‛உன் இடம் பறி போயிடுச்சு...’ 85 வயது மூதாட்டி வீட்டை அபகரித்த அநியாயம்... உதவி கேட்டு அலையும் அவலம்!

ஆதரவற்ற மூதாட்டி, தனது வீட்டை மீட்டுத்தரக் கோரி மாவட்ட ஆட்சியர் அலுவலகத்திற்கு அலையாய் அலைந்து திரியும் சம்பவம் அனைவரையும் கண்கலங்க செய்துள்ளது.

மாவட்ட ஆட்சியர் அலுவலகத்திற்கு வந்து செல்லும் மூதாட்டி

மயிலாடுதுறை மாவட்டம் குத்தாலம் தாலுக்கா வில்லியநல்லூர் கிராமத்தை சேர்ந்தவர் உத்திராபதி என்பவரின்  மனைவி 85 வயதான கோவிந்தம்மாள். இவருக்கு ஒரு மகனும், 2 மகளும் உள்ளனர். கணவர் மற்றும் இருந்த ஒரு மகனும் இறந்த நிலையில் 2 மகள்களையும் கும்பகோணம் அருகே திருமணம் செய்துகொடுத்துவிட்டு வில்லியநல்லூரில் தனது கணவர் பெயர் உள்ள இடத்தில் குடிசைவீட்டில் தனியாக வசித்துவந்துள்ளார். 

இந்நிலையில், இவரது வீட்டை அருகில் இருக்கக்கூடிய சிலர் உனது இடத்தை வாங்கிவிட்டோம் நீ இங்கே இருக்கக்கூடாது என்று கூறி வெளியே அனுப்பியுள்ளனர். இது குறித்து மயிலாடுதுறை மாவட்ட ஆட்சியர் அலுவலகத்தில் மக்கள் குறைத்தீர் நாள் கூட்டத்தில் கடந்த சில வாரங்களுக்கு முன்பு கோவிந்தம்மாள் மனு கொடுத்துள்ளார். இது குறித்து குத்தாலம் வட்டாட்சியர் மற்றும் காவல்துறையினர் விசாரிப்பதற்கு மாவட்ட ஆட்சியர் பரிந்துரை செய்துள்ளார்.

ஆனால், அதிகாரிகள் கோவிந்தம்மாளுக்கு வயதானவர் என்பதால் சரியான தகவல்கள் கொடுக்காமல், இது தொடர்பாக கண்டுகொள்ளாமல் விட்டதாக செல்லப்படுகிறது.  இதனால் வாரந்தோறும் திங்கள் கிழமை நடக்கும் குறைத்தீர் நாள் கூட்டத்திற்கு வந்து கோவிந்தம்மாள் மனுகொடுக்கிறார். ஆனால் எந்த நடவடிக்கையும் எடுக்கப்படாததால் பார்ப்பவர்கள் மனது கண்களக்க செய்துள்ளது. 

இது குறித்து கோவிந்தம்மாள் கூறுகையில் , எனது கணவர் பெயரில் உள்ள இடத்தில் குடிசை வீட்டில் வசித்து வந்தேன். அதனை அப்பகுதியில் இருக்கும் ஒருசிலர் நீ இங்கே இருக்காதே இடத்தை வாங்கிவிட்டோம் என்று கூறுகின்றனர். மகன் இறந்த நிலையில் மகள்கள் வீட்டில் சென்று இருக்க முடியாமல் தனது கணவர் வாழ்ந்த வீட்டில் நான் வாழ்ந்து மறைய வேண்டுமென்று நீதி கேட்டு மாவட்ட ஆட்சியர் அலுவலகத்திற்கு நடயாய் நடக்கிறேன்.

ஆனால், குத்தாலம் தாலுக்கா அலுவலகம், காவல்நிலையத்திற்கும் செல் என்று கூறுகிறார்கள். நான் படிக்காதவல் வயது மூப்பாகிவிட்டது இன்னும் எத்தனை நாள் வாழ்வேன் என்று கூட தெரியவில்லை, எனது இறுதி மூச்சு என் கணவர் வாழ்ந்த வீட்டில் செல்லவேண்டும் அதனை மீட்டுக்கொடுக்க அரசு நடவடிக்கை எடுக்க வேண்டுமென்று கண்ணீர்மல்க தெரிவித்தார்.