Gaza Peace Plan: ட்ரம்ப்பின் காசா அமைதித் திட்டம்; தீர்மானத்தை அங்கீகரித்த ஐ.நா பாதுகாப்பு சபை; நிராகரித்த ஹமாஸ்

காசாவுக்கான ட்ரம்ப்பின் 20 அம்ச அமைதித் திட்டத்தை ஆதரிக்கும் அமெரிக்காவின் தீர்மானத்தை, ஐக்கிய நாடுகள் பாதுகாப்பு கவுன்சில் அங்கீகரித்துள்ளது. ஆனால், ஹமாஸ் அதை நிராகரித்தது. அடுத்து என்ன நடக்கும்.?

ட்ரம்ப்பின் காசா அமைதித் திட்டத்தை அங்கீகரித்த ஐநா பாதுகாப்பு கவுன்சில்

Source : Social Media

இரண்டு வருட மோதலுக்குப் பிறகு, காசாவுக்கான அமெரிக்க அதிபர் டொனால்ட் ட்ரம்ப்பின் 20 அம்ச அமைதித் திட்டத்தை ஆதரிக்கும் அமெரிக்காவால் வரைவு செய்யப்பட்ட தீர்மானத்தை, ஐக்கிய நாடுகள் பாதுகாப்பு கவுன்சில் அங்கீகரித்துள்ளது. இந்த தீர்மானத்தின் மீது ரஷ்யாவும், சீனாவும் வாக்களிகாத நிலையில், ஹமாஸ் நிராகரித்துள்ளது. இதனால் அடுத்து என்ன நடக்கும்.? பார்க்கலாம்.

ஐ.நா பாதுகாப்ப கவுன்சிலின் அங்கீகாரத்தை பெற்ற ட்ரம்ப்பின் அமைதித் திட்டம்

ஐ.நா பாதுகாப்பு கவுன்சிலில் அமெரிக்காவால் கொண்டுவரப்பட்ட இந்த தீர்மானத்திற்கு ஆதரவாக 13 வாக்குகள் கிடைத்தன, அதே நேரத்தில், ரஷ்யாவும் சீனாவும் வாக்களிக்கவில்லை. இந்நிலையில், இந்த தீர்மானத்தால், ஒரு சர்வதேச நிலைப்படுத்தல் படை அல்லது ISF-ஐ உருவாக்குவதற்கு அங்கீகாரம் அளிக்கிறது, பெயரிடப்படாத பல நாடுகள் இதில் சேர விருப்பம் தெரிவித்துள்ளதாக அமெரிக்கா தெரிவித்துள்ளது.

சர்வதேச நிலைப்படுத்துதல் படை என்ன செய்யும்.?

இந்தப் சர்வதேச நிலைப்படுத்துதல் படை, காசாவிற்குள் நுழைவது, ராணுவமயமாக்கலை மேற்பார்வையிடுவது, முக்கிய பகுதிகளை பாதுகாப்பது மற்றும் மனிதாபிமான உதவிகளை வழங்குவதை ஆதரிப்பது போன்ற பணிகளைச் செய்யும். மேலும், காசாவின் தெற்கு அண்டை நாடான இஸ்ரேல் மற்றும் எகிப்துடன் அதன் நடவடிக்கைகளை ஒருங்கிணைக்கும்.

தீர்மானத்தை நிராகரித்த ஹமாஸ்

ட்ரம்ப்பின் அமைதித் திட்டம் மீதான தீர்மானத்தை நிராகரித்த ஹமாஸ், பாலஸ்தீனிய உரிமைகளை பற்றி விவாதிக்கவில்லை என்றும், இத்திட்டம் அந்த பிரதேசத்தில் தேவையற்ற வெளிப்புற அதிகாரத்தை திணிக்கிறது என்றும் வாதிட்டது. சமூக வலைதளத்தில் ஹமாஸ் அமைப்பு வெளியிட்ட ஒரு அறிக்கையில், இந்தத் திட்டம் "காசா பகுதியில் ஒரு சர்வதேச பாதுகாப்பு பொறிமுறையை திணிக்கிறது, அதை நமது மக்களும் அவர்களது பிரிவுகளும் நிராகரிக்கின்றன" என்றும், எதிர்ப்புக் குழுக்களை நிராயுதபாணியாக்குவதற்கான ஆணையை உறுதிப்படுத்தும் படைக்கு வழங்குவது "அதன் நடுநிலைமையை களைந்து, ஆக்கிரமிப்புக்கு ஆதரவாக மோதலில் ஒரு கட்சியாக மாற்றுகிறது" என்றும் கூறியதாக செய்தி வெளியாகியுள்ளது.

அமெரிக்கா கொண்டுவந்த வரைவுத் தீர்மானம் என்ன கூறுகிறது.?

ட்ரம்ப்பின் முன்மொழிவின் கீழ், ஹமாஸ் உட்பட "அரசு சாரா ஆயுதக் குழுக்களிடமிருந்து ஆயுதங்களை நிரந்தரமாக நீக்குவதில்" ISF செயல்படும் என்றும், அந்த அமைப்புகள் தங்கள் ஆயுதங்களை ஒப்படைக்க வேண்டும் என்றும் வரைவுத் தீர்மானம் கூறுகிறது. காசாவில் காவல் பொறுப்புகளை இறுதியில் ஏற்க, தற்போது நடைமுறையில் உள்ள ஹமாஸ் நடத்தும் படையை மாற்ற, புதிதாக பயிற்சி பெற்ற பாலஸ்தீன காவல் படையை உருவாக்கவும் இந்த வரைவு வழி செய்கிறது.

இதனிடையே, "காசாவை ராணுவமயமாக்குவதை ஆதரித்தல், பயங்கரவாத உள்கட்டமைப்பை அகற்றுதல், ஆயுதங்களை அகற்றுதல் மற்றும் பாலஸ்தீனிய பொதுமக்களின் பாதுகாப்பை உறுதி செய்தல்" ஆகியவை நிலைப்படுத்தல் படையின் பணியாக இருக்கும் என்று கவுன்சிலிடம் ஐக்கிய நாடுகள் சபைக்கான அமெரிக்க தூதர் மைக் வால்ட்ஸ் கூறினார். மேலும், அக்டோபர் 10-ம் தேதி பணயக் கைதிகள் மற்றும் கைதிகளின் பரிமாற்றத்துடன் தொடங்கிய ஆரம்ப போர்நிறுத்த கட்டத்தை "உடையக்கூடிய, பலவீனமான முதல் படி " என்று அவர் விவரித்தார்.

இந்தத் திட்டம், ட்ரம்ப் தலைமை தாங்குவார் என்று எதிர்பார்க்கப்படும் அமைதி வாரியத்தையும், காசாவின் மறுகட்டமைப்பை ஆதரிக்க உலக வங்கி ஆதரவுடன் கூடிய அறக்கட்டளை நிதியையும் நிறுவுவதையும் முன்மொழிகிறது.