IPL Retention 2022: “எல்லா நாளும் கார்த்திகை... லா...ல...லா...” - சிஎஸ்கேவுக்கு டு ப்ளெசி, பிராவோ வாழ்த்து
டு ப்ளெசி, பிராவோ, ரெய்னா, ஷர்துல் தாகூர், தீபக் சஹார் உள்ளிட்ட சிஎஸ்கே அணியின் முக்கிய வீரர்கள் இந்த பட்டியலில் இடம் பெறாதது அதிர்ச்சியை ஏற்படுத்தி இருக்கிறது.
சுவாரஸ்யமான பட்டியலாக வெளியாகி இருக்கிறது ஐபிஎல் 2022 தொடருக்காக தக்க வைக்கப்பட்டுள்ள வீரர்களின் விவரம். இதுவரை 8 அணிகள் மட்டுமே பங்கேற்று வந்த நிலையில், அடுத்தாண்டு முதல் 10 அணிகள் பங்கேற்க உள்ளன. மேலும், அடுத்த ஐ.பி.எல். தொடரில் அனைத்து அணிகளிலும் தலா 4 வீரர்களை மட்டுமே தக்கவைக்க முடியும் என்றும், மற்ற அனைத்து வீரர்களும் ஏலத்தின் மூலமாகவே இடம்பெற முடியும் என்றும் தெரிவித்திருந்தது.
அதன்படி, ஒவ்வொரு அணிகளும் தாங்கள் தக்க வைக்க விரும்பும் வீரர்களின் பட்டியலை நவம்பர் 30-ந் தேதிக்குள் அளிக்க வேண்டும் என்று தெரிவிக்கப்பட்டது. இந்த நிலையில், ஒவ்வொரு அணிகளும் தாங்கள் தக்கவைக்க விரும்பும் வீரர்களின் பட்டியலை நேற்று அறிவித்தது.
The @ChennaiIPL retention list is out! 👌
— IndianPremierLeague (@IPL) November 30, 2021
Take a look! 👇#VIVOIPLRetention pic.twitter.com/3uyOJeabb6
அந்த வரிசையில், சென்னை சூப்பர் கிங்ஸ் அணியில் நான்கு பேர் தக்க வைக்கப்பட்டனர். இதில் எதிர்ப்பார்த்த நான்கு வீரர்களின் பெயர் இடம் பெற்றிருந்தாலும், எதிர்ப்பார்க்காத வகையில் தோனியைவிட அதிக விலை கொடுத்து தக்க வைக்கப்பட்டிருக்கிறார் ஜடேஜா. சென்னை அணியில் எப்பொழுதும் நீங்கா இடம் பிடிக்கும் தோனியை பின்னுக்குத்தள்ளி ஜடேஜா 16 கோடிக்கு தக்கவைக்கப்பட்டுள்ளது ஆச்சர்யத்தை ஏற்படுத்தியுள்ளது. இதன் மூலம், இந்த ஐபிஎல் ரிடென்ஷனில் அதிக ரூபாய்க்கு தக்க வைக்கப்பட்ட வீரராக ஜடேஜா முன்னிலை பெற்றிருக்கிறார்.
இந்நிலையில், டு ப்ளெசி, பிராவோ, ரெய்னா, ஷர்துல் தாகூர், தீபக் சஹார் உள்ளிட்ட சிஎஸ்கே அணியின் முக்கிய வீரர்கள் இந்த பட்டியலில் இடம் பெறாதது அதிர்ச்சியை ஏற்படுத்தி இருக்கிறது. இதனால், யெல்லோ ஆர்மி ரசிகர்கள் இவர் இருந்திருக்க வேண்டும், அவர் இருந்திருக்க வேண்டும் என கமெண்ட் செய்து வருகின்றனர். குறிப்பாக, கடைசி சீசனில் கூட அதிரடியாக விளையாடிய டுப்ளெசி இல்லாதது சிஎஸ்கே ரசிகர்களுக்கு ஏமாற்றத்தையும் வருத்தத்தையும் அளித்திருக்கிறது.
ஆனால், எப்போதும் ஒரே குடும்பம், சூப்பர் குடும்பம், பாசக்குடும்பம் என மெச்சிக் கொள்ளும் சிஎஸ்கேவில், இப்போது தக்க வைக்கப்பட்டுள்ள வீரர்களை பட்டியலிட்டு சிஎஸ்கே வெளியிட்டிருக்கும் பதிவுக்கும் டு ப்ளெசி, பிராவோ கமெண்ட் செய்திருக்கின்றனர். ப்ராவோ, அந்த பதிவிற்கு “வாழ்த்துகள்” எனவும், டுப்ளெசி, கைதட்டல்களையும் கமெண்ட் செய்திருக்கிறார்.
இதனால், மீண்டும் சிஎஸ்கே ரசிகர்கள், “எங்கள் வீட்டில் எல்லா நாளும் கார்த்திகை லா...ல..லா...” என பாடி வருகின்றனர்.
ABP நாடு செய்திகளை Google News -ல் பின் தொடர இங்கே கிளிக் செய்யவும்
ABP நாடு செய்திகளை சமூக வலைத்தள பக்கங்களிலும் பின் தொடரலாம்
தலைப்பு செய்திகள்
ட்ரெண்டிங் செய்திகள்
