US President: சிக்கிய ரகசிய ஆவணங்கள்.. விசாரணை வளையத்திற்குள் வருகிறாரா அமெரிக்க அதிபர் ஜோ பைடன்..?

அமெரிக்க அரசின் ரகசிய ஆவணங்கள் அதிபர் ஜோ பைடன் வீட்டில் கண்டுபிடிக்கப்பட்ட நிலையில் இது குறித்து விசாரணைக்கு உத்தரவிடப்பட்டுள்ளது.

அதிபர் ஜோ பைடன்

ரகசிய ஆவணங்கள்:

அமெரிக்க அரசின் ரகசிய ஆவணங்கள் அதிபர் ஜோ பைடன் வீட்டில் கண்டுபிடிக்கப்பட்ட நிலையில் இது குறித்து விசாரணைக்கு உத்தரவிடப்பட்டுள்ளது.

அட்டர்னி ஜெனரல் மெரிக் கார்லண்ட் நேற்று முன்னாள் மத்திய அரசு வழக்கறிஞர் ராபர்ட் ஹரை ஜனாதிபதி ஜோ பைடனின் தனிப்பட்ட வீடு மற்றும் அலுவலகத்தில் இரகசிய அரசாங்க பதிவுகள் கண்டுபிடிக்கப்பட்டதை விசாரிக்க சிறப்பு ஆலோசகராக நியமித்தார். "இந்த விவகாரம் தொடர்பாக எந்தவொரு நபரோ அல்லது நிறுவனமோ சட்டத்தை மீறினார்களா என்பதை விசாரிக்க ஹர் அதிகாரம் பெற்றுள்ளார்" என்று கார்லண்ட் நீதித்துறையில் நியமனம் குறித்து அவர் வெளியிட்ட பொது அறிக்கையில் கூறினார்.

வெள்ளை மாளிகை:

ஒபாமா நிர்வாகத்தில் துணை அதிபராக பணியாற்றிய பின், 2017 மற்றும் 2021 க்கு இடையில் தனியார் குடிமகனாக இருந்தபோது, ​​பைடன் பயன்படுத்திய வாஷிங்டனில் உள்ள ஒரு அலுவலகத்தில் ஜனாதிபதியின் வழக்கறிஞர்களால் நவம்பர் 2 அன்று ரகசிய ஆவணங்கள் கண்டுபிடிக்கப்பட்டன. ரகசிய ஆவணங்களின் முதல் தொகுதியின் கண்டுபிடிப்பு திங்களன்று ஊடகங்கள் மூலம் பகிரங்கமாக அறிவிக்கப்பட்டது, பின்னர் வெள்ளை மாளிகையால் அது உறுதிப்படுத்தப்பட்டது. ஆனால் ஆவணங்கள் கண்டுபிடித்தபோதே ஏன் வெளியிடவில்லை என்ற காரணம் தெரியவில்லை என அதிகார வட்டங்கள் கூறுகின்றனர்.  

சுமார் 10 ஆவணங்களின் தொகுதி நவம்பரில் வெள்ளை மாளிகைக்கு அருகிலுள்ள ஒரு சிந்தனைக் குழுவான பென் பைடன் (Penn Biden Center) மையத்தில் கண்டுபிடிக்கப்பட்டது. அந்த ஆவணங்களில் யுக்ரேன், ஈரான், பிரிட்டன் தொடர்பான அமெரிக்க உளவுத்துறை குறிப்புகளும் விளக்கப் பொருட்களும் அடக்கம் எனக் கூறப்படுகிறது.

பைடனுக்கு தெரியாது

பிடனின் செய்தித் தொடர்பாளர் கரீன் ஜீன்-பியர், நேற்று, “இந்த ஆவணங்கள் கண்டுபிடிக்கப்பட்டதில் அவர் அதிர்ச்சியடைந்தார். அவற்றில் என்ன இருக்கிறது என்று அவருக்குத் தெரியாது. அவரது வழக்கறிஞர்கள் அந்த ஆவணங்களை கண்டுபிடித்த நிமிடம், அவர்கள் நீதித்துறையை அணுகினர். அந்த ஆவணங்கள் அங்கு இருப்பது அவருக்குத் தெரியாது” எனக் கூறினார். சிறப்பு ஆலோசகர் அல்லது புலனாய்வாளர்களுடன் ஒரு நேர்காணலுக்கு பைடன் ஒப்புக்கொள்வாரா என்பதற்கு ஜீன்-பியர் பதிலளிக்க மறுத்துவிட்டார். 

சபை மேற்பார்வைக் குழு அதிபர் மற்றும் அவரது குடும்பத்தினரிடம் விசாரணைகளைத் தொடங்கியுள்ளது. இதில் வெள்ளை மாளிகையின் ரகசிய கோப்புகள் தொடர்பான ஆவணங்களையும் தகவல் தொடர்புகளையும் ஒப்படைக்க வேண்டுமென்ற கோரிக்கையும் அடங்கும்.

ரகசிய ஆவணங்கள் உட்பட அனைத்து வெள்ளை மாளிகை பதிவுகளும், அமெரிக்க தேசிய ஆவணக் காப்பகத்திற்கு, நிர்வாகத்தின் பதவிக் காலத்திற்குப் பிறகு மாற்றப்பட வேண்டும் என்று சட்டம் கூறுகிறது.