உங்கள் பெயர் பட்டியலில் இருக்கிறதா? விழுப்புரம் மாவட்ட 2026-ஆம் ஆண்டின் இறுதி வாக்காளர் பட்டியல் வெளியீடு!
விழுப்புரம் மாவட்டம்: இறுதி வாக்காளர் பட்டியலில் 53,873 புதிய வாக்காளர்கள் சேர்ப்பு; 2,166 வாக்குச்சாவடி மையங்கள் அமைப்பு!
விழுப்புரம்: விழுப்புரம் மாவட்ட ஊரக வளர்ச்சி முகமை அலுவலக கூட்டரங்கில் அனைத்து அங்கீகரிக்கப்பட்ட அரசியல் கட்சி பிரதிநிதிகள் முன்னிலையில் சிறப்பு தீவிர திருத்தம் -2026 இறுதி வாக்காளர் பட்டியலை மாவட்ட தேர்தல் அலுவலர் /மாவட்ட ஆட்சித்தலைவர் ஷே.ஷேக் அப்துல் ரஹ்மான் அவர்கள் வெளியிட்டார்.
விழுப்புரம் மாவட்ட ஊரக வளர்ச்சி முகமை அலுவலக கூட்டரங்கில் அனைத்து அங்கீகரிக்கப்பட்ட அரசியல் கட்சி பிரதிநிதிகள் முன்னிலையில் சிறப்பு தீவிர திருத்தம் -2026 இறுதி வாக்காளர் பட்டியலை மாவட்ட தேர்தல் அலுவலர் / மாவட்ட ஆட்சித்தலைவர் ஷேக் அப்துல் ரஹ்மான் இன்று (23.02.2026) வெளியிட்டார்.
மாவட்ட தேர்தல் அலுவலர் மாவட்ட ஆட்சித்தலைவர் ஷேக் அப்துல் ரஹ்மான், அவர்கள் தெரிவிக்கையில்,
இந்திய தேர்தல் ஆணையத்தின் உத்தரவின் பேரிலும், மற்றும் தமிழ்நாடு தலைமைத் தேர்தல் அதிகாரி அவர்களின் அறிவுரையின் பேரிலும், விழுப்புரம் மாவட்டத்தில் 01.01.2026-ஐ தகுதி நாளாகக் கொண்டு வாக்காளர் பட்டியல் சிறப்பு தீவிர திருத்தம் 2026 (Special Intensive Revision- 2026) பணிகள் நடைபெற்றது. இதில் 1970 வாக்கு சாவடி நிலை அலுவலர்களும், 198 வாக்கு சாவடி மேற்பார்வையாளர்களும், 7453 வாக்கு சாவடி நிலை முகவர்கள் மற்றும் பல்வேறு துறை சார்ந்த அரசு ஊழியர்கள் மற்றும் தன்னார்வலர்கள் என 2245 நபர்கள் இணைந்து சிறப்பு தீவிர திருத்தம் பணியில் ஈடுபட்டனர்.
விழுப்புரம் மாவட்டத்தில் வாக்காளர் பட்டியல் சிறப்பு தீவிர திருத்தம் 2026 க்கு முன்னதாக 27.10.2025 தேதியின்படி விழுப்புரம் மாவட்டத்தில் 8,49,236 ஆண் வாக்காளர்களும், 8,78,011 பெண் வாக்காளர்களும் மற்றும் 243 மூன்றாம் பாலின வாக்காளர்களும் என மொத்தம் 17,27,490 வாக்காளர்கள் இருந்தனர்.
விழுப்புரம் மாவட்டத்தில் வாக்காளர் பட்டியல் சிறப்பு தீவிர திருத்தம் 2026 நடைபெற்றதற்கு பிறகு வரைவு வாக்காளர் பட்டியல் 19.12.2025 அன்று வெளியிடப்பட்டுள்ளது. மேற்படி வரைவு வாக்காளர் பட்டியலில் 7,64,377 ஆண் வாக்காளர்களும், 7,80,042 பெண் வாக்காளர்களும் மற்றும் 206 மூன்றாம் பாலின வாக்காளர்களும் என மொத்தம் 15,44,625 வாக்காளர்கள் இருந்தார்கள்.
மேலும், விழுப்புரம் மாவட்டத்தில் உள்ள (07 சட்டமன்ற தொகுதிகளில்) வாக்கு சாவடி நிலை அலுவலர்களால் வாக்காளர் சிறப்பு தீவிர திருத்தம் 2026 கணக்கெடுப்பு படிவம் வழங்கப்பட்டு, வாக்காளர்கள் படிவங்கள் பதிவேற்றம் செய்யப்பட்டுள்ளது. இதில் முகவரியில் வசிக்காத வாக்காளர்கள்/இடமாற்றம் செய்த வாக்காளர்கள்/ இதர வாக்காளர்களும், இறந்த வாக்காளர்களும் மற்றும் இரட்டை பதிவு வாக்காளர்களும், வாக்காளர்களின் பெயர்கள் நீக்கம் போன்ற பணிகள் நடைபெற்றது.
தற்போது 01.01.2026 தகுதி நாளாக கொண்டு இறுதி வாக்காளர் பட்டியல் இன்றையதினம் வெளியிடப்பட்டுள்ளது. இவற்றில் விழுப்புரம் மாவட்டத்தில் 11,845 வாக்காளர்கள் நீக்கப்பட்டும், 53,873 வாக்காளர்கள் சேர்க்கப்பட்டுள்ளார்கள். மேற்படி இறுதி வாக்காளர் பட்டியலில் 7,83,288 ஆண் வாக்காளர்களும், 8,03,154 பெண் வாக்காளர்களும் மற்றும் 211 மூன்றாம் பாலின வாக்காளர்கள் என மொத்தம் 15,86,653 வாக்காளர்கள் உள்ளனர்.
விழுப்புரம் மாவட்டத்தில் உள்ள 07 சட்டமன்ற தொகுதிகளில் (27.10.2025) தேதியின்படி 1970 வாக்குச்சாவடி மையங்கள் இருந்தது. இவற்றில் 1200 வாக்காளர்களுக்கு மேல் உள்ள வாக்குச்சாவடிகளை பிரிக்கப்பட்டு தற்போது 2,166 வாக்குச்சாவடி மையங்கள் உள்ளது என மாவட்ட தேர்தல் அலுவலர் / மாவட்ட ஆட்சித்தலைவர் அவர்கள் தெரிவித்தார்.
இக்கூட்டத்தில் திண்டிவனம் சார் ஆட்சியர் திரு.அ.ல.ஆகாஷ், இ.ஆ.ப., திருக்கோவிலூர் சார் ஆட்சியர் திரு.ஆனந்த் குமார் சிங், இ.ஆ.ப., மாவட்ட ஆட்சியரின் நேர்முக உதவியாளர் (பொது) (பொ) திரு.ராஜூ, தனி வட்டாட்சியர் (தேர்தல்) திரு.கணேஷ் உட்பட பலர் கலந்துகொண்டனர்.
தலைப்பு செய்திகள்
ட்ரெண்டிங் செய்திகள்
