நகராட்சி, மாநகராட்சிகளுக்கு எப்போது தேர்தல்? - தேர்தல் ஆணையர் பேட்டி இதோ!

உள்ளாட்சித் தேர்தல் அறிவித்த 9 மாவட்டங்களில் தேர்தல் நடத்தை விதிகள் உடனே அமலுக்கு வந்தது.

தேர்தல்

ஊரக உள்ளாட்சித் தேர்தல் தேதி அறிவிக்கப்பட்ட நிலையில், நகராட்சி மற்றும் மாநகராட்சிகளுக்கு தேர்தல் எப்போது நடைபெறும் என்பது குறித்தும் மாநில தேர்தல் ஆணையம் தகவல் தெரிவித்துள்ளது.

தமிழ்நாட்டில் விடுபட்ட 9 மாவட்டங்களில் இரண்டு கட்டமாக அக்டோபர் 6 மற்றும் 9ஆம் தேதிகளில் ஊரக உள்ளாட்சித் தேர்தல் நடைபெறும் என அறிவிக்கப்பட்டுள்ளது.

இதுதொடர்பாக சென்னையில் தமிழ்நாடு மாநில தேர்தல் ஆணையர் பழனிகுமார் இன்று செய்தியாளர்களை சந்தித்து பேட்டியளித்தார். அந்தப் பேட்டியில அவர் கூறியதாவது: 

“தமிழ்நாட்டில் விடுபட்ட 9 மாவட்டங்களில் இரண்டு கட்டமாக அக்டோபர் 6 மற்றும் 9ஆம் தேதிகளில் ஊரக உள்ளாட்சித் தேர்தல் நடைபெறும். செங்கல்பட்டு, காஞ்சிபுரம், விழுப்புரம், கள்ளக்குறிச்சி, நெல்லை, தென்காசி, வேலூர், திருப்பத்தூர், ராணிப்பேட்டை, ஆகிய மாவட்டங்களில் தேர்தல் நடைபெறுகிறது.  28 மாவட்டங்களில் நிரப்பப்படாத 789 இடங்களுக்கு அக்டோபர் 9ஆம் தேதி வாக்குப்பதிவு நடைபெறும். முதற்கட்ட வாக்குப்பதிவு அக்டோபார் 6ஆம் தேதியும், இரண்டாம் கட்ட வாக்குப்பதிவு 9ஆம் தேதி நடைபெறும். காலை 7 மணி முதல் மாலை 6 மணி வரை வாக்காளர்கள் வாக்களிக்கலாம். கொரோனாவால் பாதிக்கப்பட்டவர்கள் மாலை 5 மணி முதல் 6 மணி வரை வாக்களிக்கலாம்.  9 மாவட்டங்களுக்கான ஊரக உள்ளாட்சித் தேர்தல் வாக்கு எண்ணிக்கை அக்டோபர் 12ஆம் தேதி நடைபெறும். தேர்தலுக்கான வேட்புமனுத்தாக்கல் செப்டம்பர் 15ஆம் தேதி தொடங்கி, 22ஆம் தேதி முடிவடையும். வேட்புமனுக்கள் மீதான பரிசீலனை செப்டம்பர் 23ஆம் தேதி நடைபெறும்.செப்டம்பர் 25ஆம் தேதி  வேட்புமனுவை திரும்பப்பெறலாம். 9 மாவட்டங்களுக்கும் தனித்தனியாக ஐஏஎஸ் அதிகாரிகள் பார்வையாளர்களாக நியமிக்கப்படுவார்கள். பணியாளர் பற்றாக்குறை, நிர்வாக காரணங்களால் 2 கட்டமாக தேர்தல் நடத்தப்படுகிறது. தேர்தல் பாதுகாப்புப் பணியில் 40,000 காவலர்கள் ஈடுபடுத்தப்படுவார்கள்” என்று கூறினார்.

 

#BREAKING | தமிழ்நாட்டில் விடுபட்ட 9 மாவட்டங்களுக்கு அக்.6, 9ம் தேதிகளில் 2 கட்டங்களாக உள்ளாட்சித் தேர்தல் நடைபெறும்

- மாநில தேர்தல் ஆணையர்https://t.co/wupaoCQKa2 | #TNElection | #LocalbodyElection | #AIADMK | #DMK pic.twitter.com/GaeHcNogZw

— ABP Nadu (@abpnadu) September 13, 2021

மேலும்,  “ இந்த தேர்தலில் 4 விதமான வாக்குச் சீட்டுகள் பயன்படுத்தப்படும். தேர்தல் வாக்குப்பதிவு நடைமுறைகள் முழுவதும் வீடியோ பதிவு செய்யப்படும். ஊராட்சித் தலைவர்கள், துணைத்தலைவர்கள் அக்டோபர் 22ஆம் தேதி தேர்வு செய்யப்படுவார்கள்.உள்ளாட்சித் தேர்தல் அறிவித்த 9 மாவட்டங்களில் தேர்தல் நடத்தை விதிகள் உடனே அமலுக்கு வந்தது.  அக்டோபர் 16ஆம் தேதி வரை தேர்தல் நடத்தை விதிகள் அமலில் இருக்கும்” என்றும் கூறினார்.

இதனைத் தொடர்ந்து, நகராட்சி மற்றும் மாநகராட்சிகளுக்கு தேர்தல் எப்போது நடைபெறும் என்று செய்தியாளர்கள் எழுப்பிய கேள்விக்கு, தேர்தல் நடத்துவதற்கான பணிகளை தொடங்கியுள்ளோம் என்று தமிழ்நாடு மாநில தேர்தல் ஆணையர் பழனிகுமார் கூறினார்.