திருக்கானூர்பட்டியில் வரும் 19ம் தேதி ஜல்லிக்கட்டு போட்டி; ஏற்பாடுகள் மும்முரம்
வெற்றி பெறும் காளைகள் மற்றும் மாடு பிடி வீரர்களுக்கு பீரோ, கட்டில் என ஏராளமான பரிசுகளும் வழங்கப்படும்.
தஞ்சை அருகே திருக்கானூர்பட்டியில் வரும் 19-ந் தேதி ஜல்லிக்கட்டு போட்டி நடைபெறுகிறது. இதற்காக வாடிவாசல் அமைக்கும் பணிகள், தடுப்பு கட்டைகள் அமைத்தல் உட்பட பல பணிகள் மும்முரமாக நடந்து வருகிறது.
தஞ்சை அருகே திருக்கானூர்பட்டியில் புனித அந்தோணியார் பொங்கலை முன்னிட்டு ஆண்டுதோறும் ஜல்லிக்கட்டு போட்டி நடத்தப்பட்டு வருகிறது. அதன்படி இந்த ஆண்டு ஜல்லிக்கட்டு வருகிற 19-ந்தேதி காலை 7 மணிக்கு தொடங்குகிறது. விழாவிற்கு கலெக்டர் தினேஷ் பொன்ராஜ் ஆலிவர் தலைமை வகிக்கிறார். திருக்கானூர் பட்டி பங்குதந்தை தேவதாஸ் இக்னேசியர் முன்னிலை வகிக்கிறார்.
ஜல்லிக்கட்டு நடத்தப்படும் மாதா கோவில் தெருவில் வாடிவாசல் அமைப்பதற்கான பணிகள் மும்முரமாக நடந்து வருகிறது. இதில் வாடிவாசலில் இருந்து 100 மீட்டர் தூரம் வரை ஒரு அடி உயரத்திற்கு தென்னை நார்கள் பரப்பப்பட உள்ளது. இந்த நார்களால் காளைகளும், வீரர்களுக்கும் கீழே விழுந்தாலும் காயம் ஏற்படாமல் இருக்கும் என்பதால் இந்த ஏற்பாடு செய்யப்படுகிறது. காளைகள் பார்வையாளர் பகுதிக்குள் சென்று விடாமல் இருப்பதை தடுக்க சவுக்கு கட்டைகளால் தடுப்புகள் அமைக்கப்பட்டு வருகின்றன.
இந்த ஜல்லிக்கட்டில் 500க்கும் அதிகமான காளைகள் பங்கேற்கலாம் என்று எதிர்பார்க்கப்படுகிறது. மேலும் நூற்றுக்கணக்கான மாடுபிடி வீரர்களும் பங்கேற்கின்றனர். வீரர்களை களத்துக்குள் அனுப்புவதற்கு தனி பாதை ஏற்படுத்தப்பட்டு வருகிறது. வீரர்கள் யாராவது காயம் அடைந்தால் உடன் அவர்களை மருத்துவமனைக்கு அழைத்துச் செல்ல ஆம்புலன்சிற்கு தனிப்பாதை அமைக்கப்படும் என்று தெரிவிக்கப்பட்டது.
இந்த ஜல்லிகட்டில் பங்கேற்க ஜல்லிக்கட்டு காளை வளர்ப்பவர்கள் மற்றும் மாடு பிடி வீரர்கள் தங்கள் பெயரை பதிவு செய்து வருகின்றனர் என்று பொதுமக்கள் தரப்பில் தெரிவித்தனர்.
தலைப்பு செய்திகள்
ட்ரெண்டிங் செய்திகள்
