Aadi Perukku: ஆகஸ்ட் 3ம் தேதி ஆடிப்பெருக்கு.. தாலிக்கயிறு மாற்ற உகந்த நேரம் எது? - நோட் பண்ணுங்க!

ஆடிப்பெருக்கு 2026 வரும் ஆகஸ்ட் 3ம் தேதி திங்கட்கிழமை வருகிறது. இந்நாளில் தாலிக்கயிறு மாற்றுதல், தாலிச்சரடு மாற்றுதல், நகை மற்றும் நிலம் வாங்குதல், புது காரியங்களை தொடங்குதல் ஆகியவை செய்வார்கள்.

ஆடிப்பெருக்கு தாலி கயிறு மாற்றும் நடைமுறை

Source : ABP

2026ம் ஆண்டு ஆடிப்பெருக்கு வெகுவிமரிசையாக கொண்டாடப்பட உள்ள நிலையில் அன்றைய நாளில் தாலிக்கயிறு மாற்ற நல்ல நேரம் எதுவென்று காணலாம். 

ஆடிப்பெருக்கு - ஆடி 18ம் நாள்

ஆடி மாதம் என்றாலே ஆன்மிக மாதம் என அழைப்பார்கள். இத்தகைய ஆடி மாதம் பெண் தெய்வங்களுக்குரியது. ஆடி மாதம் செவ்வாய், வெள்ளி, ஞாயிற்றுக்கிழமை ஆகியவை வெகு விசேஷ தினங்களாக கருதப்படும். அதுமட்டுமல்லாமல் இம்மாதத்தில் ஆடி பௌர்ணமி, ஆடி அமாவாசை, ஆடிப்பெருக்கு, ஆடித்தபசு, ஆடி இறுதி ஆகியவை மிகுந்த முக்கியத்துவம் வாய்ந்த நாளாக இந்து மதத்தில் பார்க்கப்படுகிறது. 

இதில் ஆடி மாதம் 18ம் நாள் கொண்டாடப்படும் ஆடிப்பெருக்கு திருவிழா மிகச் சிறப்பான முறையில் தமிழர்களால் கடைபிடிக்கப்படும். மற்ற இந்து மத பண்டிகைகள் அனைத்தும் திதி அடிப்படையில் கொண்டாடப்படும் நிலையில் ஆடிப்பெருக்கு மட்டும் தான் நாள் அடிப்படையில் கணக்கீடு செய்யப்படும் ஒரு விசேஷ நாளாக பார்க்கப்படுகிறது. 

2026ல் ஆடிப்பெருக்கு எப்போது?

ஆடிப்பெருக்கு 2026 வரும் ஆகஸ்ட் 3ம் தேதி திங்கட்கிழமை வருகிறது. தேய்பிறை பஞ்சமி திதியில் உத்திரட்டாதி நட்சத்திரத்துடன் கூடிய இந்நாளில் தாலிக்கயிறு மாற்றுதல், தாலிச்சரடு மாற்றுதல், நகை மற்றும் நிலம் வாங்குதல், புது காரியங்களை தொடங்குதல் ஆகியவை செய்வார்கள். ஆடி மாதம் எவ்வித நல்ல காரியம் செய்ய மாட்டார்கள் என பொதுவாக சொல்லப்பட்டாலும் ஆடிப்பெருக்கு நாளில் செய்வதால் அதன் பலன் பல மடங்கு பெருகும் என்பது ஐதீகமாக பார்க்கப்படுகிறது. 

தாலிக்கயிறு மாற்ற நல்ல நேரம் எது?

திங்கட்கிழமை என்பதால் அன்றைய நாளில் காலை 9.15 முதல் 10.15 மணி வரை உள்ளது. மாலையில் 04.45 மணி முதல் 05.45 மணி வரை உள்ளது. அதேசமயம் கௌரி நல்ல நேரம் மதியம் 1.45 முதல் 2.45 மணி வரையும் உள்ளது. இராகு காலம் காலை 7.30 மணி முதல் 9 மணி வரையும், குளிகை மதியம் 1.30 மணி முதல் 3 மணி வரையும், எமகண்டம் காலை 10.30 மணி முதல் 12 மணி வரையும் உள்ளது. 

இன்றைய நாளில் அந்த நாளில் இராகு காலம், குளிகை, எமகண்டம்  தவிர்த்து மற்ற நேரங்களில் நாம் வீட்டிலோ, நீர் நிலைகளின் கரைகளிலோ அல்லது கோவிலிலோ தாலிக்கயிறு மாற்றிக் கொள்ளலாம். சூரிய உதயமான பிறகு காலை 6 மணி முதல் 7.30 மணிக்குள்ளும் தாலிக்கயிறு அல்லது சரடு மாற்றி விடலாம். இன்றைய நாளில் தங்கம், நிலம், நல்ல காரியம் செய்ய நினைப்பவர்கள் மேற்குறிப்பிட்ட நேரங்களில் செய்யலாம். ஆடிப்பெருக்கு நாளில் எது செய்வதாக இருந்தாலும் அதற்குரிய பூஜை மற்றும் நடைமுறைகளை மேற்கொண்டு செய்ய வேண்டும் என சொல்லப்பட்டுள்ளது.