தஞ்சை மாவட்டத்தில் பட்டாசு வெடித்தபோது 13 பேர் சிறிய அளவில் காயம்
ஒரு சிறுவன் மட்டும் உள்நோயாளியாக சிகிச்சை பெற்று வருகிறார். மேலும் திருவிடைமருதூர், தஞ்சாவூர், மதுக்கூர் அருகே அத்திவெட்டி ஆகிய 3 இடங்களில் தீ விபத்துக்கள் ஏற்பட்டன.
தஞ்சாவூர்: தஞ்சை மாவட்டத்தில் தீபாவளி பட்டாசு விபத்துக்களில் 2 ஆண்கள் மற்றும் 11 சிறுவர்கள் சிறிய அளவில் காயமடைந்து சிகிச்சை பெற்றனர். இதில் ஒரு சிறுவன் மட்டும் உள்நோயாளியாக சிகிச்சை பெற்று வருகிறார். மேலும் திருவிடைமருதூர், தஞ்சாவூர், மதுக்கூர் அருகே அத்திவெட்டி ஆகிய 3 இடங்களில் தீ விபத்துக்கள் ஏற்பட்டன.
தீபாவளியின் போது சிறுவர்கள் முதல் பெரியவர்கள் வரை பட்டாசுகள் வெடித்து உற்சாகமாக கொண்டாடுவார்கள். சில நேரங்களில் பட்டாசுகள் வெடிக்கும் போது தீக்காயம் அடைந்து விடுகின்றனர். பட்டாசுகள் வெடிக்கும்போது பாதுகாப்பாக வெடிக்க வேண்டும் என்று தீயணைப்புத்துறையினர் பல்வேறு வகையிலும் மக்கள் மத்தியில் விழிப்புணர்வை ஏற்படுத்தி வருகின்றனர். இருப்பினும் தீபாவளி நேரங்களில் பட்டாசு விபத்துக்கள் நடப்பது தொடர்ந்து நடந்து வருகிறது.
இந்தாண்டு நேற்று தீபாவளி உற்சாகமாக கொண்டாடப்பட்டது. தஞ்சை மாவட்டத்தில் நகர் பகுதிகள் மற்றும் கிராமப்பகுதிகளில் மக்கள் உற்சாகமாக பட்டாசுகள் வெடித்து கொண்டாடினர். இந்நிலையில் பட்டாசுகள் வெடிக்கப்பட்டதில் 8 சிறிய அளவிலான விபத்துக்கள் ஏற்பட்டு உடனடியாக தடுக்கப்பட்டது. இதேபோல் மாவட்டத்தில் பட்டாசுகள் வெடிக்கும் போது 2 ஆண்கள் மற்றும் 11 சிறுவர்கள் என மொத்தம் 13 பேர் காயமடைந்து சிகிச்சை பெற்றனர். இதில் ஒரு சிறுவன் மட்டும் உள்நோயாளியாக சிகிச்சை பெற்று வருகிறார்.
தஞ்சை மாவட்டத்தில் தீபாவளியன்று மின்கசிவு காரணமாக தஞ்சை புதிய பேருந்து நிலையத்தில் ஒரு மளிகை கடை எரிந்து சாம்பலானது. இதில் ரூ.5 லட்சம் மதிப்பு பொருட்கள் எரிந்து சேதமடைந்தது. இதேபோல் திருவிடைமருதூரில் சிறிய கூரை வீடு, மதுக்கூர் அருகே அத்திவெட்டியில் ஷெட்டில் நிறுத்தி வைக்கப்பட்டு இருந்த டிராக்டர் மற்றும் டிரெய்லர், ஒரு கார் ஆகியவை எரிந்து சேதமடைந்தன. இவை பட்டாசு வெடிக்கும் போது ஏற்பட்ட விபத்துக்கள் அல்ல என்பதும் குறிப்பிடத்தக்கது.
இதுகுறித்து மாவட்ட தீயணைப்பு அலுவலர் குமார் கூறுகையில், மிகச்சிறிய அளவில் பட்டாசுகள் வெடித்து காயமடைந்த சம்பவங்கள் நடந்துள்ளது. இருப்பினும் விபத்தில்லா தீபாவளியை அனைவரும் கொண்டாட வேண்டும் என்பதுதான் முக்கியம். பட்டாசுகள் வெடிக்கும் போது பாதுகாப்பு ஏற்பாடுகள் செய்து கொள்ள வேண்டும் என்று மக்கள் மத்தியில் விழிப்புணர்வை ஏற்படுத்தி இருந்தோம். பெரியவர்கள் துணையுடன் சிறியவர்கள் பட்டாசுகளை வெடிக்க வேண்டும். திறந்த வெளியில் பட்டாசுகள் வெடிக்கும் போது கவனமாக இருக்க வேண்டும். குடியிருப்பு பகுதியில் ராக்கெட் போன்ற பட்டாசுகளை வெடிப்பதை தவிர்க்க வேண்டும் என்று பல்வேறு விதத்திலும் மக்கள் மத்தியில் விழிப்புணர்வை ஏற்படுத்தி இருந்தோம் என்பதும் குறிப்பிடத்தக்கது. இருப்பினும் இன்னும் விழிப்புணர்வு தேவை. இவ்வாறு அவர் தெரிவித்தார்.
தலைப்பு செய்திகள்
ட்ரெண்டிங் செய்திகள்
