Thoothukudi: அமலை செடிகள் மற்றும் கோரைகளால் ஆக்கிரமிக்கப்பட்டுள்ள தூத்துக்குடியின் கூவம் - மழைக்கு முன் அகற்றப்படுமா?

தூத்துக்குடி மாநகராட்சியின் 3வது மைல் பகுதியில் துவங்கி திரேஸ்புரம் வரையிலான 6 கி.மீ., தூரத்துக்கு பக்களில் ஓடையின் இருபுறமும் மாநகராட்சி நிர்வாகம் சார்பில் சிமெண்ட் சாலைகள் அமைக்கப்பட்டு வருகிறது.

தூத்துக்குடி பக்கிள் ஓடை

குளத்தில் இருந்து உபரி நீர் செல்வதற்காக அமைக்கப்பட்ட பக்கிள் ஓடை- கழிவு நீரோடையானது.

தூத்துக்குடி நகரின் மையப்பகுதியில் பக்கிள் ஓடை செல்கிறது. ஆங்கிலேயர் காலத்தில் கோரம்பள்ளம் குளத்தில் இருந்து உபரிநீர் கடலுக்கு செல்வதற்காக பக்கிள் துரை என்ற ஆங்கிலேய அதிகாரியால் இந்த ஓடை அமைக்கப்பட்டது. இதனால் அவரது பெயரிலேயே இன்றளவும் இந்த ஓடை அழைக்கப்படுகிறது. காலப்போக்கில் பக்கிள் ஓடை சாக்கடை கால்வாயாக மாறியது. தூத்துக்குடியின் கூவம் என்றழைக்கப்படும் பக்கிள் ஓடையின் இருபுறமும் இருந்த ஆக்கிரமிப்புகள் கடந்த 2008 ஆம் ஆண்டு ஏற்பட்ட பெரு வெள்ளத்தை அடுத்து அகற்றப்பட்டது. அப்போது பார்வையிட வந்த அப்போதைய உள்ளாட்சி அமைச்சர் மு.க.ஸ்டாலின் பக்கிள் ஓடையை சீரமைக்க உத்தரவிட்டார். அதன்பேரில் ரூ.32 கோடி நிதி ஒதுக்கப்பட்டு பக்கிள் ஓடை திரேஸ்புரம் கடற்கரை முதல் 3-ம் மைல் வரை சுமார் 6 கி.மீ. தொலைவுக்கு சீரமைக்கப்பட்டது.

தொடந்து ஏற்பட்ட மழை வெள்ளத்தின் போது நகரின் மேற்கு மற்றும் கிழக்கு பகுதிகளில் தேங்கிய மழை நீரை கடலுக்கு கொண்டு செல்லும் ஆபத்பாந்தவனாக திகழ்கிறது. முன்பு உபரி நீர் செல்வதற்காக அமைக்கப்பட்ட இந்த ஓடை தற்போது நகரின் மொத்த கழிவுகளை சுமந்து கொண்டு தூத்துக்குடி திரேஸ்புரம் பகுதியில் பாதுகாக்கப்பட்ட மன்னார் வளைகுடா உயிர்கோள காப்பக கடலில் கலக்கிறது.

ஆண்டுதோறும் மழைக்காலத்தின் போது தேங்கும் கழிவுகள் அகற்றப்படுவதும் தொடர்ந்து மீண்டும் கழிவுகள் சேர்வதும் அகற்றப்படுவதும் தொடர் கதையாகவே உள்ளது. தற்போது மழை காலம் துவங்க உள்ள நிலையில் பக்கிள் ஓடையில் தேங்கி உள்ள பிளாஸ்டிக் கழிவுகளையும் அமலை செடிகளையும் அகற்றவும் மழை வெள்ளம் பாதிக்காமல் இருக்கவும் நடவடிக்கை எடுக்க வேண்டும் என்கின்றனர் பொதுமக்கள்.

தற்போது பக்கிள் ஓடை 7.5 கிலோ மீட்டர் தூரத்துக்கு சீரமைக்கப்பட்டு உள்ளது. மேலும் தூத்துக்குடி மாநகராட்சியின் 3 வது மைல் பகுதியில் துவங்கி திரேஸ்புரம் வரையிலான 6 கிலோமீட்டர் தூரத்துக்கு பக்களில் ஓடையின் இருபுறமும் மாநகராட்சி நிர்வாகம் சார்பில் சிமெண்ட் சாலைகள் அமைக்கப்பட்டு வருகிறது. இதனால் நகர் பகுதிகளில் ஏற்படும் போக்குவரத்து நெரிசலுக்கு தீர்வாக அமையும் என கூறும் பொதுமக்கள், ஆனால் இப்பகுதியில் சாலையோரங்களில் மின் விளக்குகள் அமைப்பதையும் மாநகராட்சி நிர்வாகம் உறுதி செய்ய வேண்டும் என்கின்றனர்.

ABP Nadu செய்திகளை டெலிகிராம் செயலி மூலம் உடனுக்குடன் தெரிந்துகொள்ள https://t.me/abpnaduofficial என்ற இணைப்பை க்ளிக் செய்யவும்.