்ரைக் ரேட் வைத்திருந்தார். பாகிஸ்தான் அணிக்கு எதிரான போட்டியில் 136.50 ஸ்ட்ரைக் ரேட் வைத்திருந்தார்.

ஒரு நாள் உலகக்கோப்பைத் தொடரில் அதிகளவு ஸ்ட்ரைக் ரேட் வைத்துள்ள இந்திய தொடக்க வீரர்கள் என்ற சாதனையை ரோகித்சர்மா – சுப்மன்கில் ஜோடி படைத்துள்ளது. இந்த தொடரில் ஆஸ்திரேலிய அணிக்கு எதிரான போட்டியில் மட்டும் டக் அவுட்டாகிய ரோகித் சர்மா அடுத்தடுத்த போட்டிகளில் அபாரமாக ஆடி இந்திய அணியின் வெற்றிக்கு மிக்க உறுதுணையாக இருந்துள்ளார். அவருக்கு பக்கபலமாக மற்றொரு தொடக்க வீரர் சுப்மன்கில்லும் இருந்தார்.

மிரட்டல் தொடக்கம்:

இந்த உலகக்கோப்பைத் தொடரில் பவர்ப்ளேவில் அதிகளவு ரன்களை குவித்த அணி என்ற சாதனையையும் இந்தியா படைத்துள்ளது. அதற்கு முக்கிய காரணம் இந்திய அணியின் தொடக்க வீரர்களான ரோகித்சர்மா – சுப்மன்கில் ஜோடியே ஆகும். வலது கை – இடது கை கூட்டணியில் தொடக்க வீரர்களை அமைத்து வந்த இந்திய அணிக்காக வலது – வலது கை கூட்டணியாக கடந்த சில ஆண்டுகளாக தொடர்ந்து ரோகித்சர்மா – சுப்மன்கில் ஜோடி சிறப்பாக ஆடி வருகின்றனர் என்பது குறிப்பிடத்தக்கது.