திருக்கடையூர் அமிர்தகடேஸ்வரர் கோயிலில் அமைச்சர் சேகர்பாபு மணிவிழா கோலாகலம்

திருக்கடையூர் அபிராமி உடனாகிய அமிர்தகடேஸ்வரர் கோயிலில் இந்து சமய அறநிலையத்துறை அமைச்சர் சேகர்பாபு சஷ்டியப்தபூர்த்தி விழா நடைபெற்றது.

அமைச்சர் சேகர்பாபு மணிவிழா

மயிலாடுதுறை மாவட்டம் தரங்கம்பாடி தாலுக்கா திருக்கடையூரில் தருமபுரம் ஆதீனத்திற்கு சொந்தமான உலக புகழ் பெற்ற பழமையான ஸ்ரீ அபிராமி சமேத ஸ்ரீ அமிர்தகடேஸ்வரர் கோயில் அமைந்துள்ளது. தேவார பாடல் பெற்ற இத்தலத்தில் சுவாமி கால சம்ஹார மூர்த்தியாக எழுந்தருளி மார்க்கண்டேயருக்காக எமனை சம்ஹாரம் செய்த தலம் ஆதலால் இது அட்ட விரட்ட தலங்களில் ஒன்றாக திகழ்ந்து வருகிறது. இதனால், இங்கு 60 தொடங்குபவர்கள் 60, 70, 80, 90, 100 வயது பூர்த்தியடைந்தவர்கள் ஆயுள் விருத்தி வேண்டி சிறப்பு ஹோமங்கள் செய்தும், திருமணங்கள் செய்து சுவாமி அம்பாளை வழிபட்டால் நீண்ட ஆயுள் கிடைக்கும் என்பது ஐதீகம்.

இந்த நம்பிக்கை காரணமாக இக்கோயிலில் தினந்தோறும் ஆயிரக்கணக்கான பக்தர்கள் வந்து சாமி தரிசனம் செய்து செல்கின்றனர். அதேபோன்று ஆண்டு முழுவதும் இக்கோயிலில் திருமண வைபவங்கள் நடைபெறுவது வழக்கம். இத்தகைய பல்வேறு சிறப்பு மிக்க கோயிலில் இன்று தமிழக இந்து சமய அறநிலையத்துறை அமைச்சர் சேகர்பாபுவுக்கு 60 வயது பூர்த்தி அடைந்து 61 வது வயது தொடங்குவதை முன்னிட்டு சஷ்டியப்த பூர்த்தி விழா எனப்படும் மணிவிழா நடைபெற்றது. விழாவை முன்னிட்டு நேற்று மாலை திருக்கடையூர் கோயிலுக்கு வந்த சேகர் பாபு, அவரது மனைவி சாந்திக்கு கோயில் நிர்வாகம் சார்பில் பூரண கும்பம் மரியாதை கொடுத்து வரவேற்பு அளிக்கப்பட்டது. தொடர்ந்து கோயிலுக்குள் சென்ற அமைச்சர் கோபூஜை, கஜ பூஜை செய்தனர்.

பின்னர் நூற்றுக்கால் மண்டபத்தில் நடைபெற்ற முதல் கால யாக பூஜையில் கலந்து கொண்டார். தொடர்ந்து இன்று காலை சஷ்டியப்த பூர்த்தி சிறப்பு யாகம் நடைபெற்றது. இதில் கலந்துகொண்ட அமைச்சர் சேகர்பாபு, அவரது மனைவி சாந்தி ஆகியோருக்கு கலசபிஷேகம் செய்து வைக்கப்பட்டது. பின்னர் அமைச்சர் சேகர்பாபு பட்டு வேட்டி சட்டை அணிந்து, ஸ்ரீ சூரணம் திலகம் தரித்து சிவாச்சாரியார்கள் வேத மந்திரங்கள் ஓத, மேளதாள மங்கள வாத்தியங்கள் முழங்க அவரது மனைவி சாந்திக்கு திருமாங்கல்யம் அணிவித்தார். தொடர்ந்து அமைச்சர் சேகர்பாபு தம்பதியர் சுவாமி, அம்பாள், கால சம்ஹார மூர்த்தி சன்னதிகளுக்கு சென்று சிறப்பு வழிபாடு நடத்தினர்.

இந்நிகழ்ச்சியில் அமைச்சரின் மகன்கள் ஜெயசிம்மன், விக்னேஷ் மற்றும் உறவினர்கள் கலந்து கொண்டனர். மேலும் கோயிலுக்கு வந்த பெண் பக்தர்களுக்கு புடவையுடன் மங்களப் பொருட்களை தம்பதியினராக வழங்கினர். சஷ்டியப்த பூர்த்தி விழாவை திருக்கடையூர் கணேஷ், மகேஷ் குருக்கல்கள் தலைமையிலான சிவாச்சாரியார்கள் செய்து வைத்தனர். சஷ்டி அப்த பூர்த்தி விழாவை முன்னிட்டு அமைச்சர் சேகர்பாபுவுக்கு தருமபுரம் ஆதீனம் சார்பில் ஆதீன கட்டளை   ஸ்ரீமத் சுப்பிரமணிய தம்பிரான் தலைமையில் ஆதீன கோயில்களின் தலைமை கண்காணிப்பாளர் மணி திருக்கடையூர் கோயில் உள்துறை கண்காணிப்பாளர் விருதகிரி ஆகியோர் பிரசாதங்களை வழங்கினர்.